FirstRecord63

БЕСІДА, ЗАРУЧИНЫ, ВЕСІЛЯ И КРЕСТИНЫ

Витайте лемкы краяне и вы по крови братья славяне. Стефан Шкимба запрашат вас на заручины, весіля и крестины. Ічте, пийте, співайте и весело забавляйтеся. Я, яко староста, сердечно вам дякую, же сте мя вы слухали.


БЕСІДА — ЗАРУЧИНЫ

Дай Боже добрый день!

Дай Боже и вам. А што вы за люде?

— Мы юношы.

— А з якого вы села?

— Та с того, где козы куют.

— А што ся родит на вашом грунті?

— Та вшитко ся родит, а каміня найліпше.

— О, як так, то на неділю перша оповідь.


МУЗЫКА И СПІВ
Повіч мі, Катрено,
Повіч мі на разі,
Най мои коникы
Не стоят на дразі.
Бо мои коникы
Дуже мя коштуют,
Ани єдну ночку 
Дома не ночуют.

Радте же ся радте,
За кого мя дате.
Моя рада така,
Же лем за гудака.
Гудак буде грати,
А я танцувати.
Так мы ся буде
Хліба дорабяти.

Зозуля кукала,
Правду повідала,
Же я ту не буду,
Где-м ся выховала.


БЕСІДА

— Катрен, та повіч, ци підеш за того Грица, щи не підеш?

— Та може и піду, як мі запише пол грунта.

— О, як підеш, то заран идеме до запису. Гудакы грайте.


СПІВ — МУЗЫКА
Ой, дівча, дівча,
С панского роду,
Выйд-же ты ку мі
На загороду.
Гоя-гоя, гоя,
Выйд-же ты ку мі
На загороду.

Я бы вышла,
Але ся бою,
Ты бы мя здрадил,
О то не стою.
Гоя-гоя, гоя,
Ты бы мя здрадил,
О то не стою.

Кетрено моя,
Напой мі коня,
Не напою, бо ся бою,

Во ище-м не твоя.
Гоя-гоя, гоя,
Бо ище-м не твоя.

——————o——————


НАЧАЛО ВЕСІЛЯ

СПІВ — МУЗЫКА
Літат пташок попод дашок.
Ой зима там, зима там,
Коли я ся стого села
Ой, вымотам, вымотам.
Тогды я ся с того села,
Ой, вывину, вывину,
Як мі дадут штырі волы
И перину, перину.

БЕСІДА

Я, староста, прошу сідати до стола. Зъіме и выпьеме, а так до шлюбу підеме. Дай Боже, пане младый, сто роков прожити, а тобі, пані млада, до так рока — малого пророка. Но — цыгане, заграйте, але таку, жебы аж пані млада плакала.


СПІВ
Прежегнай мя, мамцьо,
Правом ручком на вкриж,
Бо ты остатный раз
На мой вінок смотриш.

Прошу я вас, мамцю,
Про Христовы мукы
А положте вы мі
На голову рукы.


БЕСІДА СТАРОСТЫ И МАРШАЛКЫ
(КОЛИ ВЕРТАЮТ ЗО ШЛЮБУ)

— Кто там?

— Я, староста с молодятами, зо шлюбу идеме, прошу отворити, пане маршалка.

— Гей, пане староста!

— Што, пане маршалка?

— А коли святый Осиф стоял на єдной ногі?

— Ага, та тогды, як сідал на такого осла, як пан маршалка.


СПІВ СВАШОК
Пусте же нас пусте,
Або нам отворте,
Бо ся погніваме,
То ся повертаме.

БЕСІДА СТАРОСТЫ

Дай Боже добрый день и вшитко добре! Но пані сваршкы, треба буде молоду почепити, дати єй химлю, чепец и баршанок, а на чело сало, жебы ся єй блищало, а вы цигане заграйте: на зеленой пашици.


СПІВ СВАШОК
На зеленой пашиці, (2)
Розмария квитне, (2)
А чыє то дівчатко, (2)
В коморі завите? (2)
А ктож його завияв (2)
Кто с ним дві ночкы спав? (2)
А я бы с ним третью спав (2)
Жебы я го достав (2).

БЕСІДА СТАРОСТЫ С МОЛОДОМ

— Но як, пані млада? Любиш чепец?

— Люблю, люблю, пане староста, а мужа ище ліпше.

— Но цыгане заграйте: “А за нашом хижом копа сіна”.

