Шумят Горы — 'Гладышовян'
Шумят горы сой Карпаты,
Зо собой шепочут,
Певно нашы любы лемкы
Вернутися хочут.

Хочут они ся вернути
В горы свои рідны,
И так того повороту
Чекают все бідны.

Хочут они ся вернути,
Хоц бы поумерати,
И там вічно спочивати,
Где отец и мати.

—————o—————

Шумят горы сой Карпаты,
Зо собом шепочут,
И про давных віков житья —
Росповісти хочут.

Як от непамятных часов
Лемкы в горах жили,
Цілым літом милым співом
Горы веселили.

Часом были тяжкы часы,
Компери не знали,
В мокры або сухы рокы
Хліба дост не мали.

Тогды везли дырва, гонты,
Аж до Мадьярщины,
И оттамаль привозили
Хліба для родины.

Тогды везли дырва, гонты,
На жнива ходили,
И так своє бідне житья
Лемкы проводили.

Так минали многы рокы,
Літа за літами,
Міцно ся так разом съжили
Лемкы и с горами.

Выізжали на заробок,
За моря далекы,
Дуже их так выіхало
Аж до Америкы.

Дуже их там позостало
На все проживати,
Будут свои любы горы
Завсе вспоминати.

А гдекотры не повернут
Нигда с Америкы,
Бо их присыпали майны,
Убили фабрикы.

—————o—————

Шумят горы сой Карпаты!
Жалісно шепочут,
Бо про гірьку долю лемків
Росповісти хочут.

Гірьку долю и страдания,
Яке пережили.
Бо дві войны ту без горы
Ся перекотили.

В Першу войну стоял фронт,
Людей выселяли,
А до того в Талергоф
Не мало забрали.

Друга война ище більше
Далася во знакы,
Потерпіли ище більше
Лемкы неборакы.

Брак одежы и обутья,
Хліба бракувало,
А до того и гестапо
Людей мордувало.

И знов стоял фронт на горах
Людей выселяли,
Понищили вшиткы села,
Поля смінували.

По той войні дуже лемків
Ся переселили,
Выіхали аж на восток,
Жебы ліпше жили.

Так не каждый мог зробити,
Бо сердеце не дало
Покинути отцовизну —
Оно не казало.

И тых вшиткых бідных лемков,
Што в горах остали
На силу гнали на захід —
Их вызвыселяли.

—————o—————

Шумят горы сой Карпаты!
Жалісно шепочут,
И помочи бідным лемкам
Они щиро хочут.

Выселение и Яворжня
Войдут в историю,
То не легко позабыти
Так страшну подію.

Чужы люде нищат лісы,
Тнут собі ялиці,
Чужы люде орьют поля.
Пасут собі овці.

Родны села понищены,
Хижы розобраны,
Бідкы лемкы на заході
Силом звыселяны.

Хотят они ся вернути,
Лем закон не дає,
А прадідну их земличку
Банк чужым продає.

Шумят горы, шумят лісы,
И не перестают,
Коли тоты добры лемкы
Всі ся повертают.

Жебы разом собі жили,
Як діды, прадіды,
Жебы хліба дост все мали
И не знали біды.


Гладышовян.



[BACK]