OldLemko
Новорочны Повінчования — Яков Дудра
СТАРОГО ЛЕМКА ПРОРОКА

Пришол уж Рок Новый,
Як гварят латинский,
А за ним надходит
Наш грецкий, лемковский.

Прото и я сідам
За стол до писанья,
И складам сердечне
Лемкам вінчованья.

И найперше складам
Ту в Польші жичинья,
Моим братам лемкам
И сестрам лемкиням.

Позатым Вам лемкы,
Братья мои, друзі,
Што жиєте с дальша
В Совітском Союзі.
Тай лемкам за морьом
В далекой чужині
Без ріжиц, ци з Лосі,
Лабовы, ци Ждыні.

Там в той Америці
Ровнож и в аКнаді,
Пи Ваньови, ци Петрови,
Ци Любі, ци Наді.

Без ріжниці на вік,
Имя и назвиско,
Вшиткым лемкам всяды,
Далеко и близко.

Жичу тот четвертый
Рочок шистдесятый
Для всіх Вас здоровый,
Счастливый, богатый.

До ничого злого
Ся не допустити,
Здорово в счастью, в мирі,
Тот рочок прожити.

На полях крас вроду,
Сноп в сноп и што кроку,
И не мали школы
Ниякой в том року.

И штобы в том році
Кажда Ваша справа,
В каждой родиноньці —
Добрі ся складала.

Всьо ишло так гладко,
Як лыжва по леді,
И жили так сладко,
Як та пчола в меді.

Счастье так плынуло,
Як ріка до моря,
Кажде зло миуло —
И не знали горя.

Штобы сте всі были
Черствы, як водичка,
И ся Вам покрыли
Румянцями личка.

Жичу в каждой хаті
Здравья, веселости,
И при каждом святі
Огрысти кус кости.

Но и Вам шоферам,
И Вам трактористам —
Навет не выберам,
Бо всім машинистам.

Жичу Вам Нового
Счастливого року,
Всього найліпшого
И на каждом кроку.

Штобы Вас уникли
Выпадкы, клопоты,
И все повертали
Счастливо з роботы.

Старым лемкам смаку
Жичу до іджиья,
Kaссу яку-таку,
Здоровья до ходжинья.

Но и добре спанья,
Штобы,тихо спали,
Без кашлю, стогнанья
Все рано вставали.

И штобы их ногы
Не згірше тримали,
И понад порогы
Дост легко двигали.

И штобы их внучкы
Мило шанували,
Водили за ручкы
Дідом, бабцьом звали.

А сынове, дівкы
Добрі зарабляли,
Великы готівкы
До кассы вкладали.

Жичу тот Новый Рок
Для вшиткых учтивый
Бо тот, што уж нам втюк —
То был кусцьок мстивый.

Хочу ище єдно
Лемкам вінчовати,
В котрых так барз бідно,
Най их буде стати.

Предплатити “Русь Карпатску”
И кожду читати,
И листы до ней
Мудры присылати.

Всього найліпшого
Ище раз желаю
Для лемка каждого
Ту и в чужом краю.

Новый най загостит
До нас кус инакший,
Най ся нич не злостит,
Лем буде кус мякший.

Не приносит кары,
Лем веселит хаты,
И за тамты стары
Надгородит страты.

Без ліків, докторів
Жийте в Новом Році
Каждый такий здоров,
Як рыба в потоці.

Честно всі працуйте,
Хоц часто и в зною
И труд свой споживайте
Здоровы в спокою.


Яков Дудра,
Лосье, Польша.




WinterScene



[BACK]