Теодор и Орина Сорока
Теодор и Орина Сорока
Теодор и Орина Сорока.

Теодор Сорока, родом из Яшковы, повіт Грибов, на Лемковині. Родился в 1884 року, приіхал до Америкы в 1908 году, до Олифанту, Па. Жена Орина рождена на Олифанті, Па., в 1888 року, но родиче забрали єй до старого краю до села Лосье, коли єй было 6 літ.

Орина єст дочка Григория и Євы Павляк из села Лосье. Приіхала до Америкы в 1909 року до міста Ньюарк, Н. Дж.

Женилися они в 1911 року в Олифант, Па. О два рокы позднійше переселилися до Бель Вернон, Па., и от того часу жиют в Бель Вернон. Выховали они велику фамилию — 8 дочок и 3 сынов. Не легко то было выховати тилько дітей и то под час великой депрессии, особливо от 1929 года до 1933 года через 4 рокы, но Теодор Сорока и зо свойом женом Орином поклали много труда, штобы таку велику фамилию выховати в русском духу, любити друг друга, почитати старшых и шанувати своих родичов — няня и маму. Сегодня они того не жалуют и сут счастливы, бо их желания исполнилися. Єден их сын, наймолодший, єст священником русской православной церкви в Стубинвилл, Огайо. Його имя єст: Теодор Сорока, молодший.

Точно о 11-ой годині рано была отслужена в Чарлеройской церкви отцом Владимиром Сорока Служба Божа и молебен. Церковь была переполнена гостями, котры были запрошены на тот юбилей. Послі отправы всі гості поіхали до Бель Вернон до готелю “Плаза”, где был поданый обід. Забавом руководил тостместер Петро Павляк из Амбридж, Па., швагер и брат Орины Сорока. Послі обіда были покликаны до слова о. Владимир Сорока, о. Теодор Сорока, Павло Павляк из Амбридж и мр. Драган. Всі бесідникы выражали юбилянтам Сорокам признательность и за их роботу, а особливо за роботу при Русском Народном Домі в Прайздейл, Па. При конци обіда было отспівано многолітствие и всі гості были запрошены до дому юбилянтов, где забавилися аж до пізна в ночы.

Я, яко староста того юбилею и брат Орины Сорока, желаю нашым юбилянтам крепкого здоровья, Божого благословения, веселого и счастливого житья на многая и многая літа.

Староста Петро Павляк не забыл тоже и за пресс-фонд газеты “К. Руси”. При пояснению в пару словах значения газеты “К. Руси” в пару минутах собрано на єй фонд 47.00 долларов. (Имена жертвователей были поміщены в “К. Руси”.


Петро Павляк,
Ембридж, Па.



[BACK]