Зима снігом засыпала
Поля и долины,
Роспристерла понад земльом —
Біленькы перины.
Сыпле зима снігом всяди,
Мороз пече в уха,
И вознакы ся тіж дає
Сніжна заверуха.
Мороз тисне, што раз гірше,
Хоче докучити,
Бо намірил комперикы
Газдам зморозити.
Зазріл мороз и до кіпци,
Де слабо накрыты,
Пхаєся и до пивниці,
Бы своє зробити.
|
Псотит зима, як лем може,
Потягы встрімує,
Бо то она своим снігом
Торы засыпує.
И науку дітом в школі
Хоче прешкодити,
Бо не дає потягами
Угля довозити.
Час зимовый, то для зимы
Час урядувати,
Приде весна, солнце тепле,
И мусит втікати.
И полетит собі зима,
Де білы медведі,
Там ся буде літувала
На полночном леді.
|
