DiffKinds63
Сут люде ріжной масти
И не вшиткы єднакы;
Бурнуасты, серпасты,
Лісты, істы всілякы.

Сут люде добры, але мало,
Сут и злы, як собакы,
Сут хитры и коварны,
Сут гарды и брыдакы.

Сут люде віруючы,
Баптисты и мормоны,
Што не курят дугану
И не пьют самогоны.

Сут люде одсталы,
Сут бідны и богаты,
З них дуже корыстают
Попы и целибаты.

Але вшиткы бы хтіли
Сами єдны — всьо мати,
А зас другым лем кусцьок,
Або нич не дати.
————o————
Придут часы даколи,
Придут часы золоты,
Же никому не бракне
Ни хліба, ни роботы.

Каждый буде мал місце
Для свойой родины,
Жити буде спокойно
До остатной годины.

Вшиткы будут безпечны,
Войны совсім не буде,
И на нашой планеті
Счастливы будут люде.

В счастью жити будеме,
А стару нашу біду
Зашиєме до мішка
Тай пішлеме в Антарктиду.

Най ю фрас заморочит
Раз на все и навікы,
Жебы уж не дусила
Нашого человіка.

Вытруєме всі щуры,
Вынищиме комары,
Жебы были здоровы
И молоды и стары.

Жебы долгий вік жили,
В достатку проживали,
И аж понад сто роков
Старикы умерали.

И буде у нас безпека,
Лем нам треба признати,
В каждом иншом чловеку
Не ворога, лем брата мати.

Лем єдна правда на світі,
Двох правд быти не може,
Як єдно “А” в алфавиті,
Двох “А” ніт, верабоже!


[BACK]