35-Та Рочница Первой Рекорды и Фильма «Лемковске Весіля»

Stefan Skimba

Стефан Шкимба

Инициатор, составитель и участник издания першой лемковской рекорды, а потом организатор, первой фильмы
“Лемковске Весіля”.


Наш сегорочный карпаторусский календарь Лемко-Союза в Америкі, так бы повісти — приуроченый 35-той рочници першой рекорды “Лемковске Весіля”, а лучше, першой лемковской рекорды вообще. Сего року минат 35 роков с того часу, як была создана и пущена в світ перша рекорда, котра послужила началом першого “Лемковского Весіля” на фильмі в слідуючом року.

Рекорда “Лемковске Весіля” изображала лем звукы співу, музыкы, церемонияльных проповідей и обычайовых жартов, а фильм, кромі того, показувал уж красоту природы Карпатскых гор, архитектуру лемковского села, народну ношу и вообще народне бытие. Всьо то вкупі взяте представлят культурне наслідство, створене нашими предками и передаване с покоління на поколінне.

35-та рочница не єст така славна и надатна для празднования, як приміром 50-та або 100-на. Не по заокругленом числі мы рішили почтити начало першой лемковской рекорды и фильма, а по двох иншых важных причинах, котры сталися актуальными именно в теперішный момент, в 35-ту их рочницу.

Выпало якоси-то так, ненароком, што рекорда “Лемковске Весіля” появилася наново ку свойой 35-той рочници минувшого року. Обычай, співы, мельодии, музыка, жарты и всьо проче остало по старому. Рекорда змінена лем технично, и приспособлена так, што появилася в такой формі, якого выжадує прогресс зробленый в техникі за тот час. Попередно было всіх девят рекордов и три рекорды “крестин”. Тоты всі рекорды переведены на єдну рекорду неламаючуся, пригодну до новых грамофонных машин. Для рекорды приготовлена отповдіна обгортка, о котрой можна повісти, што має не меньше значение, як и сама рекорда. Фронт обгорткы захватчивый своими фотографиями. На передной стороні фотография составителя, инструктора и издателя той рекорды Стефана Шкимбы в стародавной народной ноші, дальше фотография оригинальных исполнителей рекорды співачок и музыкантов, четырі дівчата в народном крою села Команьчы на Лемковині. Драматичного виду надає в 1962 року загорткі-окладкі велика фотография представления “Лемковского Весіля” из Кливланду, Огайо, ставленого в 1952 року. Тот вид дає вступ до того, што роскаже уху каждого слухающого рекорда. Ище важнійша оборотна сторона огорткы. Там ніт фотографий, а коротко составлена история Лемковины о населению, территории, етнографии и истории и вообще о прошлом и теперішньом єй положению. Написана по английскы, штобы и наше в Америкі и Канаді поколінне могло узнати и изучати историю своих предков, и штобы и чужы люде познакомилися з лемками. Натилько то слідуюче переиздание рекорды важнійше першого.

Друга, може ище важнійша причина, чом мы рішили так особливо отзначити 35-ту рочницу рекорды и фильмы, то тота, што як раз теперь находимеся в горячом розгарі подготовкы до новой фильмы “Лемковске Весіля”. Відомо вшиткым из газеты “Карпатска Русь”, што под проводом Теодора Рудавского из Линден начался рух за фильмование славного своими ртадициями и богатством красоты звуковой и кольоровой фильмы “Лемковского Весіля”. Тота діятельность єст так важна, што она ватрат, штобы на ню звернути увагу и помочи всіми силами выполнити єй. Бо коли рекорду “Лемковске Весіля” можна было переиздати без змін, кромі техничного удосконалення, то до старой фильмы звук трудно а, кольор просто не можливо додати, абы привести єй до стану, якого вымагают днешны часы. Но а треба знати, што пестрота кольоров в весільной церемонии и звукы співу и музыкы, голос родной бесіды, то дуже важна половина цілой штукы.

До приготовления фильмы организовался широкий комитет, до котрого входят краяне лемкы из обох частей Лемковины и Пряшевщины и барже с каждого повіта и тот комитет под руководством Алексия Бідника енергично працує. Директорство весільом передано в руки способного краяна Николая Гойдича.

Michael Duzey

МИХАИЛ ДУЖИЙ

Инициатор и техничный руководитель першой фильмы “Лемковске Весіля”.

