История Лемковщины до 1914 Року — Антоний Драбяк
Борислав, УССР.

Дорогой Редакции Карпаторусского Календаря Лемко-Союза:

22-го мая выслал я на Ваш адрес коротку историю Лемковщины. Достал я єй у нашого краяна-лемка, переселенця в Совітский Союз С. К., из Лосья, котру он собі переписал. Он знову достал єй от свого єдносельчана Т. М., зо Львова, и передал єй другим краянам для переписи на памятку своим внукам и правнукам о нашой дорогой нам отчизні Лемковині, котра днеска, як довідуємеся нищится в безпорядках, дичиє. Тоту историю переписали собі соткы краянов и она иде переписуючися дальше.

Кто тоту историю написал, никто не зна. Но она єст написана точно и правдиво, без всякых суперечностей.

При переписованию для Вас я старался скоротити єй, а місцями додал свои запримічания, особливо в отділению о збойництві на Лемковщині, што я знал из устного оповідания, котре єст правдиве.

Позатым, в Талергофском отділению я запримітил, што найбольше мучеников Талергофа было из нашого Новосандецкого повіта завдяки лютому тогдашньому старості, графови Лось, котрый ненавиділ лемковскых патриотов, и пару зажертых ненавистников лемковского народа украинскых самостійницкых ксьондзов и учителей. Из самого нашого села Поворозник было вывезено в Талергоф и Терезин 29 невинных селян, меже ними был и мой няньо, котрый помер в Талергофі в 1916 року. Полиция, як мі потом писали и оповідали, глядала и мене, але я уж был на фронті, а в 1915 року на весні попал до русского пліну и аж в 1919 року и повернул домів.

Мы чули, што у Вас єст написана история Лемковины в подробностях и аж до нашых дней. Но коли Вы єй напечатате и ци она дойде до нас, невідомо. Зато нашы люде на выселению старанно переписуют тоту историю свойой отчизны, котра коротка и не так трудна до переписаня.

А. Драбяк.


ГРАНИЦІ И ТЕРРИТОРИЯ

На территории полудневой части Польшы и полночной части Чехословакии по обох сторонах Карпатскых гор, меже ріками Сяном и Ужом на всході, а Попрадом на заході от давной зори истории Славянщины жил горский народ, названый теперь Лемками. Площу землі, заселену тым народом зовут Лемковщином. Єст то долга и узка горска полоса заходных Карпат, от котрых приняла свою форму Лемковщина, розділена в теперішный час политично на дві части. Полночна часть приналежит Польші, а полудньова Чехословакии. Меже обома частями границю становит ламана линия, яка проходит верхами гор.

Территория Лемковщины, приблизно, ровнатся 10,000 км., а населения числит около 500,000 душ. В середньому на каждый км. припадат 50 душ.

Полночна часть Лемковщины, росположенной на территории Польшы, складатся зо семох повітов, а именно входят ту повіты Новоторский, Новосандецкий, Горлицкий, Ясельский, Кроснянский, Сяноцкий и Лісский.

Єй погранична границя от заходньой стороны меже польскым и лемковскым населением проходит от Щавниці через Ганушов, Барвінец в напрямі до Камениці и повертатся на всход. Полночна граница провадит верхами гор Карпатскых и Королевы Русской меже Пташковом и Білцаровом, Кинцльовом и Флоринком, а потом тягнеся полудневом частью річкы Ропы через Шимбарк, Цеклин, Жмігород, Дуклю, Вороблик, Грабовницю до рікы Сяну. Послі того границю становит Сян и ріка Уж, яка плыве через Ужгород. За том границьом остаются ище на территории Польшы два малы островкы лемковскых сел, єдна в Новоторском повіті зо селами: Шляхтова, Явіркы, Біла Вода, и Чорна Вода. Другий в Кроснянском повіті зо селами: Ванівкы, Чорнорікы, Красна, Ріпник, Петруша Воля, Бонарівка, Бережка и Близинка и Опарівка.

Гдекотры етнографы, як Иван Прислопский в свойой историчной книжкі “Сандеіцкая Русь”, проф. Др. Михаил Ладижинский в книжкі под титулом “Сянок и його окрестность” и проф. Др. Тит Мишковский в статьі “Полуднево-заходня етнографична границя Галицкой Руси, твердят, што етнографична граница Лемковщикы на полноч доходила просто до міст: Новый Санч, Грибов, Кросно и Ряшов. Полуднева границя Лемковщины совпадат с политичном границом Чехословакии и Польшы. Для ліпшой орьентации читателя подаєме ниже карту Лемковщины.


