(Написано в 1930 року)
Лемковино, Лемковино, краю мой коханый,
Хоц колыска-с русскых людей, ними занедбаный! Лемковино моя мила, Вы Горы Карпаты, Яку грозу Вы прожили, аж страх вспоминати! Талергофы, Терезины, тюрьмы та и раны, Як долга ты и широка — горем спльондрувана! Тоты верхы чародійны, штоб знали сказати, Сколько разов от ударов мусіли пукати — Якы несла вража сила, кулями арматов, Пулеметов, рукострілов, гнобителей-катов! За што Тебе так гонено и масакровано, Тевтонами, мадьярами на смерть заеуджано! Хыбаль зато, же ты русска и тверда, як скала, Жебы твоя віра в своє на вікы пропала...
Не дождете вражы сыны так нас придусити.
Бо мы народ, як и другий, маме право жити! Хоц вы нас не признаєте, яко Руси сынов, Но мы живы и здоровы, в світі не загинем! Так як и нашы Карпаты не уляжут зміні Под бурями и громами, не зогнеме спины “Єстесьцє на чужой земі и чужий хліб ісцє!” Мы то знаме, же хліб іме, та лем свой овсяный, Выдобытый з родной землі, моистевы паны! Мы не знаме марципанов, ани виногрона, Бо не маме нато місця, єдного загона. То, што маме, то ест наше и тым ся хвалиме, Маме віру и надію, же не отступиме... Прешли страшны, грозны часы войны світовой, Теперь, гварят, уж спокойны, та зас кризисовы. И то прейде, припомнеся и зас ся забуде, Лем сой єдно памятайме, лемкы русскы люде... Не смотме на перешкоды, горы и границі, Океаны и подшепты подлой єдиниці... Лем в Союзі ся громадме, в нем ся познавайме, През границі, океаны — рукы сой подайме! И тримаймеся, як єден, не пустме никого В нашы родны Карпаты краю Лемковского, Ни культуры, ни освіты тых добрых сусідов, Лем тримайме своє твердо, як нашы прадіды. До роботы и освіты дорога пред нами, А як дойти нам до ціли, то уж знаме сами! Познай себе, буде с тебе, гварит пословица, Не обзерайтеся на Мацька, Татичка и Фрица.
Сидор Кум, из Ванівкы.
|