Наша Молодежь
ИВАН ЦИСЛЯК
John Chislak

Иван Цисляк, сын Владимира и Олены, родился в Торонто, Онт. Минувшого літа он окончил Торонтонский университет. В його школованию была перерва, котра тревала пару літ.

Иван посіщал торонтонску центральну техничну школу, при котрой взял печатный курс. Скоро окончил курсы, был рекомендованый и забраный на практичну роботу в Рапид Грин анд Баттен Корп., компании специализующойся в процессах продукции образов. За час роботы он пополнял своє образование. Потом посіщал ище Доминион Бизнес Колледж.

В том периоді погиб його отец в молодом віку и Иван оставил науку, штобы помочи свойой мамі вдові в финансовом положению. В том часі он познался с дівчином учительком и оженился, но вспольне рішение с женом было таке, абы вечерами Иван изучал французский язык, котрый служил обовязковым предметом для принятия його в университет. Послі успішно закопченого учения он был принятый в университет, котрый окончил 28 мая 1962 года и получил диплом “Бачлора св Саєнс” по линии медика, и сейчас получил роботу в єдной, из громаднійшых в Канаді продусеров медицины.

У Ивана Цисляка уж два сынове в подшкольном віку Дональд и Стефан.

Отец Ивана, теперь пок. Владимир Цисляк, родом из Устья Русского, а мати Олена, котра жиє в Торонто, родом из села Гагчовы из фамилии Яцевич. 



ИВАН БОРТНЯК
John Bortniak

Иван Бортняк, сын Михаила и Ольгы, родился в Торонто, провинции Онтарио в Канаді, в 1937 року. То был рок, в котром Канада все ище не виправилася из затяжной депрессии, в котру погрузилася в 1929 году. В такы часы тяжко было жити, а не то образовати дітей. Но при пильной наукі и постановлению родителей им удалося провести любимого сына через высшы университетскы школы и дати му образование.

День 23 сентября 1962 року был дуже счастливым так для самого Ивана, як и його родителей и сестры Ольгы. Иван окончил Торонтонский университет, но слідує упомнути, што от молодых роков он посіщал школу русского языка, брал участь в музыкальной и танцорокой группах при Карпаторусском Обществі в Торонто, где активно враз зо свойом сестром принимал участие. Молодый инженер-техник Иван Бортняк, бесідує чисто лемковскым языком так, што никто бы не повірил, што он в Канаді рожденый и николи родного краю своих родичов не виділ.

Отец молодого ученого Михаил Бортняк походит зо села Высовы, Горлидкого повіта на Лемковині, а жена Ольга из села Білична, Грибовского повіта. Михаил прибыл до Канады в 1927 року, а скоро за ним прибыла до Канады и його жена, из роду Избянскых. Осем роков прожили в Едомнтоні, провинции Альберта, где Михаил працувал на желізной дорогі. Но суровый климат загрожал здоровью жены, и они переселилися на восток Канады до Торонто, Онт., где родилися и воспиталися их діти, и где проживают в теперішный час. Бортнякы, то нашы сознательны краяне, члены и предплатникы нашой народной газеты “К. Русь” от самых початков. Молодому ученому лемку Ивану Бортняк и його родині жичиме світлой будучности, бо своим трудом и усилиями они заслужили собі на то.

Ваньо Феціца,
Торонто, Онт.


СОНЯ НОВАК
Sonia Novak

Соня Новак, дочка Максима и Анны Новак, жиющых в Юнкерс, Н. Й., минувшого року окончила Линкольн средню школу с успіхом и надгородами. Будучи в школі, она принимала участие в ріжнородной активности, до котрой мают можность и доступ всі студенты. Соня не ждала заохочення от учителей, а сама голосилася в дівочы группы, где єй за способность и выконание принятых на себе задач — вынагороджено тым, што она была выберана в правление ріжных спортивных и розслідчых групп.

