50-Літны  Юбилеи  Супружества
Klimkovsky

ИВАН И ЮЛИЯННА КЛИМКОВСКИЙ

Осмого июля 1962 року любимы діти Ивана и Юлианны Климковскых устроили им торжество в честь их 50-рочного юбилею супружества.

Юбилянт Иван Климковский походит зо села Мушинка, повіт Новый Санч, на Лемковині. До Америкы пришол в 1907 року до Форест Сити в Пеннсильвания штаті. О недолгий час переселился до Ньюарку, Н. Дж.

Юлиянна Климковска из роду Палубняк, из села Высовы, Горлицкого повіта. До Америкы пришла тоже в 1907 року, просто до Ньюарку, Н. Дж. Там в Ньюарку они познакомилися и поженилися в русской православной церкви.

Неодолга по свойой свадьбі поіхали до краю, до села Мушинкы на господарку. Но той господаркы долго не было, бо они рішили повернутися назад до Америкы, и то наступило в 1913 року, но они просто с краю осілися в городі Стамфорд, Конн., где от того часу счастливо проживают.

Торжество в честь их 50-рочного юбилею супружества устроили им их четверо дітей Павел, Федор, Петро и донька Орина, сім внуков и два правнукы. Тота несподівана гостина-забава была в реставранті. Была запрошена вся близка родина з Ньюарку, Н. Дж., Питтсбурга, Па., Нагатик, Конн., Вайтстон, Л. Ай., Н. Й., и вся родина в Стамфорд — кумство и сватовство.

Гості забавлялися весело при доброй музыкі и танцях.

Сбора на народну ціль не было, бо то діти так несподіванно зробили, што всіх помішали, но юбилянты жертвовали сами от себе 20 долляров на пресс-фонд нашой газеты “Карпатска Русь” в знак подякы всім гостям за участь в торжестві и подарункы.

А молодой парі Юлиянні и Ивана Климковскым желаю многая и благая літа при добрі крепком здоровью.

Присутный Гость.
Стамфорд, Конн.



Chupik

АНДРЕЙ И АННА ЧУПИК

22-го января 1962 года сполнилося 50 літ супружества Андрея и Анны Чупик, котры жиют в Виллимантик, Коннектикат штат.

Юбилянт Андрей Чупик походит из прославленого теперь села Білянкы, Горлицкого повіта на Лемковині, сын Дмитра и Параскы Чупик, а юбилянтка Анна походит из села Высова, того самого повіта, дочка Юрка и Марии Васильчак.

До Америкы из родного краю они посприходили: Андрей в 1907 року, а Анна в 1909 року, просто до міста Виллимантик, Конн., в котром жиют до днеска. Обоє Чупикы, як мож сподіватися, вышли уж на пенсию.

За тых 60 роков Чупикы были свідками великых перемін до прогрессу в свойой місцевости, котра в часах их прибытия была барже дика и неусвоєна. Днеска там єст модерне місточко зо всіма удобствами до выгодного, чистого и спокойного житья.

Они вінчалися в 1912 року, але як вспомнено, містность была пуста, то мусіли идти аж до Нью Бритейн, абы взяти шлюб по свойому русскому обряді. В тот час настоятельом в Нью Бритейнской русской православной церкви был о. Букетов, котрый их вінчал.

Дружбом им был Пахнутий Ющак, тоже родом из Білянкы, а дружком Костка Ющак, котра єст теперь женом Пахнутия Ющака. Другий дружба, брат юбилянткы Ваньо Васильчак, што жиє в Джерзи Сити не мог придти на юбилей про слабе здоровья, лем прислал дорогий подарунок на знак памяткы.

Ани брата донька Юстина Видяте не могла придти, лем прислала подарунок.

С нагоды той торжественной рочницы супружества Андрея и Анны Чупик их любима дочка Улька устроила им велику и дуже милу несподіванку, котрой они не сподівалися.

Пришли они рано, як звычай до церкви, а при отправі свящнник объявлят, што при конци буде молебень за здравие Андрея и Анны Чупик по поводу их 50-літного юбилею супружества, а послі того, абы всі зышли на долину в галю на обід.

Галя была убрана отповідно до того юбилею с написами и столы застелены білыми обрусами с золотыми квітами.

