В осени минувшого 1963 року, дня 9 ноября с особливом торжественностью отбылся 25-рочіный юбилей єдной из громаднійшых нашых институций Карпаторусского Американского Центра в Юнкерс, Н. Й.

Торжество было уплануване и проведене под руководством теперішного Правления Центра, в котром єст Петро Корба предсідательом, Тимко Феціца секретнрьом, Андрей Грабский кассиром и решту членами Правления, як и бывшыми урядниками.

Почетными гостями были:

Штатный сенатор Вильям Ф. Кондон, майор міста Юнкерса, Джон Е. Флинн, судьи: Алберт Л. Фиорило и Гилбер М. Ландии, менажер, а теперь избранный радным 2-гой воды, до котрой входит территория нашого Центра, Джеймс Р. Давнис, официальный адвокат Центра, Гарольд Т. Арбайтер и бывша секретарка Центра, Анна Ющак зо своим мужом Осифом Ющаком, а для благословения вечері митрофорный прот. о. Осиф Пыштей.

В часі вечері нашы почетны гості выголосили отповідны 25-рочному юбилею Центра бесіды, при чом высоко оцінили труды лемковского народа вложены при будові и ведению Центра, а тоже поглубилися в глубоку историю Лемковщины. Своим знанием они удивили всіх высше 350 гостей.

25-літне существование поза всьо внесло уж тоту ріжницу в наше народне житья, што не мы информуєме представителей нашого міста и нашого штата, а они поучают ширшы массы народа о лемках. В часі бесід тоже было отмічено, што наша будова утримуєся с такым порядком, што не лем не старієся, а што раз находится в красшом и модернійшом стані.

Послі торжественной гостины гості бавилися близко до розсвиту при звуках солидно розвившойся Молодежной Оркестры Лемко-Парка.

Дуже важно Правление поступило, што ку 25 юбилею издало памятну книжечку историю Центра, в котрой кромі многочисленных фотографий поміщены дві историйкы, коротша на английском языку и обширнійша на нашом языку. Помимо того, што историйкы читаются, як оповідания, они включают в собі важны даты и информации, относящыся до Центра. Вырвеме из середины лем дакотры из тых информаций. И так:

Перше собрание, на котром была поднята мысель будовы Центра отбылося 18 октября 1936 р. То было собрание отділа Лемко-Союза ч. 28 в Юнкерс, котрый отбылся на пикниковой полянці в лісі. Собрание отбылося с членами русского клуба, и будова должна быти разом будувана и обслугувати отділы обох организаций. До будовы принялися сейчас.

Но уж через рок в 1937 року, праві под будову были даны першы фундаменты, отбылся 6-ый съізд Лемко-Союза в Нью Йорку, котрый дозволялся у обох отділов розбудувати обширнійший дом, яко Центер для всіх отділов Л. С. в Соєдиненных Штатах и Канаді. Розумієся, што часы были тяжкы кризисовы, а готовкы не было, то началася усилена кампания за членскым, жертвами и по жичками, в чом помогли всі отділы и передовы патриоты. Нераз было так трудно, што єдны пожичкы треба было выплачати, а затігати другы.

Через новый рок, до конца октября 1938 року дом Карпаторусского Центра уж был на столько оконченый, што в нем мог отбытися 7 съізд Л. С., но до официального открытия будова была готова аж на весну 1939 року. Торжественне открытие Центра, на котре зышлися такы многотысячны массы лемковского народа из близкых и далекых околиц, якы николи больше ни раз не зышлися отбылося 28 мая 1939 року.

В Карпаторусском Центрі из 22 съіздов Лемко-Союза отбылося 11. Ту отбылся Карпаторусский Конгресс Лемко-Релифа в 1958 року, и в Карпаторусском Центрі провелися всі организацийны собрания и засідания для покупкы Лемко-Парка. Обі тоты организации ту выберали свои чартеры и початковый их адрес, то адрес Карпаторусского Центра, 556 Юнкерс Аве., Юнкерс, Н. Й.

Кромі съіздов Л. С. в Карпаторусском Центрі отбылися соткы представлень на лемковском языку, многы из них традицийного характера. При Центрі организовалася на пару заводов школа грамоты родного письма и языка, хоры, танцорскы кружкы, высвітлялися фильмы, читалися лекции, созывалися віча. На сцені Центра много раз выступали кружкы танцу, представлений и хоров из другых місцевостей, як Нью Йорка, Пассайка, Линдена, а даже раз выступили артисты Лемковского Кружка с далекого Кливланда в штаті Огайо.

За весь час в Центрі было 561 членов, в том 67 организаций. В теперішный час все ище Центер являтся сильном организациом с 449 членами в том 39 организаций.

Треба признати, што Центер зробил собі свою популярность тым больше, што он стал обытельом для Головного Правления Лемко-Союза и редакции газеты “Лемко”, теперь “Карпатской Руси” и молодежного журнала “Лемко”, стал направду культурным центром для нашой емиграции и остане на будучность для нашых поколіний.

Долгы Центра с процентами были отданы до чиста всім до 1955 року.

За остатных пару роков Центер начал, кромі моральной помочи служити нашому народу економично. Он закупил шеров в Лемко-Парку на три тысячы долляров, жертвувал на Лемко-Релиф 1000 долларов, дал безпроцентных пожичок студентам на поверх 7 тысяч долларов, а теперь установил шторочны стипендии в 250 долларов студентам дітей членов або членам, котры представлят свои найлучшы отзнакы в наукі высшых школ. Он жертвувал на Талергофский памятник 500 долларов и 500 на фильм “Лемковске Весіля”, а тоже до кассы Лемковского Народного Хора 250 долл.

В часі войны будова была Центром сборов фондов, лахов, медицины, молока для войск Совітского Союза, а тоже для Американского Червеного Креста, организации ЮСО и др.

Кромі всього Центер послужил многым нашым краянам для их фамилийных торжеств и предприятий, як весіля, юбилеи, крестины, похороны и др. Так, што Центер, яко “Лемко Галя” стал извістным в нашой місцевости так, як Сити Голл и желізнодорожный дворец.

При конци книжечкы Правление Центра призыват старшу и новшу емиграцию, а тоже нашу в Америкі рождену молодежь вступати членами Центра, бо то дає гордость каждому быти його членом, а лемковскому народу приносит славу и добро.