Наша Лемковщина — Иван Русенко
Нашы діды прадіды
Засвоили нам Карпаты,
Вытычили половины
Построили власны хаты.

Землю матку заорали,
Каменисту, планну рілю,
Же так гарді выглядала,
Як чорнозем на Поділю.

Але у нас задолга зима,
Весна пізна, зимный климат,
То пшениця ся не вродит,
Бо морозу не вытримат.

Зато вівса и компери,
(Ту их зовут “бараболі”)
На адзимку, кыселицю —
Люде мали все доволі.

Замножили вівці, козы,
Звычайно и грубистый статок,
Змайстрували плугы, возы
И створили сой достаток.

Годували и пацята,
Кролі, качкы, куры, гуси,
Тай зажили своим житьом,
На свойой Лемковской Руси.

Нашы предкы тверды люде,
Руснаками ся назвали;
И звычайно русскы назвы
Своим селам надавали.

Устья Русске, Русска Воля,
Руска, реку, Яблониця,
И Дубрівка и Свіржова,
Та и Русская Ропиця.

Розмістили свои села
Меж лісами и борами,
В низу хаты окружены
Зелеными кычерами.

Який ліс выкорчували
Так и село называли,
Смерековец, Граб, Ліщины,
Берест, Дубне, вільшня, Ялин.

Нашы діды и прадіды
Вміли собі раду дати,
Власным умом и розумом
Засвоили сой Карпаты.

Заселили Лемківщину
И культуру в ней створили —
Застали ту лем цілину,
А добробыт нам лишили.

Иван Русенко.


[BACK]