С новым школьным роком Соня поступила на высшы наукы в Латино Американском Институті в Нью Йорку місті, где она специализуєся в бизнесовом руководстві.

Родиче Соні сут активными членами Лемко-Союза за весь час свого житья в Америкі. В теперішный час отец Соні Максим Новак занимат высокий уряд при нашом Карпаторусском Американском Центрі в Юнкерс, Н. Й.

Соня єст членкиньом молодежного Лемко-Клуба и активно участвує в його роботах.



ДОРА ПЕТРИШИН
Dora Petrishin

Дора Петришин издала успішны екзамены минувшого року из Юнкерс средньой школы, где она получила признание єдной из самых передовых учениц в той институции.

Дора отзначилася в школі великом активностью в найбольше популярных группах, котры организуются при школах для лучшого розвития знания и характера школьной молодежы. Она тоже належала до т. зв. Пресижен Танцорской группы и до Генеральной Организации, не вымінюючы мкогы другы.

По окончению школы в Юнкерс Дора поступила в штатный Нью Йоркский Университет в Нью Палтс. Дора выбрала дивну, як на дівчину профессию — математику.

Отец Доры Петро Петрцшин, єден из акитвных членов Лемко-Союза и Карпаторусского Американского Центра в Юнкерс. Лем рок тому он был предсідательом містного отділа Л. С. в Юнкерс, а в Центрі являтся урядником барже безперерывно на ріжных позициях.



ИВАН НЕСТОР
John Nestor

Иван Нестор из Торонто в Канаді окончил Торонтонский Университет в 1961 року.

Молодый Иван, будучи сыном карпаторусскых родителей из Лемковины, от дітинства находил своє любиме занятие — музыку при карпаторусском клубі в Торонто, где кромі того изучал русский язык, котрый, як он признає, потом по великой мірі придавался му в университетскых студиях.

В 1955 року Иван окончил Паркдейл средню школу, где был передовым учеником. За получену надгороду доброй наукы поступил до университета в Торонто, а в 1959 року уже получил диплом БА. Сс. по инженерству и физикі. При том он получил нову грошеву надгороду школаршип и поступил на найвысшу ступень бизнесовой администрации. Он получил степень М. Б. А. при успішных испытах в 1961 року.

Счастливы родиче походят, отец из села Лупков, Лісского повіта, а мати Олена из Русской Ропицы. Иван працує теперь на высоком посту для Индустриального Банка Компаниию в Торонто.



АНДРЕЙ ЦИСЛЯК
AndrewChislak

Андрей Цисляк, сын Николая и Марии Цисляков, окончил Линкольн средню школу минувшого року с добрым успіхом и поступил на высшы студии в Фарлей-Дикенсон университеті в Рутерфорд, Нью Джерзи штат. Перший рок начальной наукы Андрей окончил в Нью Йорку, Леникс Гилл, а окончил єй в Тремонт в Кливланді, Огайо, где начал посіщати средню школу Линкольн, но потом перешол до Юнкерс и попал в школу того самого имени. Ту в перший день был удивлений, коли профессоры лемкы, увидівшы його знане им имя, звідалися го, ци он єст лемко?

В Фарлей-Дикинсон университеті, где, здаєся, єст найбольше число нашых лемковскых дітей на наукі, Андрей специализуєся в коммерсии, то єст управление предприятиями.

Андрей родился в Нью Йорку 27 октября 1943 року. Отец Андрея Николай, родом по мамі Габор, из Устья Русского, Горлицкого повіта, на Лемковині, а мати Мария, роджена в Бруклині от отца Павла Хованец из Высовы, того самого повіта и мамы Анны Цомпель (теперь Буранич) зо села Ставишы, Грибовского повіта.

Андрей єст членом Карпаторусского Американского Центра от дня свого крещения. Он выступал с маленька в танцорскых и театральных кружках, а теперь являтся членом и предсідательом молодожного клуба Лемко-Союза в Лемко-Парку.




[BACK]