Выводжают Дружкы
Не тота, не тота,
Наша молода золота,
И до тых ся принимаме,
Бо мы для них дружбов маме.

А тота юж тота,
Наша молода золота,
Выйд молодый из-за стола,
Вос ты собі біленького сокола.


ЛАТКАНИЦЫ:
Не зовсім сте выграли,
Бо сте вінец не достали.


СВАШКЫ:
Не буде тому конец,
Покаль нам не дате вінец,
Вінка зеленого,
Для нашого молодого.

Дали сте нам, дали,
Молодому жену,
А теперь нам дайте —
Віночок зеленый.

Дайте же нам дайте
Ручника білого,
Ручника леняного
Опасати молодого.

Дайте же нам, дайте,
Ядвабны хусточкы,
Жебы мы сой могли
Втерати гамбочкы.

Горами зме ишли,
Водами мы пришли,
Дробна роса падала,
Сукнечкы нам змачала.

Дайте же нам ручничкы,
Повтерати сукнечкы.


ЛАТКАНИЦЫ
Наша молода долго спала,
На ручничкы не напряла.


СВАШКЫ:
Она о том добрі знала,
На ручничкы нам напряла,
А на кроснах сама ткала,
На ріни водом поливала.


ЛАТКАНИЦЫ:
Будеме окипля трясти,
Свашкам на ручничкы прясти.


СВАШКЫ:
Повідала єдна баба,
Же полотна полна лада,
А теперь юж мы выграли,
Бо ручничкы мы достали.


ЛАТКАНИЦЫ
Не совсім сте выграли,
Бо коровай сте не отдали.


СВАШКЫ:
Прид мамонько пред нас,
Отбер коровай от нас,
Наш коровай мальованый,
Для мамонькы даруваный.

Як не придеш одобрати,
Будеме го продавати,
На вино, на горілку,
На солодоньку медівку.


ЛАТКАНИЦЫ:
Штырі сватенькы, штырі,
На коровай ся складали,
Вшиткы млинцы вымітали,
Жебы коровай мали.


СВАШКЫ:
Жадны млинцы мы не вымітали,
Бо мы свою муку мали.


ЛАТКАНИЦЫ:
Там сте на нього воду брали,
Де ся гуси полокали.

Наша пшеничка з гаю, а водичка
из поточка, з под кычеры.


ЛАТКАНИЦЫ:
Придте, латканицы, пред нас,
Отберте латканик от нас.


СВАШКЫ:
Домів латканицы, домів,
Свиням полову мішати,
Не ту на весілю —
Свашкам доганяти.

Треба бы нам, треба,
Стольца широкого,
Бо наша молода
Роду великого.

Роду богатого,
Стану малженского,
Треба бы нам, треба
Стольца широкого.

Сходжайся, родинонько,
3 Гіря и з Поділя
До семого поколінья,
А єст ту той родинонькы,
Як у полю калинонькы.

Што за Божа годинонька,
Не сходжатся родинонька,
Ци на поли не зробила,
Ци ся дома забавила?

Юж пришол час и година,
Зышла нам ся вся родина,
Грайте гушелькы виско,
Кланяйтеся молоды низко.

Благословенства глядай,
Як от няньця, от мамочкы,
Так и близкой родинонькы
И поблизкой сусідонькы.

Поблагослов, мамочко,
Своє любе дітяточко,
А мамочка так мовит,
Най тя Господь Бог благословит.

Идеме до церковці
Порушати короновці,
Бо уж давно нерушаны,
Нашы дівкы затриманны.

Сідит пташок на липоньці,
Кличе попа до церковці.
Мусиш, попе, рано встати,
Нашым чадам шлюбу дати.

Жебы мамонька знала,
Як дівонька присягала
Пред Богом и святым Крестом,
Жебы была невістом.

Были зме до шлюбу,
Але зме не достали,
Нашы молодята —
Отченаш не знали.

Почала молода
“Отченаш” гварити,
Але наш молодый
Не знался перекрестити.

Наша молода, наша,
Поімала пташа,
Брез крылец, брез перечка,
Молодого чоловічка.

А до шлюбу єдно,
А зо шлюбу двоє,
Призрийся мамичко,
Ци твои обоє.

Выйд мамонько зо світлицы,
Почестуй зятя зо шкляницы,
Не честуи його самого,
Але всю дружину його.

Наша мамцьо золотенька,
Ци готова вечеронька?
Дайте до кухні знати,
Най нам дадут вечеряти.

Курочку печену,
Гусочку варену,
Телятинку молоденьку,
Бо підеме в дороженьку.

Дали сте нам дали
Петрусьови жену,
А теперь нам дайте —
Курочку печену.

Барана цілого,
То ся забавиме
Аж до дня білого.

Была бы з мя была
Свашка премилена,
Жебы мі стояла,
Палюнка варена.

Горилка варена,
Курочка печена,
Была бы з мя была
Свашка премилена.


ДРУЖВОВЕ:
Дружба я сой дружба,
Горька моя служба,
Три дни-м овес косил,
Дружбити-м ся просил.

Дружба я сой дружба,
Юж єм додружбувал,
Остатні колеса
До пеца порубал.




[BACK]