Youth63
А в неділю рано,
Як соненько сходит,
А наша молода
По хижонці ходит.

Ходит молода, ходит,
От кута до кута,
Мати ся звідує:
Чом ты дівко смутна.

А як же я маю
Ту весела быти,
Кедь ня ся хочете
С той хижонкы збыти.

Сходжайтеся нам дівчата,
Складайте барвіночок,
Олені на віночок.

Зыйди Господи з неба,
Бо тя нам ту треба,
Поблагослов барвіночок
Молодятам на віночок.

Дай ся вінку гладко вити,
Бо юж мі тя не носити,
Лем ту єдну неділеньку,
В понеділок годиноньку.

Подже посмот, люба матко,
Ци ся виє вінок гладко,
Гладко, дівонько, гладко.
Так, як червене ябко.

Сут по нім рамочкы.
Як по небі звіздочкы,
Так він проквитає,
Як місяченко сияє.

Горит свіченька, горит,
А Олену сердце болит.
Юж свіченька догорює,
Юж Олена додівчує.

Камняна горонько,
Чом ся не розвалиш?
Камняне серденько —
Чом ся не розжалиш?

А у нашого сусіда начинатся гостина,
Дал нам ся Бог дождати,
Дівку выховати,
И весіля справляти.

Росплітай, брате, косоньку,
Росплет же єй до волоска,

Та най иде поголоска,
Най же ціле село знає,
Же Олена ся выдає.

Дайте же нам горілочкы,
Вывили зме юж віночкы,
Юж роботечка закончена,
Ци нам буде заплачена?

Буде, буде заплачена,
Солодонька горівонька
З медом омеджена.

Посмот же ты Олен,
На тот свой віночок,
Як ся ти трепоче
Доєден листочок.



[BACK]