КАРТА ЛЕМКОВЩИНЫ

Лемковщина в Польші тягнеся меже ріками Сяном на всході, над котрым лежат місцевости: Городок, Сальное, Бібрка, Мишковці, Динів и Попрадом на заході, над котрым лежат: Лєлюхов, Мушина, Милик, Андриівка, Жегестов и Пивнична. Меже Попрадом и Дунайцом находятся села: Біла Вода, Чорна Вода, Явіркы и Щавниця. Півничну границю Лемковщины можна приняти от Яворины через Дынів, Стражнів, Ясло, Горлиці, Грибов и Новый Санч. Полудневу границю можна числити от місцевости Кадди через Лупков, Черемху, Барвінок, Радоцину и Лєлюхов.


ДОРОГЫ, ПЕРЕВАЛЫ, РІКЫ И СЕЛА

Лемковщина лежит в самых горах Карпатах, через котры проходят перевалы только из полночы на полудне. Дорогы проводят в заходно-всходньом направлению и тому в коммуникации бывают трудности.

Полночный скат заходных Карпат пересікают рікы: Попрад, Камениця, Біла, Ропа, Вислока, Ясьонка, Ослява, што вытікают из Карпат и плывут на полноч. Вдоль тых рік тягнутся дорогы, котры ідут з полночы в Карпаты и перетинают их хребты в місцевостях: Тылич, Конечна, Граб Барвінок, Черемха и Пупков.

В глубокых ярах, котловинах и далекых рік розмістилися лемковскы села и місточка.


КРАСОТА ГОР И ЖИТЬЯ ЛЕМКОВ

Лемковщина, то єдна из красшых участков Европы. Она покрыта буйными лісами, где роснут ялиці, смерекы, сосны, букы и др. Воздух чистый и здоровый. В давных часах, коли было меньше населения, лемкы чулися больше здоровыми и жили долго. С часом, коли побольшалося, а паны отобрали у них ліс, поле и полонины, на якых выпасали стада скота, они уже не могли прокормитися на позоставленых им кусках неурожайной землі, почували себе горше и стали голодувати. От голоду спасла их показавшася в тот час картофля, в горах дуже смачна, а пізнійше массова емиграция в Америку.


ГОСПОДАРСТВО И ЖИВНОСТЬ

Землі у лемков было дуже мало. Вдодатку была она слабо урожайна и без одобрения навозом не давала плоду. Головным продуктом той землі была картофля, подекус капуста и овес и то часами такий марный, што трудно было його выкосити.

Не каждый господар мог собі купити коня. На то могли позволити собі только богаты господаре села.

Поле обрабляли, переважно, коровами, из-за чого слабо они доілися и молока в хаті было дуже мало. Основним кормом для лемка была картофля и овсяный хліб. На пшеничний хліб або кусок мяса Лемка не было стати. Такы продукты куплял лем на великы свята, як Різдво и Великден, або як справлял дома гостину.

По Першой Світовой войні была закрыта емиграция в Америку, а людей прибывало щто раз більше, тому Лемкы были змушены ділити поля помеж своих дітей, што стало причином ище більшого зхудоженя.


БОГАТСТВА ЗЕМЛІ

Лемковскы землі — убогы для урожаю хліба, але природа дала им другы великы богатства, зокрема: прекрасны лісы, пасовиска и минеральны воды. На жаль тоты богатства не належали Лемкам, но были власностью панов або державы. Лемкы были для них робочом силом.

Лемковскы горы мают дуже богато курортных місцевостей з мінеральными водами. В цілом світі знаны такы здравницы, як Крыниця, Жегестов, Щавниця, Рыманов, Ивонич, Высова, Мушина, Вапенне и богато иншых. Сама найважнійша, то Крыниця, названа королевом здравниц. На том місци, где теперь знаходится курорт Крыниця, не так дуже давно было пасовиско и поле, яке належало до русского приходства в Крыници.