А за нашом хижом копа сіна (2)
Вчера была дівка, (2)
Днеска жена.

Вчера была дівка под віночком (2)
А днеска єст жена (2)
Почеплена.


БЕСІДА СТАРОСТЫ

Гей, цыгане, та заграйте єдну доокола!


СПІВ
Гей дружбове танцуйце,
Гей, най дружкы не стоят,
Гей най ся стары бабы,
Гей, на танец не строят.

ДО МЫТЯ ИДУТ
(Бесіда старосты)

Дорога дружино, до мытя идеме. Идеме на воду умыти молоду, горе гудак!


СПІВ СВАШОК
Зыйд-же Боже с неба,
Бо нам ту тя треба,
Освятити воду,
Умыти молоду.

БЕСІДА СТАРОСТЫ
Посмотте-ле добры люде,
Што с того буде,
Наша пані молода —
Червена, як ягода.

МОЛОДА
Што вы гварите, пане староста?
Та-ж я с такого роду.

СТАРОСТА
Панове музыканты!
На честь и славу
Нашых молодят
Прошу заграти обертану.

СПІВ МОЛОДОГО
Оженился єм ся,
Не призрілся єм ся,
Теперь ся мі не здає,
На криво ходит,
На криво смотрит,
А и кривый нос має.

СПІВ СВАШОК
Згоры ся хмарит,
Здолы ся хмарит,
Буде ляло цілу ночь,
Сподабалося ся мі
Дівча у сусіда,
Але мі го не хтят дац.

Гей, што ся стало,
З другым ся кохало.
Теперь мі го давают,
А я им го не хочу,
Оберну ся, где хочу,
То най сой го дома тримат.

Ой, ци тота, ци не тота,
Што рано вставала,
Посмотріла до окенька,
Жеся не выспала.
Ище не день, ище не день.
Слава Пану Богу,
Ище я ся напритулям
Ку свому милому.


БЕСІДА
(крают балец)

Пане маршалка, балец покрайте, Пані молода дарункы роздавайте. Пані свашкы коровяр приберайте; дружбове и дружкы істи, пити доношайте, а вы музыканты заграйте, але грайте, бо як не, то на мою душу — басы вам покрушу.


СПІВ СВАШОК
Крайте, балец, крайте,
И нам за пец дайте.
Будеме кусати —
Хлопця колысати.

СПІВ МОЛОДОГО
Юж єм ся оженил,
Юж буду свою мал,
Юж я вас дівчата —
Не буду любувал.

ПРИДАНЫ
Спів приданянов
Идеме мы ту в приданы
За тым личком малюваным,
Идеме го навидіти,
Ци му буде добрі жити.

ВЕСІЛЬНЫ СПІВАЮТ
Пришли нам ту приданяне,
А што мы им істи даме?
Заріжеме им барна,
Най ся гостят аж до рана.

СПІВ МОЛОДОЙ
Любуй, же мя, любуй,
И я тебе буду,
Хоц в кажду неділю,
Бита от тя буду.
Хоц в кажду неділю,
Абы не в каждый день,
Любуй, же мя, любуй —
В каждый день без тыждень.

МОЛОДА ВИТАТ РОДИНУ

Як ся мате, няню? Як ся мате, мамо? Як ся мате діду, бабо, стрыку, стрыно, уйку, уйчино, и ціла моя родино!


БЕСІДА (ОТЕЦ МОЛОДОГО)

Я, отец молого сына, а вашого зятья, витаю вас, мой дорогий свату и свахо, и вас дорога гості, и прошу сідати до стола. На здоровья, свату, и до вас, свахо, и до вас, дорога гості. А вы цыгане заграйте, або задаток отдайте.


СПІВ ПРИДАНЯН
Заграй, же нам, заграй,
Гей, як нам маш заграти,
Бо ту не будеме,
Гей, долго танцувати.

МАТИ МОЛОДОЙ
(співат)
Ой Боже мой Боже,
Што я поробила,
Єдну-м дівку мала,
Ой, и тоту-м выдала.

МОЛОДА
(отспівує мамі)
Мамцю моя, мамцю,
Ой не жалуйте того,
Бо сте мя выдали,
Ой, за мужа гардого.

БЕСІДА
(Свашкы и старосты)

— Пане староста!

— Што, пані свашко?

— Ой свашкы, свашкы, та вы мене, присягам Богу, замордуєте! Єдна з рук, а друга до рук! Но музыканты, заграйте!


