Пред Нашыма Воротцями — Параска Лучковец
Пред нашыма воротцями
Красна заграда.
Гей, гей, проходится моя мила (2)
По ній барс рада.
Проходится, прибератся,
Яко в неділю.
Гей, гей, милый на ню поглядає (2)
В кажду годину.
Стала-м собі край віконця,
А мой милый там.
Гей, гей, наша хижа неметена (2)
Што я робиц мам.
Идте, мамцьо, на пред него,
Поговорте там.
Гей, гей, най я свою стару хижу (2)
Раз позамітам.
Сіла собі край столика,
Дрібно вышиват.
Гей, гей, милый на ню споглядає, (2)
Она замліват.
Не замлівай, драга душко,
Так мі Бог тя даст.
Гей, гей, як на новый рок зозуля (2)
Три раз закукат.
Ид ты от ня, фалечнику,
Бо я не глупа.
Гей, гей, бо на новый рок золуля (2)
Нигда не кукат.
Вшитко Пан Бог добрі дає,
И то може дац.
Гей, гей, бо на новый рок золуля (2)
Може закукац.

Параска Лучковец, из с. Михалів.

[BACK]