Выпало так, што и другий юбилей несподіванно показался, а то их донькы Улькы Вуяйцік Чупик, а то 25-літный. Так мы разом с доньком тоты юбилеи празднували, бо нас было дві пары.

Приходит дружка с першого весіля Костка Ющак Крейничин, Улька Махнич, дружба Пахнутий Ющак, поздоровляют их, а ту уж и музыка весільный марш грає. Гості подносят тост на здоровья молодым парам. Гостям доносили істи и пити, а хор співат многолітствия.

Был там и майор міста Виллимантик М. Врона, Обшарский, Махнич, Нанчак, Шаленкевич, Горб, Баран, Бруско, Галет, Воран, Дудик, Нагорска, Звіречкы и другы.

При той так занятой гостині не забыто й за пресс-фонд для нашой газеты “К. Русь”, для котрой собрано 23 долл., бо юбилянты приятели народной газеты и многолітиы єй читатели.

Молодой парі юбилянтов желаме многых и веселых літ прожити в полном счастью и здоровью.

Юбилейный Гость,
Виллимантик, Конн.



Juschak

ПАХНУТИЙ И КОНСТАНТИНА ЮЩАК

Нашым краянам Пахнутию и Константині Ющак, котры жиют в Виллимантик, Конн., 19 октября 1962 року, сполнилося 50-літие их супружеского житья, котре они прожили в доброй любви и згоді.

Юбилянт Пахнутий походит зо села Білянкы, Горлицкого повіта, на Лемковикі, сын Прокопа и Марии Ющак, а юбилянтка Константина, дочка Антония и Теклі Крыничины, зо села Ганчовы, того самого повіта. Пахнутий пришол до Америкы в 1907 року, а Константина в 1909 року. Обоє пришли до Виллимантик, Конн., и там жиют до теперь.

Выховади они троє дітей, всі троє высоко образованы. Найстарша дочка Анна Оседач — артистка, друга Мария Барановска, профессиональна співачка, а третья дочка докторка, жиє в Нью Йорку місті.

Тоты дочкы зо своим мужами устроили несподівану гостину в честь своих любимых родичов, при помочы близкых приятелей, як Анны Гнат, Анны Обшарской и другых. На юбилейне весіля посходилася родина не лем с близка, але и з далека. Родині Станчаков из Клифтон было припоручено руководити цілом церемонном, як то проводятся юбилеи с многыми подарунками и ріжными несподіванками.

Нашы юбилянты мают четырьох внуков, єдну внучку и єдного правнука.

Наш любимый краян староста Ваньо Станчак не забыл и за нашу прессу “Карпатску Русь” и на його призыв было собрано меже гостями 43 долляры.

Сердечна подяка всім гостям за участь в юбилею и за жертвы на добре діло.

Анна Чупик,
Виллимантик, Конн.



Lopen

СИМЕОН И ЮЛИЯННА ЛОПЕНЬ

В субботу 28 июля 1962 р., в день праздника ровноапостольного князя Владимира отбылася торжественна и радостна юбилейна гостина по поводу 50 рочницы супружества Симеона и Юлии Лопень, проживающых в Байонн Н. Дж.

Ище з рана, послі богосложения в містной церкви прот. о. Михаил Чанда совершил над ними молебень за здравие и благобытие, при чом, яко настоятель своим прихожанам пожелал всіх благ.

Вечером послі богослужения в церкви всі запрошены гості зышлися на богато устроєный любимыми дітьми банкет. Были присутны их діти, сын Петро зо женом и дочком, дочка Мария с мужом Стефаном Полянскым и свахом Мариом Полянском, а тоже наймолодший сын Михаил и сестра Теодосия Ротко с дочком Антонином.

Из далекой Канады был родный брат Иван Липень, с котрым они не виділися долгы рокы, и их сестры сын Джери Лісный, с котрым они ище николи не виділися. Был тоже другий брат Василь Липень зо женом и сыном, сват Матвей Марич из Джерзи Сити, Н. Дж., другий сват Стефан Дичко и братняк Петро Филяк из Ньюарку и кума Юлия Зебан, и Стефан Кулина зо женом и дітьми из Менвилл, Н. Дж. Родина пришла с богатыми подарками для юбилянтов.

