LemkoPark63
Здравница Лемко-Парка для Народа

Около 30 роков тому назад, коли завязалася наша организация Лемко-Союз, никто не мог предвидіти, в яком напрямі розвиєся тота организация и што она завершит за такий протяг часу так, як и теперь никто не може предвидіти, в яком напрямі розвернеся єй діятельность и чого довершит в слідуючых тридцети роках. Но єсли приняти под увагу тоты діла, якы Лемко-Союз завершил за першых тридцет літ, то його діятельность и його судьбу не можна собі так легковажити, як то было даколи.

Правда, што в свойом членстві Лемко-Союз, не велике удивление, ани не подниматся, ани не подупадат, так як бы стоял на єдном місци. Але то єст лем, так бы сказати, явление на вид. Бо хоц сам Лемко-Союз нема на списку свого членства больше членов, но його членами так бы повісти неформально на першом місци являются читатели його органа газеты “Карпатска Русь” и даже єй приятели, котры по даякых причинах лем вкупі с другыми читают єй, потом идут члены клубов в отдільных місцевостях, бо так або иначе, они поддержуют Лемко-Союз, дальше идут члены нашого КРА Центра, бо не вшиткы они сут членами Лемко-Союза. Но найбольшу часть приятелей ку Лемко-Союзу пригорнулося через покупку Американского Лемко-Парка. В Парку добра половина членов-ширгольдеров єст такых, котры ани николи не читали нашой газеты, ани не думали николи быти членами Лемко-Союза. И правда, они не сут членами Лемко-Союза, але сут до сполкы членами такой институции, котру породил Лемко-Союз, и котром он сам єст членом. Так быти може, што и ліпше, коли люде сут членами отдільных институций, бо каждый собі выбрал таку, в котрой може больше роботы зробити, и больше причинитися до народного розвития. А то єст то, чого желат собі Лемко-Союз и для чого он был основаный.

В самых початках организации Лемко-Союза было больше заинтересование в помочи культурной, економичной и политичной своим членам. Не всі тоты ціли успішно выполнилися, єдны выполнялися точнійше, на другы зверталося меньше увагы. То водилося не зато, штобы занедбувалося даяку ціль Устава Л. С., а зато, што того вымагали обставины, и мушено было робити важнійшу роботу перше.



LemkoPark2
Американский Лемко-Парк — 1962. Гра молодежы в бейсболл. Там сут поля, приготовлены и для всякой другой гры молодежы и старшых на літо.


В тоты часы, тридцет роков тому, нас в народной организации найперше зганяла потреба от осамотнения. Нашы емигранты нашлися на тотальной чужині, где не лем язык, но и обычаи были чужы. Люде силом волі тяглися в такы организации, котры были им близкы по бесіді, традиции, а навет по краянском походжиню, єсли там дакто был с их села або сусідного. Помагали тогды до организации наганяти и трудны економичны условия. Як знаме, нашы заморены державы попали в продолжительну кризу. Єдны мали слабы роботы, другы не мали, третьи боялися о утрату своих. Біда зганяла вшиткых до купы.

Помагати економично организация никому не могла, бо сама была в початковой стадии, то єй треба было помагати, штобы єй утримати.



LemkoPark3
Американский Лемко-Парк — 1962. Русский балалаєчный оркестр из Саут Брук, Н. Дж., дає культурне выступление. Подобны выступления в Лемко-Парку можна зауважити часто.


Утримати тых людей в купі, мушено было проводити отповідну до своих часов политику, тримати членов на ногах и поготовью. Прогрессивне движение, котре в тоты часы мало своє значение и в поправкі економичной стороны житья, бо то приятелило нашых меньше сознательных людей с юниями, о котрых правду они познавали и не лем по приятельскы к ним относилися, но к вступляли в них и добивалися постоянного уліпшения свого економичного положения.

Но тоты часы змінилися, многы заокны, што до крайной беззаконности были змінены законами, и думати о организации в том сенсі, який мы памятаме было бы наивно, по дітинскы.

Меже тым, за тридцет роков, мы уж не такыми великыми и необразоваными чуженцями, як мы тогды были. Днеска люде читают всі без выбору своє, ци американске. Правда, и в своих газетах и в американекых єст дуже политичной неправды, но так, як каждый отдільно пережил добре и зле, то каждый научился розуміти то, што читат и отділяти правду от зла и пустой пропаганды. Днеска маме до роботы с людьми иншого понятия, як тридцет роков тому назад.

