Юрко и Олена Бойко — Стефан Шкимба
Jury and Olena Bojko

Было то в субботу 15-го сентября в 1913 року, коли молодый паробок Юрко и молода дівица Олена Бойко, зложили собі присягу в русской православной церкви в Пассайку и обіцяло єдно другому, же будут вірны єдно до другого аж до самой смерти.

В Америку прибыли они обоє в 1912 року до Пассайку, Н. Дж., где роспозналися и о рок часу вступили в стан супружеский.

Незадолга потом они переселилися из Пассайка до Мыстик, Конн, где молодый Юрко получил роботу в текстильной фабрикі при тканью полотна. А так за який час они переселилися до Шелтон, Конн., где г-н Бойко знова получил роботу при тканью полотна, на котрой переробил аж доки не вышол на пенсию в 1947 р.

Обоє они походят из Пряшевской Руси. Г-н Бойко походит из славного русского села Ладомірова, котре знане на всі його околицы, яко село, где спущали кров хворым людьом, отправляли псалтырь и отрабляли поробленства, а г-жа Олена Бойко з роду Варна, походит из сусідного села Гунковцы, в Шаришской столиці.

В фамелии Юрка и Олены Бойко родилося семеро дітей: пят сынов и дві дочкы, а то сынове: Осиф, Николай, Юрко, Иван и Петро. Дочкы: Олена и Єва, всі они уж женаты и привели на тот світ єденадцетеро дітей внуков на радость діду Юрко и бабі Олені Бойко. Старша их дочка Олена служила в нейви, яко вейв в часі другой світовой войны, и коли прибыла домів на урляп, єй запросили товаришкы на танечну забаву до Ансонии, Конн. Там роспозналася она с молодым матрозом лемком Дмитром Юрчик из Ватербери, Конн., за котрого выдалася послі войны и породила свому мужови Дмитру дві красивы дівчинкы Сандру и Йоанну, котры співают уж в церковном хорі и любят всьо, што наше русске.

Тоты честны діти Юрка и Олены Бойко не забыли тяжкы труды своих родичов и устроили им золоту свадьбу 50-літне супружеске весіля, котре припадало на день 13-го сентября того 1963 року, но так як то выпало на пятницу, то головна юбилейна гостина началася в неділю 15-го сентября. Послі службы Божой в церкви был отслуженый молебен за здравием юбилянтов, а так всі діти, родина и знакомы отправилися в первоклассну ресторацию, где был приготовленый для всіх богатый юбилейный обід. А послі того всі зышлися в домі юбилянтов и весело провели тото золоте весіля Юрка и Олены Бойко аж до поздной ночы.

А теперь я пишущий тоты слова маю честь поздравити обоє молодят с их 50-літным юбилейом супружества, и желаю им всіх благ на многая и благая літа.


Стефан Шкимба,
Саратога Спа, Н. Й.



[BACK]