Фальшивый Світ — Яков Дудра
О який ты світе,
Дивно барз створеный,
Же никто из тебе
Не задоволеный.

Бідный нема істи,
Ани в чым ходити,
Богач нема здравья,
Або красных дітей.

Декому знов бракує
Хліба на преднівкы,
Инший нема сынов,
Лем зас самы дівкы.

Газда все в роботі,
Як вол запряженый,
И чым тяжше робит
Лекше ма в кышени.

Урядник не може
Перо до рук взяти,
Бо му корч писарский
Пальці хце зламати.

Жебрак знов не може
На ногах ходити,
А нияк не може
Долгов ся сплатити.

Пружняк може істи,
Лем неє кто дати,
А поетам жены
Не дают писати.

Простый хлоп зо села
З штырьома клясами,
Хоче ся зроввати
З вчеными панами.

Такий простый газда
Из том сельском школом
Прагне засідати
С панами за столом.

Тай никто на світі
Не задоволеный,
Бо так уж тот світ
Дивно устроєный.

Под гором Кычером,
Зеленом полянком
Жил бы хлоп счастливо
И зо свойом Ганком.

Но та, што зробите,.
Як світ чудачыско,
Про то и я терпю
Старый бідачыско.

Ци не мог бы я сой
Счастливо пожити,
Жебы то світ дакус
Правдом был накрытый.

Але то чудачок,
Як бы зварьованый,
Лем ся “козьолкує”’
Як тот цап спутаный.

Не хцу ся уж теперь
Тым переймувати,
Лем жебы спокойно
Дали газдувати.

Люблю я газдовство,
Бо-м в нім навыкненый,
До твердого житья
Барз призвычаєный.

И барз я рад беру
В рукы плуг, чепігы,
И до ліса я рад
Сідам на телігы.

И косом я люблю
На луці махнути,
А люблю и пером
По хлопскы шкрябнути.

Люблю и поета
Часом отограти,
Та зас біда с женом,
Бо не даст писати.

Прото без вечери
Не раз иду спати
Бо не люблю квасну
Поливку хлипати.

Мам я дар газдовский,
Бо-м в том навыкненый,
Был бы-м и поетом;,
Лем при иншой жені.

И мог бы з мня быти
Незгорший поета,
Та жена все на мня,
Же-м старый поплета.

За гамбу мня ховзнат,
Перо з рук выдерат,
При людях мня ганьбит,
Кне и поневерат.

И про то я не мам
Житья веселого,
Бо-м не добрал жену
До дару свойого.

Як лем што напишу
Зарас критикує,
Же хлоп не до пера —
Так все до мня клює.

Ни ты не политик,
Ани ты не вченый,
Лем такий хлописко —
До плуга створеный.

Воліл бы-с сой дашто
В вечер полатати,
Як за стол сідати —
Байочкы зліпляти.

Як єс ся наробил,
Лігай же сой спати,
Бо до дня за косу —
Треба ся уж брати.

Бале тихо, бабо,
Та што-ж ти то шкодит? —
— Та не знаш, чудаку,
Же нафта выходит?

А ты все за перо
И то вечерами,
Присяде нас біда
Разом з дітисками.

Уж єм ти казала,
Ище ти раз гварю,
Же на то сут вчены,
А не ты — керпчарю.

Мают школы велькы,
Университеты,
Най пишут, складают
Ріжны профитеты.

Бо на то по школах
Кончили науку,
То най они пишут
Пере-фере-куку.

Тобі не до того
С том простом макыром,
Але гын до ліса
Пойти зо сокыром.

Простый хлоп от плуга
Хоче мудрых вчити,
А сам ище не зна,
Як где што ма быти.

Сліпый дід сліпого
Хоче провадити,
Певно гын до рікы
Зайдут ся втопити.

Смот же ты сой свойой
Газдівской роботы,
А вершы най пишут
Вчены патриоты.

Наліпиш, набабреш
Все на людскы сміхы,
Ни с того корысти,
Ни с того потіхы.

Лем ти с того очы
Не раз червеніют,
Тай мудры и глупы
Ся лем с того сміют.

Ой, што то за дивна
В тых бабах натура!
С чого ся сміяти,
Та она понура.

Але я и нато
Знам сой порадити,
Внет єм ся здогадал,
Як мам фронт змінити.

И уж я другий раз
Уживам “смыкалку”,
Приходжу з роботы
Лігам сой на лавку.

Тай стучу, стогну, нарічу,
Же мня в боці коле,
Уж мня жена просит:
Ноле, старый, ноле!

Ноле даяк вставай,
Хоц повечеряти,
А може бы-с пошол
Дешто кус писати.

Втікай от мня, бабо,
Не роб сой з мя смішкы,
Ту мні принес, як хцеш,
Зо штыри перішкы.

Бо уж ся не можу
На бок превернути,
Принес мні ту гуньку,
Бо хцу ся кус вкрыти.

Вкусил єм перога,
Тай очы заперам,
А с под гунькы єдным
Оком все позерам.

Як уж жена храпит
И діти четверо,
Потихонькы встаю,
Тай уж в рукі перо.

В хлопского поеты
Клопоты не велькы,
Набити бабиско,
Скоро до бутелькы.

И уж я спокойно,
Без крику и сваркы,
Складам верш до верша,
Словечка до паркы.

Тай пишу, лем шустит,
Аж загрызло в очы,
Позрю на годинку,
А ту уж пополночы.

Тай уж ся не вартат
Спаню лакомити,
Бо зас додня треба
С косом вылетіти.

Треба хоц з чверт морга
Травы подорвати,
А тымчасом к рану
Вершы здокончати.

Покля ище жена
Храпит на том ложу,
Затля вера перо
На бок не отложу.

Як ся ту не зорве
Жена из постелі,
Летит просто в окно,
Ци свитат на селі.

Летит розоспана,
Не зна, што ся водит,
Бо ся престрашила,
Же солнце уж всходит.

А я миг под гуньку,
Уж храплю на лавці,
А мои вершикы
Уж в куті в кобылиці.

А жена от окна
Вертат задыхана,
Позерат по хыжи,
Лямпа не згашена.

Ой та ктож то забыл
Світло загасити,
Не знам, ци я сама,
Ци дакотре з діти.

Была лямпа нафты,
Ой Боже, як шкода,
Бо то не за дармо,
Як с потока вода.

Добри, же хоц старый
Спит твердо, як скала,
Бо я бы ту зо ся
Дост от него мала.


Яков Дудра,
Лосье, Польша.



[BACK]