“Лемковске Весіля” на Фильмі

Коли роспространилася рекорда “Лемковске Весіля” по русскых колониях в Америкі, тогды оживился и начал роспространятися русско-лемковский рух.

Журнал “Лемко”, выходящий раз в місяц, скоро перешол на два тыждневу газету. В далекой Канаді, в Виннипегу, нашы сознательны краяне: Теодор Кохан, Владимир Цисляк, Ваньо Похна, Нестор Волчак и другы организовали перший отділ Лемко-Союза. В місті Нью Йорку жил тихо и спокойно, но с великым талантом краян Михаил Дужий, ныні уж покойный. Коли он почул того весіля на рекорді, страшно здивувался тому, же где взялося таке чисто сельске весіля на рекорді. С той радости йому родилася думка о награню такого народного весіля на фильму.

Михаил Дужий удался з новом идейом к редактору газеты “Лемко” Дмитру Вислоцкому, котрый похвалил идею Дужого и заохотил го, штобы награвати таке весіля на фильму.

Редактор Вислоцкий радил Дужову удатися до мене, ци я бы мог и хотіл быти на помочи в награню такого весіля.

Дмитрий Вислоцкий и я зышли зме ся в домі Михаила Дужого и так разом пришли до заключения, же така фильма може заинтересовати нашу массу народа на емиграции и поможе в розвитию новой организации Лемко-Союза.

И так, редактор Вислоцкий принял на себе голосити о том в газеті, Михаил Дужий согласился набыти всі аппараты для знимкы и показу фильмы. А мі поручили подобрати отповідных аматоров, музыку и постаратися о  крайову одежу для весільной дружины. Тот обовязок я выполнил и подобрал дружину, дал пошити одежу нашому краяну кравцу ище старого краю Василию Вархоляку, котрый нашил для мужчин гунькы и бруслякы, а женску одежу приготовили: моя жена Марина, а также до помогли єй в том Евдокия Долина и Розалия Быбель.

Д. Вислоцкий дал намір, абы тото весіля складалося из обох частей Карпат, а то: молодый из Лемковской Руси, а молода из Пряшевщины.

Так, што ту треба было постаратися о двоє старшых людей, котры походили бы из Угорской стороны, яко родиче молодой, и двоє из Галицкой стороны, яко родиче молодого.

В награванню того весіля принимали участие тоты особы аматоры:

Родиче молодого:

Михаил Дычкевич, отец молодого, Милька Гаврильчак, мама молодого.

Молода — Анна Бартко.

Молодый — Павел Юрчик.

Родиче молодой — Янко Бабнян, отец молодой, Зуска Павлик, мати молодой.

Стефан Шкимба — весільный староста.

Евдокия Долина — свашка, Разалия Быбель, свашка, Иван Корбеляк — маршалка, Калистрат Цідило — сващак, Василь Вархоляк — сващак; Петро Копча — дружба; Михаил Роман — дружба; Елизавета Шугай — дружка; Марта Шугай — дружка; Стефан Долина — священник.

Музыканты:

Петро Дудра,
Петро Карляк,
Иван Карляк,
Иван Желем.

Катрена Дычкевич — газдыня.

Весільны гості-приданяне:

Андрей Станчак,
Иван Корбеляк,
Андрей Лешко,
Иван Потоцкий,
Михаил Мішко,
Анна Галь,
Ольга Галь,
Єва Галь,
Мария Вилчинский,
Зуска Фабиян,
Осиф Обух,
Осиф Гамерский,
Юрко Шірак,
Настя Тиханич,
Василь Пронько,
Настя Пронько,
Мария Гончарик,
Йоанна Геряк,
Антоний Хомик,
Иван Шкимба,
Михаил Шкимба,
Петро Юрчик,
Крестина Жыдяк,
Петро Маслей,
Макарий Геряк, фурман.

Всіх особ, принимавшых участие в награванню той фильмы и убраны в одежу лемковского и пряшевского строю было около 60 душ. А позатым множество народа приходило, яко зрітели в кажду неділю, коли награвалася тота фильма. Найвеце приходили зо Стамфорд, из Юнкерс, Бриджпорт, Ансонии и Ватербери.

Награвание той фильмы отбывалося на фармі Макария Геряка, ныні уж покойного, в Стамфорд, Конн. Там покойный Геряк позволил нам уживати велику загороду, на котрой была побудована старокрайова хижа, где награвалися надворны сцены. Так само позволял нам уживати пару коней и воз на подобу крайового воза, на котром будьто іхали мы, весільна дружина из Галицкой стороны на Пряшевщину по паню молоду.

Перший выступ с награваньом фильмы начался в неділю 9-го июня, 1929 року, а так потом в неділю 23-го июня и 7-го июля. Поіздка была автобусами из Бруклина до Стамфорд в кажду тоту неділю.

А решта сцен были зниманы в специально приготовленом студийо в Бруклині, Н. Й.

История того весіля начинатся от молодого паробка и його товариша, котры выбралися на продай с лыжками на Угорску сторону. Там они вступили до богатого газды, котрому пробували продати даскілька штук лыжок и варих, выробленых на Галицкой стороні.

В того-то газды, кромі продаванья йому лыжок, они познакомилися с його красивом дочком Ганьом, котра залюбилася до єдного из тых лыжок продавцов.

Тота история послужила темом, на основі котрой был створеный перший тихий и безкольоровый фильм “Лемковске Весіля”, бо тогды инакшых не робили, и от того часу на другий рок тоже буде 35 рочница.

Фильм был показаный в пару місцевостях, но мусіл уступити, бо пришли звуковы и кольоровы фильмы. Но он, яко перший — навсе буде служити документальным свідком прекрасных лемковcкых весільных традиций.

FilmEnd

[BACK]