ТАНЕЦ И СПІВ
Горіла липка, горіла,
Мой мила под ньом сідила,
Искоркы на ню падали,
Паробци за ньом плакали.
А вы паробци не плачте,
Зелену липку загасте.
В решеті воду носили,
Зелену липку гасили.

Зелена липка ядловец,
Ліпший паробок, як вдовец,
Бо вдовец биє, катує,
Паробок личка цілує.

Ой, я сой хлопец, хлопчина,
Ой, не мам няня ни мамы.
Лем тоту єдну дівчину,
Што я сой ту зньом танцую.


ПОПРАВИНЫ
(Спів)
Сіла муха на коноплю,
Оборвала квіт,
А юж єс мі моя мамцю
Завязала світ.
Чого плачеш, моя мила,
Чого тобі жаль?
Того вінка зеленого,
Што єс мі го взял.
Чом єс тогды не плакала,
Як єм ти го брал?
Я думала, фалечнику,
Же ты лем жартувал.

БЕСІДА СТАРОСТЫ

Так, так, пані молода!

Як єс газдувала, так будеш мала. А вы дружбове, идте и принесте судок пива, зробиме поправины. А вы музыканте заграйте.


СПІВ — ТАНЕЦ
Вандровали вандровици,
Был єм за водом,
Воліл я ся не женити
Мой мила с тобом.

Мой миленький,
Што єст с тобом?
Што тобі ся стало?
Вчера зме сой присягали,
А вшитко на дармо.

Вандровали вандровници,
Был єм за Тисом,
Воліл я ся не женити
С том парадницом.


БЕСІДА

Ой, старый, старый, ты старый пияку, под домів, бо уж час спати.

Та чекай, стара, я хочу с тобом танцувати.

Гей, музыканте, заграйте нам стародавну потрясану.


СПІВ
Гей, а я старый дырда,
Гей, не танцувал нигда,
Гей, а тераз юж мушу,
Гей, хоц ся ту задушу.

Тпруци, тпруци, телята,
Где идете дівчата?
Меже горы потокы,
Єст там трава по бокы.

Який-такий шубравец
Бере дівча на танец,
Подже, дівча, подже под,
Як выросну — буду хлоп.

Не піду я на танец,
Гей, бо мя болит палец,
Треба палец завити,
И на танец летіти.


ДРУЖБИНЫ
(Весіля, друщины и дружбины)

— Гей, дружбове, та не стойте, як тото теля на помостку. Зачинайте дружбины.

— Зараз, зараз, пані дружкы, лем музыкантов почестую. Но музыканте, грайте и грайте, але таку, жебы аж хижа дудніла.


СПІВ ДРУЖБОВ
Дружба я сой дружба,
Горька моя служба,
За три рочкы-м не косил,
Дружбити-м ся просил.

А нашы дружбове,
Барс ся парадуют.
Же сой на дружбинах
С дружками танцуют.

А нашы дружечкы,
Танцуйте вы с нами,
А най вам не росне
Травка под ногами.

Смотже собі младый,
Як будеш газдувал,
Жебы-с старый овес —
Новым присыпувал.


СВАЩИНЫ
(Бесіда)

— Пані свашкы! Дружбовины ся кончат, а сващины ся зачинают.

— А так, так дружба, бо я мушу идти домів, бо коровы юж тыждень не доєны, ани діти не купаны, аде о том на потом. Гудакы заграйти мі єдну.


СПІВ
Гей, свашка я сой свашка,
Гей, юж єм досващила,
Гей, остатню корову,
Гей, с дружбами пропила.

Ой, нашы пані свашкы,
Ой, великы пиячкы,
Ой, пропили зо себе,
Гей, остатні запаскы.


БЕСІДА

— Гей, дружбове! Мы ниякы не пиячкы, а як сой выпьеме, то за своє.

Ха-ха-ха! Цыгане, грайте, бо свашкы, присягам Богу, пьяны.


СПІВ
Ой, Боже, Боже, як то зле,
Ой, кто любує, не возме.
Ой, а я любил, ой та єм и взял,
Ой, та мі Пан Бог добрі дал.

Ой, мам я жену млоду,
Ой, не пущу єй по воду,
Ой, стигла бы ся мі втопити —
Ой, біда ся мі женити.

— Мамо! Ци будете и сусідов на весіля просити?

— Та будеме, моя невісто, будеме, але перше про них корову заріжеме, абы нам даколи не повідали, же зме худобне весіля справляли.


