Beskids
Нашы Родны Бескиды — А. А. Ц.
НАША РОДНА ЗЕМЛЯ, НАЙДОРОРОЖШИЙ СПАДОК
ОТ ПРАДІДОВ.

(Народна пісня, на голос: “За горами, за лісами”, або на
инший, подходящий голос, смутного напіва).

Заквітали на Бескидах сады, як калина.
Не така днесь, як давно была, родна Лемковина.
Были давно села нашы, людьми заселены,
Теперь они опустіли, домы понищены,
Коли лемкы в селах жили, было дость радости,
Хоц и бідно, не с роскошу, а любой милости.
Жили они, як родина, бо не мали злобы.
Спольно собі помагали, в біді и потребі.
Были тогды орны поля, ланы засіяны,
По дубровах и долинах — отавы зелены.
В горных лісах на полянах выпасали волы,
Сивы сейкы и барнясты, шаргы круторогы.
По гомолях и щобиках, стаєнкы-колибы,
На паствисках и по жбырах, там стада худобы.
Кругом всяды на хотарі пастухы співали,
Птахы в лісах и по садах, край резвеселяли.
Жили лемкы там в Карпатах от діда-прадіда,
С обоих сторон там по горах, зеленых Бескидах.

* * *

Но побіда на Бескидах, за народну волю,
Приманила лемкам здраду, народну неволю.
Польска влада нам русинам судьбу вырішила,
На выгнанье лемков, долю силом накинула.
Ударил гром с Ясной Гуры, рычыт шаркан от Магуры
Зберайтеся пречь “Русіны”, гын далеко на Мазуры.
Приказ с горы, по неволі, мусіл руснак брати,
Своє майно, яке што мог, на возок складати.
Вчас раненько повставали, чудуются люде,
Што за чудо теперь с нами, в новой Польші буде?
Бо нич таке не відили, ни мы не чували,
За свободу боролися, родну землю защищали.
На другий день, ище зрана, моц войска пригнали,
Штобы лемков с родной землі, кольбами выгнали.
Зарыдали отец-мати, діти, вся родина,
Коль штыками и кольбами, выгнали русинов.
Загреміли по Бескидах, громы над природом,
Плаче земля, лісы, горы, за своим народом.
Закупала зазуленька несчастну новину,
Як лишали русскы люде родну Лемковину.
Так выгнали нас сто-тысяч лемковского роду,
Кольбом-штыком под конвойом, гнали, як худобу.
Плановали, душегубы, лемков выгубити,
Штобы там на русской землі слідов не лишити.
Тужат лемкы, пісни снуют о несчастной долі,
Яку они получили от польской “сваволі”.
Не буде на світі згоды от людского горя,
Покаль над свободом гнете нацистска потвора.
Ктоже нам даст теперь раду, где глядати правду?
Штобы правно привернути законну свободу.

* * *

На землю родных Бескидов вандалов пустили,
Штобы нашы родны села, культуру знищили.
Теперь земля не съорана, краяками заросла,
Бо ніт газды, ніт порядку, ніт ани чересла.
Ни пташина так не співат, зазуля не кує,
Хыбаль дагде понад жбыры сірый вовк завыє.
Осталася коло Дуклі, лем “Долина Смерти",
На памятку живым людям, а не тым помертым,
Красуєся там памятник в честь их построений,
Павшым борцам за свободу в ярмі угнетенных.

* * *

Поверх Карпат, понад горы сгущаются хмары,
Шаркан приде, буря знесе, чорну чуму гын на мары.
Коли голос правды знищит, ядро наци-чумы,
Тогды тріснут стіны, двери той народной тюрьмы.
Но мусиме и мы теперь о то ся старати,
Цілом душом, щирым сердцом помочь им подати.
Дух народный не загине, ни правда, ни воля,
Хоц постигла нашых лемков несчастна недоля.
Нашы лемкы характерны, тверду віру мают,
Любят правду и свободу и такой жадают.
Лемкы люде справедливы, за свободом чают,
Своє любят и шануют, чуже уважают.
Бродят они по чужині, за крайом бануют,
Ожидают доброй вісти, што ся повертают.
Бо на світі ніт мильшого, як родна краина,
Свои горы, лісы, поля, найблизша родина.

* * *

Такий найдорожший спадок нам предкы лишили,
От них землю и культуру мы отдідичили.
Предкы нам єй передали, хранити казали,
За нияку ціну в світі дати не казали.
Мы віриме, час настане, што правда воскресне,
На Карпаты ясна зоря свободы заблесне.
Як с востока над Ротундом зыйде ясна зоря,
Вернут домов горды лемкы назад из Поморя,
Як на весну на Бескидах росквітне калина,
Тогды вернут вшиткы лемкы на свою родину.
Ой ты люба земля наша, наш родимый краю,
Чом так долго там чекают — Свободу не дают!

Уложил А. А. Ц.

[BACK]