Историчны События, то Нашы Народны Доказы

ПАМЯТНА “ДОЛИНА СМЕРТИ” НА ЛЕМКОВЩИНІ.
— ПАМЯТНЫ СОБЫТИЯ ИЗ РУССКОЙ ИСТОРИИ

Коли начнеме переглядати Историю Руси, то от самых початков знаходиме там множество памятных дат и місцевостей из бойовых событий и геройскых подвигов русского народа в борьбі и защиті свойой народной свободы и родной землі-отчизны от нападов всякых чужых вражых наіздников и грабителей, якы нападали на Русь, штобы завоювати русскы землі и поневолити русский народ.

До такых головных грабителей и нищителей русской землі належали головно татары-монголы, полякы-славяне, шведы, французы, німцы, туркы и много иншых. Но русский народ завсе знаходил в собі надост патриотизма, мужества и бодрости, штобы рішати свою судьбу житья и смерти там на полю бойовых сражений, где в геройскых подвигах побідоносно розбивал вражескы силы.

Спомнеме ту лем о даскількох такых памятных побоищах, як “Чудске Озеро” або “Ледове побоище”, где Аледсандр Невский (в 1242 р.) на замерзлом озері побил и потопил німецкых рыцарей крестоносцов (крижаков). Были то німецкы наіздникы, якы с позволения Папы носили кресты на собі, што нібы то они навертали поганов на християнство, хоц тогды вся Русь была уж християнска православна. Но головна причина была, штобы покорити русский народ и заграбити русскы землі для німцов.

Другым такым памятным событием было “Сражение зо шведами над ріком Ворсклом” под Полтавом на Украині, коли то шведский король Карль выбрался на завоювание Руси (1709 р.). Но там он также был розбитый на голову и мусіл утікати з Украины.

В той войні важне для нас то, што там Мазепа здрадил свой народ и перешол на сторону помагати шведам против русскых, а коли шведы были розбиты, то сам Мазепа раненый убіжал до Турции, и там правдоподобно мал умерти.

Но от той здрады Мазепы началася ширити зараза-идея оторватися Малой Руси (Украины) от Великой Руси, або “украинской самостійности”, што дало потом толчок німцям в Австрии створения украинской самостійной национальности, и для такой ціли была потом заведена нова наука извращенной истории Украины, пересякнена ядом ненависти до русскости, но и нова фонетична правопись в школах для всіх русскых дітей в Галичині. До якого несчастья, згрызы, страданий и гонений довела тота німецко-украинска политика, яку наш народ переживал, то мы сами зазнали и виділи на власны очы.

Дальше, таке важне историчне событие было “Бородино Поле”, коли то французский завоюватель Наполеон, покорившы тогды близко всю Европу, повернул свои армии на завоювание России, в 1812 р.

Там по дорогі на Москву Наполеон розставил свои войска на “Бородином Полі”, штобы там на первый ударь нанести поражения и розбити силы русской армии. Но русскы войска под умілым руководством князя Кутузова, в боях сражалися так завзято по геройскы, што в конци Наполеон мусіл уступити с бою, оставляючи на полю боєвого сражения близко половину свойой армии убитыми.

Так Бородинске сражение было уж початком русской побіды и початком конца поражения вражых армий Наполеона в поході на завоювания русской землі. Як раз теперь минуло 150 літ от того историчного события, о котром воспоминания мы читали на страницах нашой газеты “К. Руси” минувшого року.

Єдно из найважнійшых такых историчных событий, уж за нашой памяти, то было “Сражение под Сталинградом”, в 1942-3 р. в Отечественной войні с німецкым фашизмом, где в долгых завзятых боях и геройскых сражениях гитлеровскы армии были впрах розгромлены и кончилися яскравом побідом Красной Армии над німецкым фашизмом. От того часу Красна Армия гнала изнеможены недобиткы гитлеровской фашистской армии аж до Берлина.

История о том событию останеся вічно в истории людства и нашой памяти из борьбы с фашизмом за свою отчизну и народну свободу.

Но коли споминаме о такых историчных событиях Отечественной войны, в борьбі с німецкым фашизмом, то не мож также проминути, штобы не пригадати собі о дуже важном таком историчном событию на нашой родной землі Лемковщині. А такым оно было и останеся на вічну память лемкам-карпаторусинам, из бойовых сражений Красной Армии при переході Карпатскых гор, там был также великий бой и завзяты сражения, а місце потом названо “Долином Смерти”.