Старостом юбилейного весіля был сын Петро, котрый призывал гостей до бесіды и тримал церемонию в порядку и веселом настроєнию. Настоятель о. Чанда и друг родины Лопень Андрей Пелехач кромі поздравлений произнесли глубоко обдуманы бесіды о житью “молодят”.

На предложение самого юбилята было вспомнено пару добрых слов о нашой любимой газеті “Карпатска Русь”, послі чого юбилянты враз с гостями зложили добровольну жертву на єй пресс-фонд в суммі 64.75. Сбором и записком занялися Андрей Пелехач и Федор Риндик.

Симеон Лопень, рожденый в Джерзи Сити, Н. Дж., в 1887 року. Послі двох роков житья родиче, вертаючи до краю вынесли и його зо собом до села Конечной, повіт Горлицы на Лемковині. А жена Юлиянна из роду Шевчик рождена в Конечной, там они выросли и поженилися в 1912 року.

Коли выбухла І Світова война Симеон был позваный до австрийской армии и счастливо повернул домів и начал господарити, бо мали двоє дітей, сына Петра и дочку Марисю. Но повоєнна господарка была дуже тяжка, бо всьо было знищене, то Симеон вернул в Америку в 1923 року, но жену и дітей йому удалося стягнути аж в 1929 р. Теперь мают 4-фамилийный дом, в котром жиют сами, их діти и сестра Теодосия Ротко с дочком.

Дай им Боже всім здоровья и радости проживати так с нами надальше.

Андрей Пелехач,
Байонн, Н. Дж.



Balun

ЮСТИН И ЮСТИНА БАЛУН

Прекрасну и дуже веселу гостину по поводу 50 рочного юбилею супружества Юстина и Юстины Балун, в Сингак, Н. Дж., устроили их любимы діти. Балуны женилися 23 июня 1912 року в городі Симор, Конн., но остатных 35 роков проживают в Сингак, Н. Дж.

Юстин Балун походит зо села Волі Цеклинской, а Юстина из роду Попівчак из Гуты Перегримской в повіті Ясло, на Лемковині.

Пришла на торжество родина с подальша, брат Юстины Стефан Попівчак с фамелиом, обоє Иван Свегляк и Петро Драган зо Стамфорд, Конн., обоє Павло Бозик и друга родина с Пеннсильвании.

Юстин Балун прибыл до Америкы в 1909 року, а його жена о рок позднійше. Юстин Балун, то сусідна хижа Михала Донского, извістного командира партизанскых отрядов, боровшыхся против німецкого оккупанта нашого краю. Юстин пришол до Юнкерс, но ту роботы про него не было, то написал до знакомого Петра Сокола в Симор, Конн., котрый постарался о роботу для новоприбывшого Юстина. Они женилися в 1912 року в русской православной церкви в Ансонии. Юстин робил там в желізной фаундри (стальолитейни), где были му лоламаны ногы, послі чого вылежал в шпыталю 6 місяцов. Пришли потом діти, двох сынов и дві дочкы, то житья было дост трудне, а и горе приходило, бо дочка Мария померла в молодом віку, на 24 року житья. Осталися найстарший сын Михаил, Петро и дочка Ольга. У них єст десятеро внуков, то с тым теперь сут счастливы.

Юстин Балун єст знакомый в Лемко-Союзі зо свойой народной роботы. Он читал газету “Лемко”, коли она выходила ище в краю. Он належал до основателей отділа Л .С. ч. 29 в Ансонии, Конн., а потом и в свойом місточку Сингак, Н. Дж., котрый головно удержувался на нім самом, бо там мало нашых людей.

“Молодиця” была обдарувана весільным бальцом, а понеже она любит жарты, то заспівала сой над ним стародавну весільну: — “Дайся, барваночку, вити”.

Нашым юбилянтам Юстину и Юстині Балун желаме дождатися хоц лем десят правнуков, абы мали чым радуватися в свойом золотом приклонном віку. Най с нами жиют юбилянты на многая літа.

Юлия Попівчак Пєтро,
Сингак, Н. Дж.



Dripchak

МИХАИЛ И РОЗАЛИЯ ДРИПЧАК

В городі Симур, Коннектикат, дня 7-го октября 1962 року отбылося торжество в честь 50-рочного юбилею супружества Михаила и Розалии Дрипчак. Розалия Дрипчак з роду Барна. Обоє они походят зо села Ліщин, Горлицкого повіта на Лемковині.

