Дорога в Небесны Просторы

Як давно люде жиют на Земли, и отколи почали познавати себе, так давно небесны пространства, котры виділи над собом, являлися для них великом необъясненом тайном. Што то єст пространство, с чого оно складатся, где оно кончится, людьми было створено много ріжных домыслов и теорий.

Gargarin
ЮРИЙ ГАГАРИН
первый человік в космосі,
герой русского народа.

Тоты загадкы нашых предков о пространстві, начала поясняти наука в послідных столітиях, а техника начала провіряти науку и теорию аж в нашы часы. Минувшых пару роков, сут тым периодом, в котром человік начинат робити первый крок в пространством. Провірку пространства с найбольшым успіхом завершил Совітский Союз. Єсли даколи люде полетят к другым планетам и передадут на Землю правдивы, провірены вісти, яке там житье, то кредит припаде русскым людям, што они дали тому початок и зробили перший крок в пространство.

Коли запуск першого спутника в орбиту Земли, запущеного Совітскым Союзом в 1957 року, и потом многочисленны запускы спутников Земли Совітскым Союзом и Соєд. Штатами были техничным штихом, то минувший рок уж можна назвати началом людского путешествия в небесны пространства.

Першым подорожным в такых высотах в позаземну атмосферу, где ніт воздуха, был русский молодец Юрий Гагарин. 12 апріля 1961 года он был посланый в кораблю-спутнику “Восток” в земну орбиту. А дня 7 августа минувшего року в орбиту был посланый другий молодец по имени Герман Титов, котрый кружил в земной орбиті 24 годин. В стані совершенной утраты вагы, он подобно, як и Юрий Гагарин, передавал відомости о свойой подорожы, о том, як чувствуєся и што видит. Оба они повернули на землю живыми и здоровыми.

Shepard
АЛЛЕН ШЕПАРД
американский астронавт.




Через пару тыждней и Соєдиненны Штаты послали свого молодого человіка в пространство Аллена Шепарда, а потом Вирджила Гриссом. Но так, як Соєдиненны Штаты ище не завладіли техником запуска в пространство спутников большой тяжести, их астронавты не попали в орбиту, и задержалися в безвоздушной зоні пространства всего по 5 минут. Их осідка на Землю тоже была сполучена с трудностями, они осідалися на океані, бо так их легче было выручити живымй. Перше выручение астронавта Шепарда и так было успішнійшым от выручения другого астронавта Вирджила Гриссома. То указує, што мы находимеся ище в ранной стадии открытия путешествия в небесны пространства к другым планетам, Марсу, Венері, Юпитері и другым. Но але то означат тоже, што початок подорожы человіка меже планетами настал за нашой памяти.

Так Советский Союз, як и Соєдиненны Штаты приготовляются к дальшым полетам не лем в Земну орбиту, но и к Місяцу и потом к дальшым планетам — Венері, Марсі, Юпитері и другым. В найблизше десятилітие люде получат много правдивых відомостей о том небесном, безконечном пространстві, котре было великом загадком человічеству в прошлой истории.




[BACK]