Нове переиздание рекорды и фильмы уж має и буде мати в будучности высоко благоприятны наслідства. Но не треба ани на минуту забывати, што издание першой лемковской рекорды, котру можна завдячити лем єдному Стефану Шкимба, не лем за предвиджиня, но и за риск и вытрату при том, бо тым його чином был побужденый до житья не лем Лемко-Союз, але весь рух и борьба за свободу и счастливше житье того народа, там на родных землях. Шкимба побудил до житья занедбану, а так дорогоцінну культуру крыючуся в гущі нашого народа. В Америкі и Канаді не было єдной лемковской душы, где не мали бы рекорды Лемковского Весіля. Книжкы, газеты свойой не мали, а рекорду мали. О лемках из рекорды дозналися всі их сусіды доокола.

Што зробила рекорда, не вшиткы дадут признательность, но рекорда побудила створение фильмы “Лемковского Весіля”. Фильм начал показуватися уже по місцевостях, но в тот сам час наступило техничне удосконаление, явилися звуковы, а такой за тым кольоровы фильмы. Показувати беззвучный фильм уж стало застареным и невозможным. Но рекорды ишли дальше. За Шкимбом Голутякы-Кузяны награли “Лемковске Весіля Сяноцкого повіта”. 3 рекордов прозвучали прекрасны лемковскы співанкы Анны Дрань и Євы Долина, могучий свойом красотом голос Марии Гончарик и множество другых отдільных співаков и півчых и музыкальных групп.

В календарю Л. С. на 1947 рок зведеный неполный список лемковскых рекордов дошол до близко 200 народных співанок. Покойный Др. С. Пыж, составитель того календаря, заявил так, коли переглянул список: “Што то за сила в нашом народі! То єст громадный труд и енергия, положеный в том.” А то всьо створилося без даякой специальной кампании.” А в свойой статьи, поміщеной дальше, Стефан Шкимба додал, што то было зроблене в додатку без помочи интеллигенции.

От, што єст велике в том ділі, бо мы от себе додаме, што наша интеллигенция не розуміла силы свого народа, и мало интересувалася глубинами його моральной культуры.

А тепер звернийме свою увагу на представления “Лемковского Весіля”. Где они лем не отбывалися? Всяди где лем была больша группа нашых емигрантов, составляли своє “весіля” с спросинами, загравинами, весільом и приданами. Таких Лемковскых весіл, было соткы поставлено на американскых сценах и в Нью Йорку, Пассайку, Питтсбургу, Кливланді, Юнкерсі, Бруклині и иншых. В Кливланді приміром ставили Лемковске Весіля в 30-роках нашого віка, а коли там остатный раз было изучене весіля, то оно гралося на сім заводов. Всі в околи ни хотіли штобы для них грати, каждый ишол видіти весіля. А як знаме, при такых традицийных представлениях существувал, розвивался и приходил до силы Лемко-Союз.

А были и такы місцевости, котры не связаны с Лемко-Союзом и они тоже изучали и ставили свои традицийны весіля на свою руку, як приміром и тото в Олд Фордж, котрого фотография на другом місци. В нашой газеті ани николи не знали што там ставилося Лемковске весіля, а оно ставилося аж три раз в околичных місцевостях.

Лемковскы весільны обычаи мают в собі єдну общу характеристику. Єдны и тоты самы события. Но талантливы до співу люде, вершикаре, поеты, кажду отдільну подію в весільной церемонии старалися оспівати по свому. Тым именно они розвили богату співну культуру и надали весільным обычаям глубокого задушевного содержания.

Stefan Harenchak

СТЕФАН ГЕРЕНЧАК

Помочник Стефана Шкимбы при устройстві многочисленных народных лемковскых предприятий.

Штобы поровнати як ріжнятся тоты обычаи, но головно співы, на другом місци мы поміщаме весіля составлене на рекорду Стефаном Шкимба, (зо села Воловец, Горлицкого повіта, а дальше весільны співанкы, собраны Анном (Милян) Кобан зо села Черемхы, Сяноцкого повіта, и співанкы уч. Андрея Куско, записаны коло Межелаборца на Пряшевщині. С тых приміников каждый познат єдно обще в обычаях но кажде событие оспіване инакшыми словами.

Но найперше поміщаме слово самого инициатора Стефана Шкимба о том, як родилася перша рекорда “Лемковске Весіля.”

Мы дуже ради, што в 35-ту рочницу он находится меже нами живый и здоровый, послі продолжительной недугы, и може власным пером и устами россказати нам, як повстала перша рекорда на котрой світ услышал нашой бесіды, нашых співов, мельодий и дознался о нашых прадідных обычаях.

О том, яке важне місце займе он в истории нашого народа, за то што знал оцінити и поднести культурне наслідство своих предков на олтар красоты и проложил путь вперед, чым дал почин народному движению, мы днеска воздержимеся оцінювати. Но оцінка буде велика.



[BACK]