СПІВ СУСІДОВ
Не пришли зме істи,
Не пришли зме пити,
Лем мы до вас пришли
Невісту видіти.
Дала-с мене, мамусь,
На широку ролю,
Не на роскош то мі,
Лем на біду мою.
На широкой ролі
Треба рано стати,
А я молоденька —
Люблю долго спати.

ОСТАТНЫЙ ТАНЕЦ
(Бесіда старосты)

А теперь на остатку заграйте нам куляву. Молодый най танцує с молодом, староста и маршалка зо свашками, чопар и доматар с газдынями, дружбове с дружками, паробци с дівками, а вы молоды хлопци и дівчата заспівайте молодятам.


СПІВ ВЕСЕЛЬНЫХ
А неє, то неє, як ходити дівком,
Гея, гея, под басамунками,
Под зеленым вінком.
Не хотіла-м піти,
Примусіли сте мя,
Гея, гея, а теперь нич не мам,
Спомагайте же мя.
Сестра на горнятко,
А брат на мисятко,
Гея, гея, а вы моя мамусь —
Хоц лем на телятко.

Весіля ся кончит,
Біда ся зачинат,
Молодиця плаче,
Же юж не вытримат.

(Бесіда)

— Час до дому идти, дорога дружино и родино. Весіля ся кончит, дай вам Боже счастья, здравья и силы, же сте молодому и молодой послужили.

— Дай Боже и вам, пане староста!

МОЛОДА: — Дякую вам дружино и родино за вашу послугу, но а так до рока буду мати пророка, запрошу вас вшиткых на крестины.

ВСІ КРИЧАТ: — Виват!


СПІВ
Наш молодый най жиє,
Най молоду на биє,
Многая и благая літа,
Наша млада най жиє,
Най младого любує,
Многая и благая літа.

БЕСІДА
Гудакы выграйте дружину,
Та достанете заплату,
А и чорну куру.

СПІВ
А неє, то неє, як то у сусіда,
Єст невіста гарда,
До тыждня весіля.
Юж ясне солнечко
За гору заходит,
Юж ся родинонька
З весіля росходит.

БЕСІДА

— Старый, запригай коня, бо идеме до дому. Грицу, тримай коня, бо сані переверне.

МОЛОДА: — Дякую вам, няню, їй мамо, што сте мя тяжко ховали и на добре газдовство выдали.

Оставайте нам здоровы! Ходте здоровы, будте здоровы.


КОНЕЦ ВЕСІЛЮ

——————o——————


КРЕСТИНЫ ТРИ МІСЯЦЫ
ПО ВЕСІЛЮ
Бесіда

— Ой, кумо, кумо, як я вас люблю!

— А то чом так, куме?

— Чом? Три місяци, як сте по весілю, и юж крестины справляте, а моя стара дырдуля юж девят місяцов, як чекат и и все нич нема и нема.

— Ой, куме, чекала и я, але вы не знате, як то было.

— Та як то было, кто и як?

— А то так было, куме:

— Три місяцы зме ся знали, як зме коровы навертали, а три місяцы, як зме на кошарах ночували, а три місяцы, як зме ся поженили, то три а три, то шесть, а три, то девять, правильно, куме?

— О! То вы так рахуєте, так!

Но як повідал мой небощик дідо, так и правда, же баба и дябла з розума вывела...

Не любил єм тя,
Сама-с ходила,
Не найдеш ты на мя —
Жадного права.
А хоц бы-с пішла
И до єгомосця,
Не найдеш ты намя —
Справедливости.

БЕСІДА

— Кумове и кумы! Ічте, пийте и співайте, бо в мене крестины. Моя стара породила мі сына три місяцы по весілю. Але то жена, не!?

— Правду мате, куме, такой жены никто нема на ділом світі.

— Но дай нам Боже здравья, кумичко моя!

— Пийте здравы! И до вас, куме, пийте здоровы!


СПІВ
Ой, куме, куме, дайте вина,
Будете мати, куме, сына,
Ой, як не дате лем згорілкы,
Будете мати самы дівкы.

Ой, куме, куме, дайте пива,
Будете мати, куме, сына,
Ой, як не дате, лем гарбаты,
Будете мати кучеряты.

Ой, кумо, кумо, дайте істи,
Будете мати кумо блисці,
Ой, як не дате лем выпита,
Не будете веде мати діти.




[BACK]