НЕСПРАВЕДЛИВЫЙ ПОДІЛ

Найбольшым несчастьом для лемков было то обстоятельство, што их отчизна не представляла собом єдной политичной цілости, а была розділена на части, якы входили в склад ріжных держав. По упадку Галицко-Русского княжества, Лемковщина роспалася на дві части: єдну прилучено до Венгрии, а другу до Польщы. Послі Першой Світовой войны, Польща задержала галицку част а угорщина была змушена одказатися от угорской части Лемковщины в корыст Чехо-словакии.

В таком положению Лемковщина знаходилася до остатных часов. Так на єдной, як и на другой стороні, Лемковщина не мала своих районов, центров, округов. Обі половины были розділены, як национальна меньшость меже польскыми и словацкыми администрациями. Больше 350,000 лемков в Польші было включеных при выборах в сейм на парламент в состав польскых повітов. Так само робилося и на другой стороні Карпат. На Лемковщині рахуєся больше, як 700 сел, в том числі міста, як Сянок и Крыниця около 10 малых міст, як Тылич, Лабова, Устье-Русске, Дукля, Рыманов, Буковско, Балиград, Пушков, Ціска и Ліско.


НАРОДНОСТЬ

Лемкы в национальном отношению принадлежат к великой славно-русской родині. Имя “Русь” было для них всегда святым и славянска идея глубоко вкоренилася в их серцах. Длятого они всегда жили в дружбі зо всіми славянскыми народами, зато Германия уважала найбольшым своим ворогом. Сами называли себе русскыми, руснаками, лемками. До послідных часов не приняли ище нового названия “украинец” для означения свойой народности. Остатным часом старанося змінити их дотыхчасову политичну орьентацию на нову, яка выходила из Берлина и Відня и ширена тоже была польскыми учеными и графами (прим. гр. Мих. Бобжинский, гр. Лось) и украинскыми политиками, якы оставали на услугах Бісмарковской политикы.

Учены ділят мешканцов Карпат на три группы: лемков, бойков и гуцулов по причині их етнографичных и языковых властивостей, а территория, на якой замешкуют, споконвіков называтся — Карпатска Русь. Лемкы сут частьом Карпатской Руси. Языкова ріжниця между тыми трьома группами етничными єст дуже велика, так, же порозуміти єдны другых приходится нераз дост трудно. Иначи, хотя бы серед самых лемков, — говорят в околици Сянока, иначи в околицях Крыниці, а ище инакше в околиці Бардийова на Словакии. По бесіді лемка можна познати, з якого он походит повіту, а часом навет, з якого села.

Характерно, што маленький народ на протягу полтора тысяча роков свого иснувания в Карпатах не змог вытворити єдного языка и злитися в єдну цілость.


ПРИЧИНЫ ЯЗЫКОВОЙ ОСОБЛИВОСТИ

Головном причином отособленности лемковской бесіды єст географичне положение и история Лемковщины. Лемко рідко коли встрічался зо своим братом, котрый мешкал на всході от рікы Сяну або от рікы Уж. Жебы достатися до нього, треба было переходити щиты высокых гор, або зыйти на долину и долином итти на всход, а потом знова спинатися в горы. Власне географичне положение было перешкодом, абы карпатский народ русинов злился в єдну цілость з заходу на всход, або наоборот зо всходу на заход. Лемкы затримали у себе много слов иншых славянскых народов. Удар-акцент бесіды у лемков подобный, як и в польском языку, т. є. на другому складі от конца. Лемка розуміє майже каждый славянин, а лемко каждого славянина.


ХАРАКТЕРИСТИКА ЛЕМКОВ

Лемкы — народ працовитый, старанный, ощадный, терпеливый, честный и спокойный. Його загальны характерны прикметы выявляются в том, што он народ твердый, сильный и терпераментный, тримат сильну связь з родном отцовщином и религийом. Любит свои горы и полонины, при чым консервативный в обычаях, не довірят чужым. У него высоко розвите чувство чести и справедливости.

Лемко, то тип первобытного славянина о стойком характері.


ПОЧАТКЫ ИСТОРИИ

История лемков така, як и история другых мешканцов Карпат. Почалася вольным пастушым житьом. С початку лемкы занималися выпасом стада худобы и овец. О том свідчат иснуючы ище до днеска такы назвы, як бача, югас, кошар, шалас, ватра и др. Першы мешканці Карпатскых гор дійствительно выпасали стада худобы и овец, як вольны люде на вольных горах. О том пишут всі серьозны историкы.