До Америкы приіхали обоє молодыми, Михаил в 1906 року до міста Шенандора, Па., а Розалия до Джерзи Сити, Н. Дж. По даяком часі Михаил приіхал тоже до Джерзи Сити, где достал добру роботу за механика в Стандарт Ойл. Там он и познакомился с Розалиом и повінчалися 5-го октября 1912 року, в русской православной церкви свв. ап. Петра и Павла. Лем даскілька літ жили в Джерзи Сити, бо потом переселилися до Симор, Конн., бо Михаил получил роботу в Ансонии в стальовни, тоже за механика и там выробил аж до свойой пенсии.

Выховали красну фамилию, єдну дочку и четырьох сынов. Дочка и трьох сынов женаты, меже ними єст 11 внуков и двох правнуков. Тоты любимы діти устроили своим родичам юбилейну гостину в великой гали Русского Ситизенского Клуба, до котрого всі они належат. Гостина была в неділю дня 7 октября 1962 р.

Гості посприходили с подальшых околиц, як Джерзи Сити, Нью Йорка, Бруклина, Ватербери, Шельтон, Ансонии и Симор. Старостом послужил сын Стефан. Юбилей отбывался по всім законам и обычаям такого торжества, зо співами, музыком, подарунками и пожеланиями.

При той так веселой гостині можна много річей забыта, но мы не забыли за пресс-фонд нашой любимой нами газеты “Карпатска Русь” и зме собрали на тоту иіль 57.25 долл. Сбором при заохоті юбилянтов занялся талергофец Осиф Сим и я, пишущий тоты строкы.

Уважам, што належится велика подяка такым дітям, што не забыли почтити своих родичов в день важной рочницы их супружества, а юбилянтам пожелания многых счастливых с крепкым здоровьом літ, на што они собі честным житьом заслужили.

Пантелеймон Крилівский,
Шельтон, Конн.



Vorobel

КИПРИЯН И ОРИНА ВОРОБЕЛЬ

Киприян и Орина Воробель, котры жиют в Вулф Рон, Огайо штат, коло Амстердаму счастливо и в любви дожили до свого 50-рочного юбилею супружества, торжество, котрого было им устроєне в місяци августі 1962 року.

Киприян Воробель, сын Лукача Воробля и мамы з роду Галькович, походит из села Богуша, Новосандецкого повіта на Лемковині, а Орина Воробель из роду Каня, походит зо села Флоринкы, бывшого грибовокого, а теперь тоже Новосандецкого повіта.

До Америкы приіхали молодыми людьми до города Питтсбурга. Там они роспозналися и поженилися 10 августа 1912 року. Весіля их отбывалося в приватном домі Максима и Теодосии Воргач на Саут-Сайд в Питтсбургу.

Но долго там не были, бо большу часть свого житья провели в майнерском поселению Вулф Рон, в штаті Огайо, где выховали красну фамилию складающуся из десятеро дітей, лем єден сын Николай помер. Решту діти всі женаты и мают меже собом 19 внуков для діда и бабы и єдного правнука.

Так тоты діти, внукы и правнук устроили своим близкым родичам гостину в их 50-рочницу супружества, на котре зышлося много народа так містного, як и с подальша, приміром, краянка Теодосия Воргач из Питтсбурга, Па., в котрой домі отбывалося правдиве весіля Кирияна и Орины Воробель, были дочкы по родині Дроздяк из Микизрокс, Па. Йоанн Карбовский и сын Николай из Филадельфии, Па., а то бывшы их сусіде, Текля Пыж и сын Йоанн из Байфорд, Па., сын по браті Давид Воробель из Кливланду, О. и др.

Тот Давид Воробель и талантливый сын Кохана Григорий оба музыканты и они розвеселяли публику своими гармошками. Старостом послужил им сын их краянов молодый американец Владимир Вильчацкий.

Киприян Воробель, то сознательный краян, читатель нашой газеты “Лемко” и щирый жертвователь на ріжны народны потребы. В часі весіля был проведеный сбор на Талергофский Памятник в Лемко-Парку, а для пресс-фонда юбилянты жертвовали 10 долларов.

Владимир Вильчацкий,
Вулф Рон, О.

——————o——————


[BACK]