Оженился Фецко с Пайзом — Яков Дудра
Оженился Фецко с Пайзом,
Што го прозывали “Вайзом”.
Вайза, Вайза, Фецко Вайза,
Тот, што барз го любит Пайза.

Так Фецка всі прозывали
Аж нервы в нім порушали.
Не мог Фецко то стерпіти,
И мусілся оженити.

Бо ліпше ся оженити,
Як по ночах все лазити,
То уж ліпше жену мати
И спокойно ся выспати.

И што рок барже бідувал,
Оженился и газдувал,
Бо грунта мал дост маленько
И прото жил барз бідненько.

Што два рокы, то гость новый,
Пришол братчик к братчикови,
И внет пятьох тых братчиков,
Большых, меньшых, як пальчиков.

А по хлопцях внет дівчатка,
Тай дітворы полна хата.
Вшиткых треба накормити,
Опрати и приодіти.

Хоц Фецко тяжко працує,
То вшиткого все бракує,
Бо земличкы барз маленько,
Просто жити дост тяженько.

Неє на чом газдувати,
Треба все докупувати.
Но а знают о том люде,
Же діти чым будь не збуде.

А дітина, хоц и крива,
То родичам просто мила,
Не хотят, жебы умерала,
Бо то не весела справа.



Може даяк звырастают
И голод перетримают,
Лем жебы кус сподрастали,
Потом бы сой рады дали.

Діти здраво звырастали,
Лем кромі здравья нич не мали,
Бо нема нич Фецко с Пайзом,
Лем впол морга там под Лазом.

Так газдовка подроблена.
На осминкы поділена,
А осминкы зас отнова,
Но и торба уж готова.

Но и што дальше почати?
Деси в світ ся треба пхати.
Но а тот світ пан вельможный,
Теперь и он не порожный.

Там так само не хтят, братку,
Латати латку на латку.
Там, где така єст система,
Же єден ма, а другий нема.

Но и пошто ся там пхати,
И внет назад повертати.
Мы мусиме ту зостати
И мудрійше газдувати.

Я бы-м радил так каждому,
Же треба по-новому:
Вспольно разом газдувати,
А старе всьо занехати.

Земледільскы гурткы всяды
Мусят быти так, як в саді:
Щеп за щепом посадженый
И в технику узброєный.

В тяжкой праці най машина
Заступит отца и сына
И так дальше метер, дівку,
Без ріжниці — цілу спілку,
Буде хліба в вшиткого.
Для Фецка и Для каждого.

Яков Дудра.
Лосье, Лемковина.


[BACK]