Карпаты с их лісами и полонинами не належали ище до никого, лем до тых пастухов-бачов и югасов, якы зо своими стадами переходили з місця на місце. Початково людей было мало, то и сел не было много. Сельскы забудувания строилися, переважно, только для перезимувания худобы и людей. На літо в тых будовлях зоставали лем стары жены и діти, а всі другы ишли до гор на полонины, абы там пасти худобу и приготувати для ней пашу на зиму. Рольництвом майже зовсім не занималися. Збіже сіяли на т. зв. кошарисках або спаленисках в дуже малом розмірі, так только, штобы мати хліб до мяса.


ПЕРШЫ НАЗВЫ

В тых часах не иснувала ище назва “Русь”. Для отріжнения себе от иншых, мешканці Карпат называли себе словянами. В Карпатах до VІІ віка жило славянске племя хорватов. Оно занимало территорию от Вислы до Дністра, самы Карпаты, Подкарпатье и теперішню всходню Словакию. Часть тых хорватов перешла через Дунай в нынішню Хорватию, где затримала свою назву хорватов. Гдекотры учены лучат назвы хорваты и карпатороссы, як єден народ до себе похожий.


ПОЧАТОК НАЗВЫ РУСЬ

О хорватах, што остали в Карпатах, старо-историчны жерела згадуют до конца десятого віка. В русской хроникі из 992 року говорится о поході Києвского князя Владимира в край хорватов в Карпатах. С того часу назва хорваты в Карпатах ищезат, на томіст повстає назва Русь, русская земля. Позаяк Карпаты и прикарпатскы землі приєднано до Києвской Руси, тым самым и Карпатскы славяне злучилися с Києвском Русью, стратили свои племенны назвы, а приняли спольну назву Русь. Потомками хорватов сут тоже лемкы, котры жили найдальше на заход от Києвской Руси в глубокых и мало доступных горах. Они не поддалися ниякому змішанию с другыми племенами. О том свідчит лемковска бесіда, яка зо всіх славянскых языков єст найбольше подобна до юго-славянско-хорватского языка. Тым доказуєся, же лемковска бесіда єст легко зрозуміла для полудневых славян, легша, як язык украинский, польский, чешский або и словацкий.

Перед нападами дикых орд из Азии, часто ховалися в Карпатах біженці из Києвской Руси, але лем в сходных Карпатах, яко больше доступных. Натоміст до Карпат заходных меже лемков не приходили такы люде. Из того тоже выходит, што коли всходня Карпатска Русь, так под взглядом языка, як и што до характеру народу сталася подобном до Києвской Руси — теперішньой Украины, то Лемковщина, як дальше географично отдалена, в меньшой мірі подлягала вплывам Києвской державы и заховала свою родну бесіду и характер далеко больше, чым бойкы и гуцулы.

Лемкы завсегда стояли на становиску объєдинения зо всходными братьями и все придержувалися дорогой им назвы Русь.

Тота одстоятельность має свои основы в истории.


РЕЛИГИЯ

Хорваты в Карпатах были поганами. Они приняли віру Христову в всходно-византийском обряді на 100 роков перше от Києвской Руси. Приняли єй от грецкых миссионеров св. Кирилла и Мефтодия, котры проповідали християнску віру по византийскому православному обряду и написали для славян церковно-славянске письмо в Велико-Моравском Княжестві. Лемкы належали тогды до той Моравской державы, єднак Велико-Моравске Княжество сказалося слабым, штобы оборонити християнску віру всходнього обряду и грецку цивилизацию перед римско-німецкым напором. Німецке духовенство и німецкы правители знищили всходный обряд у чехов, моравян и словаков. Он затримался у лемков, якы перебывали в глубокых Карпатскых горах. Столичным містом св. Методия, котрый голосил Христову віру среди словян был Велград на Моравах.

В першых початках лемкы подлягали юрисдикции велеградского епископа. Позднійше под сильным натиском німецкого духовенства перенесли свою администрацийну принадлежность до Кракова, який також был миссийным тереном св. Методия. Коли тоты народы обряду славянского не змогли вытримати напору франко-німецкых миссионеров, приняли латинский обряд. Лемковщина попала под юрисдикцию Києвского епископа, а позднійше от половины ХІ віку до Перемышльской епархии. Віра християнска всхіднього обряду часто приходила под назву “Віра русска”, а и до остатных часов среди лемків можна было чути слова “Єм русской віры”. Же лемкы на протягу тысячы роков затримали свой всходный обряд, завдячуют то лем свойой твердой вірі и своим горам. Лемкы мешкали давно в цілой теперішньой Словакии, а в Польші дальше на полноч от Карпат, но там не могли выдержати напору латинизации иншых переслідуваний, длятого мусіли уступати в горы. Притиснены капиталистичном Польшом и словаками, лемкы не упали на духу и осталися русскыми по нынішный час.