До того треба додати, што в образ нашого житья вошла ту в Америкі рождена молодежь. Днеска организацийе житья треба так наставляти, штобы наша организация хоц лем частично являлася потребном обом сторонам и вязала их общыми интересами.



LemkoPark4
Американский Лемко-Парк — 1962. Купальне Озеро. Озеро окружене лісом.


Для связи общыми интересами старой емиграции с молодежом в далекых початках организации мы отчули потребу и глядали єй. Были пороблены всякы начинания, выдавался журнал на английском языку, побудувался Центер, организовалося школы родного языка, выдавалося безпроцентны пожичкы біднійшым студентам. Всі тоты начинания мали своє значение в свой час, и никто не зна, яке они ище можут мати, но уж о стало ясно, што загального заинтересования народном оргаиизациом не удалося вызвати.

Идея покупкы фармы, так само зародилася в блиізкых початках организации, но то на практикі выглядало тане далеке, як царство небесне, и в нашом финансовом положению не можливе. Памятаме, што уж поверх 15 роков тому на съіздах Лемко-Союза за фарму говорили на каждом с них выберался комитет, котрый мал приготовити планы для покупкы и найти єй. От съізда на съізд, хоц комитеты мінялися, коли пришлося сдати справоздание они безнадійно розводили руками, ходили, смотріли, не нашли, и не далося зробити.

Но благодаря активному комитету, и розвязавшойся полемикі меже членами, розгоряченой до червена, четырі рокы тому назад діло покупки фармы, то єст днешного Американского Лемко-Парка было завершено. Оно выглядат дивным и не віроятным, и многы не погодятся на то ище за слідуючых десят роков, но правдом остане, же подвиг на покупку Лемко-Парка запричинила, як раз тота полемика. Она была горька обом сторонам, но створила полезный результат для цілого нашого народа.

Як раз Лемко-Парк явился предметом, котрым найбольше поинтересовалася и наша молодежь. Николи попередно мы ке виділи при нас столько молодежы, як теперь, и она помалы, але постоянно приходит. Надіємеся, што часть страченого нам ище удастся привернути для того, штобы мати близке родинне огнище в той нашой новой отчині.

Бо што отностся до старшых, то котры дожили, то дождалися того, што можут мати родинно теплу “ватру” в кругу свого народа. И тоты розумнійшы уж скорыстали с того. Треба буде старатися, штобы зробити про них больше місця и приступнійшого, штобы и тоты найбіднійшы могли на старость порадуватися своим житьом.



LemkoPark5
Американский Лемко-Парк — 1962. Гра молодежи в бейсболл, барже кажду неділю.


Но не треба забыти поширити и зробити Лемко-Парк приступнійшым для молодежы. То єст дуже важне, то єст важнійте, бо то наша заміна, наше будуще. Без молодежы, то так, як без будучности.

Кромі того Лемко-Парк треба так розбудувати, штобы он был придатный для всього нашого народа, штобы он отображал всі його интересы и стал духовным и культурным його центром.

Четырі рокы тому назад, ище перед покупком Парка, на съізді Лемко-Союза в Юнкерс, было рішено выпустити два тысячи шеров по сто долларов для роспродажы меже нашым народом в ціли покупкы Лемко-Парка. Тоту роскупку шеров мы будеме называти чудом, бо тоту квоту мы выполнили в четырьох роках и минувшой осени в ноябрі, послі рончого собрания шергольдеров Лемко-Парка, остатных 12 шеров из тых 2 тысячов было продано во Флориду.



LemkoPark6
Американский Лемко-Парк 1962. — на Лемко Озері в часі вакаций.


Лемко-Парк выходит сам на свою дорогу и мы віриме, што при добром менажері, при директорах з емигрантов и молодого поколіния Парк выйде на свою дорогу и выполнит єдну из найважнійшых задач и цілей, яку мы всі жадали и яку мы поставили перед собом.

Уж теперь признательность дают не лем тоты, што были в ньом и виділи його, но и тоты из-за океана, як приімром, нашы молоды учены лемкы зо Львова, котры писали при конци декабря до нашой “Карпатской Руси”. Они писали, што “Ваш Леміко-Парк єст не лем народном лемковском здравницом, он єст маленьком частью дорогой нам Лемковины.



LemkoPark7
Американский Лемко-Парк — 1962. Молодежне предприятие послі рочного собрания их отділа. Церемониальна присяга уряда.




[BACK]