Там, коло Дуклі на Лемковщині, єст єден из важнійшых переходов через Карпаты с нашой стороны на Пряшевщину. Коли Красна Армия гнала німецкых фашистов, то там на долині того перевала німецка армия устроила засаду, штобы не пропустити Красну Армию через Карпаты. Там началися долгы и завзяты бои, якы тягнулися около два місяцы, там в конци фашисты были поражены и розгромлены, но страты в людях с обоих сторон были страшны. Там впали великы тысячи бойцов Красной Армии, между ними также нашых карпаторусинов-лемков, с обох сторон границы.

На той “Долині Смерти”, коло Дуклі на Лемковщині поставленый теперь памятник Красной Армии “Павшым героям за народну свободу”.

Но, як видно до того часу, то лем сут пусты слова, бо не возторжествовала ни правда, ни “народна свобода” для нашого карпаторусского народа, на той родной отчизні, освобожденной от німенкых фашистов. Зараз такой по войні сами политиканы (без самоопреділения народа) рішили нашу народну свободу. Землю Карпатской Руси розділено и народ передали — лемков-русинов под опіку поляков, Пряшевску Русь передано чехословакам.

Скоро потом, бо лем в двох роках, польскы паны рішили собі беззаконно, против самой конституции, стотысячне племя лемков-русинов насильством выгнати из их родной отчизны Лемковщины, штобы их на скоро ополячити. И гдеж глядати законной правды и справедливости?

Коли мы уж до того дошли, то не зашкодит нам пригадати собі коротко историчны факты о нашом народі и нашой отчизні Карпатской Руси, штобы выяснити, ци мают полякы даяке писане законне право до нашой родной землі Лемковщины, до якой они так завзято своятся, а над чувством, душом и сознанием свого народного происхождения лемков-русинов не по людскы збиткуватися.

Штобы правильно судити о той справі, або о той нашой народной проблемі належит завсе розберати справу от коренья, або початку истории. Др. С. Пыж писал так:

“Галицка Русь даколи на початках была также сильна и занимала єдно из передовых міст меже всіми русскими княжествами. Объєдиненна с Волынскыми княжествами, Галицка Русь творила могучу Галицко-Волынску державу на протягу ряда столітий.

Як раз, коли в Новгороді правил князь Александр Невский (тот, што побил крестоносцов на Чудском Озері) тогды на Галицко-Волынской Руси правил славный князь Данило. Но в 13-ом столітню на Русь звалился татарский погром, в котром русскы землі были страшно знищены и опустошены от змассакрованого населения.”

Тогды то як раз польскы правители выкорыстали таке ослабление галицкых княжеств и пошли войном на знищену и ослаблену Галицку Русь. Было то за панувания польского короля Казимира Вел. (того самого, што сам добровольно отдал Шлеск и другы польскы земли на западі німцам, а котры теперь Польша отзыскала и заселила их лемками-русинами смішано с поляками). Но зато он пошол на восток, штобы заграбити знищены и ослаблены земли Галицкой Руси. Потом по його смерти, королева Ядвига забрала окончательно галицку Русь под власть Польшы, в 1387 р.

От того часу всі земли Галицко-Вол. княжества, т. є. цілой Галичины, а в том Лемковщины, Пряшевщины (и Подкарпатской Руси, яка теперяь прилучена до Запад. Украины) належали под власть Польшы, аж до розбора Польшы в 1772 року.

Послі розбора Польшы, всі нашы земли Галицкой Руси были прилучены до старой Австро-Венгрии. Так, як то были дві державы сполучены разом во главі австрийского цисаря (кайзера) и короля Венгрии, и штобы розділити администрацию (заряд), а тым самым и карпаторусинов, зато проведено границу верхом Карпат. Такым образом русины на Пряшевщині и Подкарпатью осталися под зарядом и вплывом мадьярско-словацкой политикы, а по другой стороні Карпат ціла Галичина, в том наша Лемковщина, осталися на дальше под вплывом польской административной политикы. В такых обставинах народного гнета переживал карпаторусский народ в чуженациональных державах по обоим сторонам Карпат, аж до Великой Світовой войны и Русской революции, 1914-18 рр., яка потрясла світом и завела в России новы социальны реформы и порядкы.

Зас по розвалі старой Австро-Венгрии, в послідствиях войны и революции, образовалися новы державы, як объєдинена Польша, Чехословакия, Венгрия и прочы. Но и от той революции в России не пришла ище свобода нашому галицкому або карпаторусскому народу, бо из причины вмішательства воєнно-союзной политикы, нашы землі и наш карпаторусский народ остался на дальше розділеный, теперь уж не провизоричном административном границом, а политичном границом меже польском, а чехословацком державами.