ФЕОДАЛИЗМ

Як уж попередно сказано, лемкы жили давно вольным пастырскым житьом, Лісы и полонины не дали на никого записати, приватной власности не было, длятого вшиткы жили спокойно и в приязни, без большых клопотов. Такий стан был ище за першых корольов польскых и венгерскых. Зміна наступила тогды, коли Польша и Угорщина зостали феодальными державами. В тот час польскы и угорскы королі оголосилися власниками вшиткой землі, яку не могли ище забрати другы державы. Тоту землю роздавали тым, на кым могли оперти свою силу и власть, в замін за вірну службу. Королі привластили собі также лісы и лемковскы полонины, штобы роздати их своим панам. Знову панове заміняли до тых часов вольных людей в своих нанщизняных хлопів, котры мали на них робити. Поневолены люде были змушены працувати на пана, бо вся земля и лісы належали до панов. Як кто хотіл пасти худобу на той панской землі або посіяти для себе збіже, был змушеный просити о то пана, а за уживане поле мусіл платити.

Позднійше панове через своих солтысов осаджали людей-кметов на землі, закладали села, давали землю, але тота земля дальше належала до пана, а хлоп за єй ужиткование мусіл отрабляти паньщину.


ЗАКЛАДАНИЯ СЕЛ И МІСТ

В лемковскы горы панщизна пришла найпізнійше зо всіх европейскых крайов. Коли польский король Казимир занял в 1340 року Галицку Русь, т. зв. “Червенскы городы”, то Лемковщина была ище вольна от польскых и венгерскых панов. Панщина пришла так из полночы, як и с полудня постепенно, ровночасно зо закладаньом сел. Коли и где были закладаны села и отдаваны панам, показуют королевскы декреты. Наприклад, декрет короля Казимира из 1348 року говорит о заложению села Любуша. Село то было заложене в лісах, котры не были ище уживаны, т. є. рубаны. Инше польске село Липінкы закладано в 1418 року, так само в лісах.

О закладанию сел дальше в горах в тым часі не згадуєся ище ничого, што значит, же лемковска территория ище в ХV віку была недоступна для польскых панов, же народ жил там незалежно и вольно и был ище властником свойой землі, ліса и пасовиска.

Міста, як Сянок, Кросно, Біч, Горлиці, Грибов, Новый Санч, Мушина были в тых часах оборонными городищами на краю лісов.

Лемковщина не была ище поділена на дві части меже Польшом и Уграми, а народ жил вольно. Роспоряжувался не наказами німецкого права Магдебургского, але послі наказов стараго словянского права. В тых часах лемкы мали свои села, котры были их центрами торговельными и религийными. Туды приходили з гор на богослужения до церкви и ярмаркы, але так тых сел было мало, при чому и были от себе дуже отдалены. Такым єдным центральным селом при дорозі, што провадила з Галичины на Угорщину, был Тылич. Другым такым центром был Бардийов. В русской хроникі містится нотатка, же в 1247 року подорожувал до Венгер через Тылич и Бардийов князь Галицкой Руси Данило.


ПАНЩИНА

С початку, што уж высше вспомнено — Карпатска земля была вольна и не належала ани до князя Галицкого, ани до короля польского, ни венгерского. Але с часом польскы панове из полночы, а венгерскы с полудня наступили В горы и при помочи своих гайдуков поміщали на привлащены собі землі вольных лемков и примушали их, абы на тых землях робили на них.

В ХV віку польскы и венгерскы панове стрітилися в середині Лемковщины и установили собі границы меже своими державами. От того часу датуєся поділ Лемковщины на дві части, т. є. полудневу, котра належала до Венгер и полночну, што припала Польші.

