Осінь на Лемковині — Юрко Тернавка
Юж листкы з дерев летят
И вітер холодный дує,
То осінь до нас зазерат,
Кажде створіня тото чує.

Птахы літают купами.
Все штоси ся нараджают,
И поволи отлітуют группами
Гын, где зо зимна не страдают.

Поля уж пусты и сіры,
Лем місцями ріпа зеленіє,
Уці зогнаны в кошары,
Бо зла погода и ліє.

Смерекы, ялшиі на горах
Сут дальше зелены, чудовы.
Лем букы, березы в потоках
Готовятся на сон зимовый.

Вывіркы сой скачут по суках,
Зберают оріхы и буков,
А серны пасутся на луках,
Чуйны на найменьший стукот.


Юрко Тернавка.



[BACK]