Село Мысцова на Лемковщині, повіт Кросно, належало до великых сел, як на горскы условия. Оно складалося из около 300 фамилий, в котрых переважно было по 7 до 10 душ. Так было перед I и перед II Світовыми войнами. Як солидным было село Мысцова, можна судити и по той фотографии из торжества коло церкви. В тоты часы, як тота фотография (поміщена при тых рядках) была брана настоятельом, был уже покойный теперь священник о. Владимир Дуркот. Он был добрым парохом, бо прослужил у нас 22 рокы. У мене ніт точной истории, коли село было основане, но село старе, добрі уфундоване и ніт найменьшого сомніния, што оно пережило своє 500 до 600-літие. Перша церковь маленька, котра даколи была в Мысцові, была выбудована сокирами з дерева, то єст тота стара звоница. Нова звоница была будована аж позднійше, а вызерат так, як показана на той фотографии с 1903 року. Фотографию сохранил настоятель, котрый был в Мысцові ище перед о. Дуркотом, о Давидович. Он єй затримал при собі в селі Тартакові в Восточной Галичині, або теперь Зап. Украині, где он был на парафии. Она сохранилася в добром порядку и минувшого року была прислана до Совітского Союза для поміщення в нашом Календарю Л. С. Вынашол єй и прислал єден Мысцовян, што жиє на переселению на Украйні в місті Калуші — Антоний Сысак.
Он просит помістити в календарю тоту фотографию, штобы краяне, котры жиют в Соєдиненных Штатах и Канаді припомнули собі, якым славным и сильным было даколи их родне село Мысцова, як там газдували и торжествовали их предкы. Он хоче тоже дати до відома, што в часі остатной світовой войны в той святыні нашых отцов тримали коней и перемінили єй на стайню. По войні церков єст обернута на римократолицкий костел, бо нашых лемковскых людей там неє, єдны сут на Украині, а другы на западных землях Польшы. Пару фамилий лемковскых жиє в Мысцові, но до костела не ходят, лем в часі надзвычайной потребы мусят идти. Село єст заселене польскыми осадниками, котры потратили свои маєткы в воєнны часы. Настал конец жителям и потомкам того села лемкам в повоєнном часі.
Иван Мосир,
Ст. Луис, Мо. |