Разом с панщизняным правом польскы и венгерскы паны разом с латинскым духовенством старалися накинути лемкам латинску религию. Але лекше было наложити на карк лемковскых людей панщизняне ярмо, як вырвати им то, што было для них найдорожше, т. є. обряд, с котрым была звязана их национальна культура, материнска бесіда и контакт зо Всходом. Помимо угнетения и переслідуваний, не удалося польскым панам и духовенству златинизовати массы народа. Також и по другой стороні Карпат, не удалося мадьярскым панам змадьяризовати русский народ. Меже лемками нашлися оборонці-мстителі, котрым бракло уж терпеливости и потрафили помститися на них за зроблену кривду народу.


НАРОДНЫ МСТИТЕЛІ

В Карпатах заховуєся много переданий о збуях-опришках, што нападали на панов и богачов и их нищили и рабували, а здобыте майно роздавали бідным и покривдженым. То не сут легенды, а щира правда. То были местникы из ХVІІ и ХVІІІ віку. Судовы акта польскых міст вздолж Карпат переполнены справами о тых збуях-мстителях. Их ловили, судили, забивали и вішали в Мушині, Новом Санчи, Грибові, Горлицах, Кросні и Сяноку.

Лемкы по днешный час памятают имена денекотрых народных местників. Ото кілька их имен: Сипко из Недзіци, Иван Малик из Ростокы, Юрко Цюпа, Сидорик из Блихнаркы, Яцко Ватраль из Регетова, Марко и Павло Щерба зо Смереківця, Данько из Ганчовы, Драбяк из Рыхвальда и др. Про збуйництво на Лемковщині дуже цікавился судья Др. Теофиль Курило, собирал о них всякы можливы материалы, а позднійше до ІІ Світовой войны, выдал окрему друковану книжку.

Також и по словацкой стороні было много мстителей, як Васко Чепец зо Стропкова, Сенько из Маковиці, Савко из Оравы и др. Из словацкых мстителей особливо голосный стал опришок Юра Яношик, який зо свойом группом м. инш. діял также серед Карпатскых лемков в околици Татр. О Яношику были писаны книжкы, а потом сочинено о ним на Словакии драму-пьесу под назвом “Яношик”.

Треба ище згадати, же подчас повстания Косткы Напьерского, польского народного патриота, отділ лемков, зложеный из кількадесяти особ под проводом Стефана Баюса з Маластова, перейшол ціле Подкарпатье, громил панов и дошол до замку в Чорштині, який зостал здобытый через повстанцев. Тяжко и кроваво заплатили лемкы за тото повстание.

В селі Избы, Горлицкого повіта находится гора, звана “Шибеничный верх,” свідок той кровавой екзекуции, яку виконано на лемках. На той горі выставлено шибеницю, на котрой вішано лемков-повстанцов и их родины.


ВПЛЫВЫ РОССИИ

Лемкы в Карпатах были бы совсім вынищены, як бы не вплывы России на тот бідный народ. Россия Петра Великого с початком ХVІІІ віку розбила сильну тогды в Европі Шведску армию. В половині того же віка она побила німцов и вступила перший раз до Берлина. В 1848 року войско русске вошло до Карпат. Велика масса добре зорганизованной русской армии зробила на лемков велике впечатліние. От того часу лемко чул за собом силу, потребы и помочь братского народа могучой державы. То додало лемкам силы опертися вынародовлению, а гнобительов серьозно то настрашило. Наступила внет полна зміна курсу политикы. Брутальну силу в отношению до лемков замінено теперь на хитру німецко-иезуитску политику. Тота политика здеморализувала по большой части русский народ в всходньой Галичині, а лемков такой не удалося здеморализовати. Они осталися вірными своим национальным славянскым традициям.


ГАБСБУРГЫ

По розділі Польшы в 1772 року, Галичина досталася Габсбургам, котры были також королями Венгрии. Ціла Галичина нашлася в составі австрийской державы. Народ мог тепер сходитися на ярмакы и отпусты з єдной и другой стороны австрийско-венгерской границы. Под натиском народов Европы зостала скасована панщина. Народ отдохнул. Давны лісы и полонины остали дальше в руках панов, але ощадный и працовитый лемко потрафил выдобыти собі хліб из той землі, яку йому зоставили. Народу не было ище так барс много, то и хліба выстарчало. С часом прибывало людей штораз больше и отец родины был примушеный ділити свой грунт на веце частей помеже свои діти, из-за чого почалася появляти біда и голод.

Житья в горах до открытья емиграции в Америку было понекады дуже тяжке.