Не треба нам уж и споминати о том, сколько то несчастья и кривды мусіл перетерпіти наш карпаторусский народ от национального гнета и насильства на протягу долгых столітий, як по єдной стороні от мадьяров-словаков, так и по другой — от самых поляков, национальных шовинистов, а до того от начавшогося ище за Австрии затрутого ядью ненависти до русинов, провокаторов и здрадников німецко-национальных украинскых самостійников.

А не меньшу ненависть до русскых плекали в собі также сами полякы и в новой возрожденной сенацийной Польші. Таж сам социалист генерал Пилсудский в 1920 року в отбудованой послі русской революции Польші, съорганизовал польску армию и погнался аж на Украину по Києв и украинскы землі, но там сильно потрепаный Красном Армиом, он ганебно вернулся назад до Польшы. Треба знати, што полякы завсе хотіли мати своє велике “моцарство от моржа до моржа”, але таке будували чужым коштом, грабили чужы землі тогды, коли они были изнеможены и ослаблены, як от нашествия татар, або послі войны и революции в России. Так дошло оно аж до часу, коли знов Гитлер несподіванно напал и розбил Польшу в 1939 р.

То был початок Другой Світовой войны, або Отечественной войны с німецкым фашизмом, котра кончилася розгромом гитлеровской армии под Сталинградом, а геройском побідом Красной Армии, розвалом и занятием Берлина.

Теперь послі такой великой побіды Красной Армии над фашизмом, и послі освобождения всіх русскых и славянскых земель от німецкых захватчиков, всі народы в тых освобожденных от фашизма державах, дложны были мати право на самоопреділение через народне голосование, где и до якой национальной державы тот народ и його земля должны были належати. Но для нашого карпаторусского народа, як на Лемковщині, так и Пряшевской Руси такого права на самоопреділение нашой землі не нашли потребным.

О нашом народі и нашой землі, заміст народного голосования, робили собі знов самы политикане личны або приватны “угоды” або договоры, и не так по волі самого народа, як о нашой карпаторусской территории, до кого должна належати Пряшевска Русь, а до кого Лемковщина. Но тым разом зашла уж зміна в том, што Подкарпатска Русь и Вост. Галичина были прилучены до Украины, а сама Пряшевщина и Лемковщина осталися на дальше по старому при Чехословакии и Польші.

Потом знов договоры о “добровольном переселению”, а позднійше зас якыси там “тайны угоды”, (кто и с кым?) о насильном переселению лемков-русинов из их родной и прадідной отчизны. Но и так нагло, як бы гром с неба, як безумну худобу, а не народ боровшийся также за свою народну свободу, в нісколькых днях под конвейом войска перегнали полякы 100 тысяч лемков-русинов на отзысканы понімецкы землі, лем зато, што полякы захотіли будувати свою єднолитну Польшу.

Як было спомнено повысше, што много біды, горья и несчастья переносил наш народ долгы столітия от национального гнета и насильства за стародавной Польшы и Австро-Венгрии, но то были часы автократов, королей, князей и шляхетской упривилегиованой кляссы, што каждый рядил по свому уподобанню, зато такы насильства были больше місцевого характера, переслідования єдиниц або групп людей, но николи давно полякы не важилися на таке велике и явне национальне насильство, на загубу-вынародовление стотысячного народного меньшинства, як то доказали полякы теперь при наци-социализмі, хоц социалистичный лозунг гласит “Всім народам свобода”, и под тым самым кличом боролися всі карпаторусины в часі отчизняной войны, за народну свободу.

Из того короткого перегляду давной истории Галицко-Карпатской Руси видно ясно, што николи русины не вклинювалися до словацкых або до польскых земель, а як раз напротив, бо полякы найперше заграбили силом ослабленну Галицку Русь, а потом за весь час их власти заселяли русскы земли поляками-зайдами, штобы русинов вынародовити ополячити. Потом, при каждой переміні политичной власти, завсе нашу землю с русскым народом, самы политикане приділяли до чужых держав, но николи ни пряшевскы, ани лемкы-русины не просилися, ани не присоєдинялися по свойой народной волі до чужых национальных держав.

Правда, може то не на часі теперь, и може мы не маме такого права вмішоватися в политичны діла тых держав, штобы теперь требовати реорганизации историчных границ меже тыми социалистичными державами, но зато мы маме полне право для критикы, штобы глядати и требовати законной правды и справедливости, штобы привернути законну своболу для поворота на свою родну землю, от незаконно пострадавшого от насильства выгнания народа, автохтонов лемков-русинов, штобы там на свойой родной отчизні могли творити и розвиєати свою народну культуру, по реальным законам той социалистичной конституции.

