В Молодого на Загравинах
Зыйди Господи з неба,
Бо нам тя все треба,
Як в водне, так в ночы —
Будь нам на помочы.

Дай же нам Боженку,
Счастдиву годинонку,
Весілечко зачинати,
И частично докладати.

вісіля ся зачинат.
Заграйте гушли и басы,
Най сой вытанцую
Паробоцкы часы.

Як я ишол от свойой миленькой
Світилє місяц высоко,
Она за мном позерала,
Ци-м одышол далеко.

А я юж был коло поточка,
Она мене закликала:
Верний же ся мое сердце,
Преночуєш до ран.

Моя миленька мня покликала
До матере до свойой,
Наляла мі погар вина,
До рученькы до мойой.

А я хлопец справедливый,
Никто на мня нич не знат,
Лем ти єдна, мила моя,
А тіл мене: не выдаш.

А хоц бы-с выдала,
Сама-с тому причина,
Сама-с мене закликала,
Ход Яничку до сіна.


Свашкы:
Панове сватове,
Сходжайтеся до стола,
До стола округлого,
Нашого молодого.

Панове сватову
В дороженьку рыхтуйте,
Кониченкы свои,
Hа остро покуйте.

Куйте же их остро,
Дорога не проста,
Дорога далекая,
Ноченька темненькая.

Дружбове сватове,
По дукату складайте,
По дукату червеному,
Нашому молодому.

И нашому гудачкови
По єдному шустачкови,
Поіднался нам грати,
В субботоньку зачинати,
В середоньку перестати.

Посмот ся весільна матко,
Ци-с прибрала сына гладко,
Сорочонька леняненька,
И стужечка ядвабненька.

Выберайся сыну
В счастливу годину,
По гарду дівчину,
Но добру газдыню.

Заставонько шолкова
Выйд с нами из-за стола,
Бо підеме по сокола біленького,
По нашого молодого.

Дайте же нам стольця,
Стольця широкого,
Бо наш молодый —
Роду великого.

Сходжайся родинонько
3 Горя и Подоля
До семого поколінья.

Кланяйся молодый, кланяй,
Благословенства глядай,
От отця, от мамонькы,
И от близкой родинонькы.

Поблагослов мамочко
Своє любе дітятечко,
А мамонька так мовит,
Най тя Господ Бог благословит.

Зоставайте здоровенькы.
Як великы, так маленькы,
Закиль мы ся повернеме,
Біле чадо приведеме.

А ты явор, явороньку,
Зоставай нам при домоньку,
Закиль мы ся повернеме.
Молодицу приведеме.

Покроп нас мамонько водом,
Най идеме з полагодом,
В далеку дороженьку,
Счастливу годиноньку.

А наш любый короваю,
Точиш ся нам коло гаю,
Коло гаю, коло воды,
Аж до нашой пані млодой.

Вы газдове черемшане,
Пусте же нас через село,
Мы вам шкоду не зробиме,
Пшеничку вам не стлумиме.

Вы газдове липівчане,
Ваше село соломняне,
А як мы го запалиме,
Та вам дубельт заплатиме.

Польом, дружбове, польом,
Иде дівчина коньом,
Ради бы зме єй здогонити,
На коня высадити.

Ради бы зме ся звідати,
Де будеме ночувати,
У молодой на рыночку,
У зеленом барвіночку.

Идеме, идеме,
З горы до долины,
Идеме глядати
Той новой родины.

Идеме, идеме
Дражкы не знаєме,
Добры люде знают,
Та нам повідают.

Идеме, идеме,
Де дві свічкы горят,
Будеме дуркати,
Ачей нам отворят.

Засвіт мила свічку,
Най перейду річку,
Засвіт мила зо дві,
Най перейду к тобі.

Отвор мила врата,
Отвор на широко,
Жебы-м сой не зламал
Перечко зо злата.

Отвор мила дверка,
Бo-м ту давно не был,
Та я твои дверка
Отверяти забыл.

Пред вашыма воротами
Стоит коник осідланый,
Выйд молода розсідлати,
Молодого привитати.

Не витай його самого,
Але всю дружину його,
А и його сватенькы,
И всі штыри молоденькы.

Пусте же нас пусте,
Красненько вас просиме,
Красныма словами,
Низкыми поклонами.


Латканици:
Не за том сте стежком ишли
Не до той вы хижы пришли.


Свашкы:
И за том зме стежком ишли,
И до той зме хижы пришли,
Познали зме тот ріночок,
Єст по вікнах барвіночок.

Пусте же нас, пусте,
Бо мы з далекой дорога,
Стояти нас болят ногы.


Латканици:
А свашенькы молоденькы,
Не болят вас ноженькы.


Свашкы:
Пусте же нас пусте,
Або нам отворте,
Як ся погніваме,
Та ся повертаме.


Свашкы (через порог идут).
З далека мы приіхали,
Коничкы нам позмакали,
Дайте же нам ручничкы
Повтерати коничкы.


ДРУЖБОВЕ
(идут в танец и співают):
Чорны очы, як терен,
Коли мы ся поберем,
Поберемся в неділю,
Маю в Бога надію.

Деж ты мене поведеш,
Коли ты хижы не маєш,
Поведу тя в чужую,
Покаль свою збудую.

Будуй, будуй з лободы,
До чужой ня не веди,
Чужа хата не своя,
Не буду мала спокоя.

А што ты мі істи даш,
Коли ты хліба не маш?
Будеш іла лабоду,
Докиль ся хліба дороблю.

А гдеж ты мі постелиш,
Коли не маш постелі?
Постелю ти солому,
А міхом тя прикрыю.


ЛАТКАНИЦЫ:
Не вступиме ся вам з кута.
Поки нам не дате дукат,
Дуката червеного,
От вашого молодого.

Вкажте, же нам чадо, вкажте,
Красненько вас просиме,
Най мы го видиме,
За чым ту ходиме.


ЛАТКАНИЦИ:
Неє чадонька дома,
Пішло до Кракова,
Вінцы купувати,
Сватенькы частувати.


СВАШКЫ:
Дома оно, дома,
Оно о том добрі знало,
То ся вінцом постарало.

Не будеме істи,
Не будеме пити,
Покаль нам не дате,
По што мы ту пришли.

ЛАТКАНИЦИ:
Неє чадонька дома,
Пішло зберати риджикы,
Буде их квасило —
Сватенькы гостило.

Дома чадонько, дома,
В коморонці за дверями,
Черкат собі піняжками.


ЛАТКАНИЦЫ:
В нас в коморі за дверями,
Сут бочкы с капустами.


СВАШКЫ:
Не будеме пити
Вашу сливовицу,
Покаль нам не дате
Нашу молодицу.




[BACK]