БІДНОТА И СПОСОБ ЗАРОБКУ

Направду панщина остала скасувана, але головне богатство гор, т. є. лісы, пасовиска и лучша земля дальше оставалися власностью панов або державы. Житья лемков залежало по части дальше от панов. Треба было дальше робити в панскых лісах майже задармо, часто за галузя для палива. На тых найгоршых кусках поля, што осталися у хлопов, трудно было выжити. Лемкы радили собі, як могли. Єдны спригалися и форманками іздили по товар до Кракова и Моравы, то за сольом до Бохні и Величкы. Товар везли через Карпаты на Венгры. На Венграх брали хілб и везли до Кракова и т. д. Другы робили в панскых и державных лісах. Вывозили оттамаль дерево на тартак, а потом из тартаку везли дошкы до міста. Кто не мал коня, бо го не стати было купити, то брался за яке-нибудь ремесло. Єдны робили колеса до возов, другы бочкы, иншы граблі, мітлы, то ложкы, веретена, сольничкы и т. д. Тот свой товар несли або везли до міста на ярмак и там продавали.

Сут такы села на Лемковщині, где ціле село было заняте специальным ремеслом. Напримір, в Новици и Ліщинах, Горлицкого повіта, вырабляли деревяны ложкы и веретена и розносили по далекых селах. Лосяне іздили майже по цілой Европі и продавали мазь, оливу и дехоть; мазь и оливу до смарования возов и машин, знову дехоть для лічения худобы. Лемкы из околицы Рыманова вырабляли з дерева артистичны товары, як касеткы, тарелкы, палиці-топоркы и іздили з ними по курортах. В селі Бортне викували камені до ручных млинков и малых млинцов. Декотры выізжали сезоново на роботу до Венгер и в Німеччину.

Так помагали собі, поки не довідалися, же там далеко за океаном в Америкі потребна робоча сила и можна заробити ладны грошы. Длятого роспочалася емиграция лемков до Америкы, котра побольшалася с каждым роком до выбуху І Світовой войны.


ЕМИГРАЦИЯ И МАТЕРИЯЛЬНЕ ПОДНЕСЕНИЕ

Емиграция до Америкы мала велике економичне значение для лемков. Початок єй можна меньше-больше рахувати от 1875 року, а в дальшых роках она уже отбывалася массово. Никто не выізжал с думком, абы назавсе зостати в Америкі, лем жебы там заробити грошы и вернути назад на свою отчизняну землю и поправити свой материяльный быт в краю.

До Першой Світовой войны емиграция лемков до Америкы прибрала такы розміры, што на число 700 лемковскых сел рідко нашлася така родина, котра бы не выслала штонайменьше єдну особу за океан. Были и такы родины, што вшиткы выіхали и хаты позамыкали, вікна позабивали дошками, а грунт отдавали своим кревным, або сусідам. Завдяки емиграции, економичный стан лемков поправился. Емигранты присылали до краю долляры, за котры докуповано поля, справляно инвентарь, взагалі поправляно своє господарство. По кількох роках побыту в Америкі, переважна часть людей вертала на родину, приносила зо собом грошы и стала тепер совсім иначе смотритися на світ и житья. Свои стары курны хижи бурили, а будували новы красшы и выгоднійшы. Реемигранты мали грошы купити господарский инвентарь и минеральны добрива, зато и земля ліпше у них родила. На штучных навозах сіяли новы гатункы пашы для худобы, длятого и волы им ся поправили и коровы стали ліпше доітися, што в цілости поднесло их материяльный побыт.

Лемкы были до той степени связаны с Америком, што декотры по кілька разов іздили в Америку, потом знову вертали до краю и своих родимых гор.

В наслідстві американской емиграции почато по селах организовати и открывати споживчы кооперативы, молочарні, кассы пожичковы, набивати расову худобу, закладати овочовы сады и пасікы и робити ліпший ужиток з ліса и продуктов свойой землиці.

Вшитко то перервала Перша Світова война, яка задала лемкам болячий удар, якого може не зазнал жаден европейский народ. Выстарчит лем спомнути австрийскы концлягеры Талергоф и Терезин. Там невинно томилися и умерали тысячы лучшых сынов-лемков, лем зато, што любили прадідну землю, дорожили своим обрядом и не отрікалися имени “Русь”.


Подал
Антоний Драбяк.

Ярослав, УССР.


[BACK]