Не можна теперь напевно предсказати або предвидіти того, який напрям возме, або як розвиєся народна политика в справі национальной проблемы лемков-русинов и народных меньшинств в Польші, або ци часом сама партия Совітского Союза не возмеся за исправление свойой ошибки в том, што дозволила польской народной власти створити такий шкандал национального гнета, в незаконной акции насильства и выгнания лемков-русинов из их родной отчизняной землі. Бо никто инший, як сама партия найліпше сознає, што правдивого социализма, а тым меньше жадного интернационального коммунизма збудовати не можна на гнеті и насильстві гражданской и национальной свободы.

На місци ту буде пригадати ище и том, што за весь час той Отечественной войны по цілой Лемковщині по нашых горах Бескидах бродили и дійствовали партизаны (русскы, лемкы, полякы), якы вынищовали німецкых агентов, гестапо, уничтожали воєнны транспорты и проч. В своих воспоминаниях партизанской борьбы (кал. 1960) М. Донский упоминат также имя командира партизанского отряда Леонова, який пришол с отрядом и остановился в селі Мысцова коло Дуклі, (в околици “Долины Смерти”).

Там командир Леонов говорил до мысцовян так:

“Прошол я Украину и Польшу, но нигде я не чувствовал себе так спокойно и увіренно, як чувствую себе у Вас на Лемковщині, где каждый человік старатся помочы совітскому брату всім, чым лем може, и разом переживат и горе и радость. Тут лем роскрыватся вполні русска душа, изстрадавша в чужой неволі, а только ныні восторжественно встрічає своих освободителей.”

Так знал оцінити характер лемковского народа сам совітский брат Леонов, бывший командир партизанского отряда, який навірно принимал участие в боях, а можливо, што он сам пал жертвом на той долині смерти в борьбі за народну свободу с німецкым фашизмом.

Біда лем тота, што там на той освобожденной от німцов землі Лемковщині, осталися управляти стары польскы фашисты, якы не горьше от німцов росправилися с тым самым, изстрадавшым русской душы народом, безсердечно выгнавшы всіх лемков из их отцовскых домов и их прадідной отчизны.

Такы памятны и сочувственны события, як побоище с фашистами на “Долині Смерти”, сполучено разом с ганебном несчастном трагедиом насильства для выгубления народного меньшинства лемков-русинов в польской социалистичной державі, не можут быти николи затаєны або вымазаны из истории, они останутся документальном памятном, яко “долина народного житья и смерти на Лемковщині”, для всіх славян, а тым больше для всього карпаторусского народа.

Но мы лемкы карпаторусины не тратиме свою віру в законну правду и народну побіду, бо наш народ перестрадавший столітня в неволі гнета и насильства за русску віру и народность, буде жити дальше тым своим народным духом. Мы будеме твердо вірити и надіятися, што приде такий час для нашого народа, што подобно, як євреи отзыскали свою отчизну Палестину, як потомкы русскых Козаков Булавина послі 250-літного побыту на чужині, вертаются на свою родину до Совітского Союза, або як сам наш Д-р. С. Пыж, незадолго до свойой смерти писал: “Мы віриме, што правда и справедливость побідит, и што наш народ отзыскат свою отчизну Лемковщину, як и польский народ отзыскал страчены стародавны польскы земли на западі”.

Тото важне событие и памятник “Вічной славы героям, павшым в бою за освобождение землі и свободы народов на Лемковщині, на долині смерти, в Карпатах”, останеся не лем историчным документом в истории славянства, но также трагедия створена на той самой Лемковщині с лемками-русинами, останеся жити вічно в карпаторусском народі, як “Долина народного житья або смерти”, пострадавшего невинно от новомодного и непонятного “социализма”.

Такы важны, болізнено-сочувственны народны события, як трагедия насильного выгнания лемков-русинов, тым больше, што то была нарочна, незаконна и спровокована акция насильства над невинным народом, така акция насильства врізуєся глубоко в душу и отражатся на чувстві невинно пострадавшого народа.

Память о такых важных событиях буде жити вічно в народі, який в твердой народной вірі и духу буде ожидати свойой народвой правды и свободы, бо живый народ не дастся николи свідомо за жива погребати.


А. А. Ц.,
Лемко от Прадіда.



[BACK]