Идут нам ту приданяне,
А што мы им істи даме?
Пшениченьку зъіли мышы,
Неє с чого печы кнышы.

Втікай в поле баране,
Бо тя зъідят приданяне.

Не бойтеся, бараны,
Сыты идут приданы.
Зъіли вола и корову
Ище взяли на дорогу.

Гусу наша біла,
Де-с нам полетіла?
Медже чужы гуси —
Привыкати мусиш.

Выйд, молода, з коморенькы,
Привитати приданонькы:
Отца и матер свою
И сой сісти коло ней.

Вкажте нам чадо, вкажте,
Што сте нам го взяли,
Бо мамонька барс плакала,
Же го давно не видала.

ЛАТКАНИЦЫ:

Як бы мы го показали,
Та вы бы го не спознали:
Зробили мы з дівкы жену,
Приведеме, вам зачеплену.

СВАШКЫ:

Выйд соненко из-за горы,
Засвіт нам до коморы,
До коморы и до лады,
Иди невісто по дары.

По дары и по балец,
Треба дары дарувати,
3 родином ся роспознати.

Крайте, староста, балец,
Та лем не вріжте палец,
Бо мы не маєме масти —
На ваш палец класти.

На пец, мамонько, на пец,
Жебы был перший хлопец.
Ты татоньку медже горці,
Жебы были самы хлопці.

Дайте же нам бальцу, дайте,
Дайте же нам до глебивчата,
Жебы были и дівчата.

Не давайте нам оамы кускы,
Бо мы не вашы гускы;
Не давайте окиршины —
Буде мати в каждый рік крестины.

ПРИДАНЦЫ:

Танцували шевцы,
Танцували кравцы,
А теперь будут —
Панове приданцы.

А кто ту танцує,
Самы черемшане,
Лем сой повішали —
Чеканикы на стіні.

Як сой повішали,
Так сой познимают,
Як сой раз казали,
Так сой потанцуют.

Вылетіла зозуленька с проса,
А я за ньом ранусенько боса.
Піду я ся свойой мамці спытати,
Ци покажут зозуленьку имати.

А гуси, гуси, поповы гуси,
Не коломудте воду Марисі,
Бо Марися хусточкы пере,
Та єй ся на них коломут бере.

А в неділю на свято, на свято,
Штыри коні занято, занято.
Ей, занято фурманови коні,
А сам не знат, де мат підти по ні.

А ты фурман не пытай, не пытай,
Лем до міста помыкай, помыкай,
Лем до міста, до міста, до Кросна,
Там дівчина штырі коні пасла.

А што там долов за водов,
Што заросло лободов, лободов?
Што то Боже за урода была —
Штырі коні в полю загубила.

Ганичко, душичко, де ты была,
Жес- собі ножечкы замочила?
Была я там в гаичку,
Жала я там травичку,
Роса была, роса была,
То-м сой ножкы замочила.

Ганичко, душичко, ты не кашли,
Жебы мя при тобі не нашли,
Бо як мене учуют, возмут калап и чугу.
А мене при тобі набиют.

Так єм ся напил, як мотыка,
Налій мі, качмарю, до шафлика.
Я зо шафлика выпию, а потом тя набию.
А сам ся с качмарком за пец скрыю.

Черемха, Чеіремха,
Под границом селечко,
Як был го змалювал,
Было бы місточко.

Як бы го змалювал,
Лем самым покостом,
То бы ся вступило
За Дукльом Коросно.

От Сянока чорна хмара бурится,
Моя мила сама дома боится.

Не бой же ся моя мила з вечера,
Бо я приду, преночую дорана.

Подме оттыль, подме, бо нам ту не ради,
Бо зме надоіли той вшиткой челяди.

Весіля ся кончит, біда ся начинат,
Молодиця плаче, же юж не вытримат.