Михаил Бігуняк
Михаил Бігуняк, Michael Bihuniak

10 мая 1963 р. помер в Шелтон, Конн., Михаил Бігуняк, родом зо села Новица, Горлицкого повіта на Лемковщині. Михаил Бігуняк помер на свойой фармі, на котрой за долга рокы отбывалися містны и окружны пикникы Лемко-Союза, так што он был широко извістный по всьой околици. Понеже был сознательным краяном, то активно помагал в клубі Л. С. в свойой місцевости, а коли остала набыта наша карпаторусска здравница Лемко-Парк, то он много раз приізжал до Парку и тыжднями помагал роботами привести Парк до порядку и удосконаления.

Он знал дати велику помоч так, як знался на будовляных роботах, то и в Парку, враз с предсідательом свого отділа причинилися тилько, што заощадили Парку росходов найменьше на пару тысяч долларов. Кромі того Михаил подготовлял до открытия новый клуб Лемко-Союза, но смерть пришла так само несподівано и забрала с дому мужа и отца дітьом, а членам организации доброго члена.

Михаил ожеился с Євком Шкурат, из села Бортне, того самого повіта. Они были благословены троими дочками и сыном Данилом. Пок. Михаил был надзвычай милого характера и помагал много при всіх организацийных роботах в пресс-кампаниях, в предприятиях, а уж найбольше помагал за остатных пару роков, отколи вышол на пенсию. Он был частым гостьом в редакции “К. Руси” в КРА Центрі и Лемко-Парку, всяды приводил людей и заохочал до организации.

В лици Михаила Бігуняка наша емиграция вообще стратила доброго труженика, а найбольше отчуват то отділ Л. С. в Ансонии и всі отділы в Коннектикат штаті.






[BACK]