Barrel Wagon
Чудо в Бочкі — Яков Дудра
Не пишу я ту днес
Жадны истории,
Лем о том, што-м виділ
В Чехословакии.

Там коло Пряшева
На богатом селі.
Где люде не ідят
Николи карпелі.

Была там, в том селі
Барз богата фара,
И достали до ней
Нового фарара.

Як взріл старый Ондро
Нового фарара,
То отразу крикнул:
— Красота, пся-пара!

А потом до людей
Штоси кус пошептал
Напевно дурниці
Им там не телепал.

Люде меже собом
Вспольный язык нашли,
Тай вшиткы купочком
До рыхтаря зашли.

Бо Ондрову мысель
Хтіли предложити,
Жебы ся на вино
Для попа зложити.

Як бы каждый принюс
С под свого номера
Єдну литру вина
Днес ту до вечера.

Было бы на вечер
Двасто литров вина,
Бо тилько нумеров
Ма наша дедина.

Рыхтарь тото попер,
Што люде хотіли,
И дораз по вино
Люде полетіли.

Але єден бідак
Мал дуже діточок,
Он не пил вина,
Який долгий рочок.

Што я буду робил —
Богатым выгоду?!
Зачерпнул и налял
До збаночка воды.

Єдна литра воды, —
Подумал хлопина,
То так, як бы плюнул
В двасто литров вина.

На збанок положил
Біленьку шматочку,
Понюс до рыхтаря
И влял скоро в бочку.

Из той вспольной жертвы
Смішно барз выпало —
Была бочка воды,
А вино пропало.

Бо як думал бідный,
Так вшиткы думали,
Прото вмісто вина —
Воды назливали.

Як бы в каждой спільці
Люде так думали,
Як тоты, што воду
До бочкы зливали,

То як бы робили,
Так бы вконци мали
И лем сами себе
Бы ошукували.

Котры люде сильны,
А робят, як слабы,
То ходят на рыбы,
А приносят жабы.






Яков Дудра,
Лосье, Лемковина.
[BACK]