Лемковскы Весільна Спiванкы — Anna Koban

Я, Анна Кобан, походжу зо села Черемха, Сяноцкого повіта. Село Черемху можна назвати несчастливым селом, бо як в Першу Світову войну, так и в Другу Світову войну было спалене до нащады. По Першой войні якоси ся люде позмагали на обытель и побудувалися и ледво ся отрясли от пожичок и долгов, пришла Друга Світова война и знова то само, ище горше несчастья постигло наше село и людей. Село спалили німцы, а людей выгнали. Украинскы, выплеканы німцами банды, помогли польскым шовинистам выселити остатных жителей в 1947 року, перед самыми жнивами и всьо мусіли оставити нашы черемшане. Полякы зогнали с 8 сел людей до Вороблика, нагнали, як худобу до муров. Даху не было над головами, лем стіны стояли в гарбарни, где перед войном вырабляли шкуры на обувь. Там народ стоял 6 неділь, чекал на транспорт. То были люде зо сел: Черемха, Липовец, Дальова, Шкляры, Зындранова, Тылява, Мшанна и Завадка.

Я мала письмо от свойого брата Стефана Магалы. Письмо было писане в той гарбарні, и 6 неділь юж там стояли, чекали на транспорт. Всі пішли коло Львова. Мои єдносельчане из Черемхы лем 4 фамелий пішли на заход, на польскы земли.

В нашом селі неє ани єдного газды. Церковь не была спалена, то полякы розобрали и деси на Далівскых горах побудували овчарню-кошар на овці.

Я выіхала в Америку в 1923 року с причины недостатков, як и соткы нашых лемков. С єдным я была счастлива, же єм могла ся до Америкы достати, бо я была рождена в Америкі. Треба было оставляти свою маму, братов и родину, нашу дорогу Лемковину. То не было легко. Хоц як там мы жили бідно, и не роскошували, але было весело, хоц як мы робили тяжко. Часом и недоідали, бо были так званы — до новинкы — бракувало поживы, але люде были здоровы, веселы. Нераз пригадуют ся мі и теперь тоты веселы часы. В Великодны свята, Русаля, Святого Петра и Павла, або пастухы ся складали на палюнку. Маткы Біжой мы чекали, бо юж все ктоси ся женил на тото свято. На Покровы у нас был кермеш. В зимі ходили на вечеркы с куделями, в Рождественском пості. По Рожденственскых святах зас зме чекали дачыйого весіля. А найбарже мі запамяталися лемковскы співанкы весільны и зато я постановила позберати докупы весільны лемковскы співанкы, найвеце зо Сяноцкого повіта, бо наше село Черемха и село Липовед барз ся ставили зо своима свашками.

У мене єст дуже и другых співанок. Я на том роблю юж 5 роков. Списувала-м сама и писала-м до краю до свойой родины и до знайомых до краю, то и они мі помогли, што я не могла припомнути собі даякы співанкы. Дуже нашых людей вспоминают, што треба бы издати книжку с лемковскыма співанками, то може даколи буде тота книжка и по нашой смерти дакто возме, обдує от пороху книжечку, прочитат, припомне собі миле веселе житья нашых людей на родной нам милой Лемковщині.


Анна Кобан,
з роду Магала.
Rd. No. 2, Box 243
Hibiscus Park
Stuart, Fla.



[BACK]