Наша Народна Здравница

В останы рокы наша карпато-русска емиграция в Америкі удостоилася особливой чести, бо в єй среді повстала, як бы с под земли выросла прекрасна и богата институция Американский Лемко-Парк. Находится он в прекрасной горской околици, в тихой долині Нью Йоркского штата, коло місточка Монро и Блюминг Гров (Процвитающий Гущ).

О той нашой народной здравници за трирочный протяг часу узнала така широка масса нашого карпаторусского народа по всей Америкі и Канаді, яка за 30 роков не дозналася о Лемко-Союзі або о другых нашых карпаторусскых организациях.


LemkoPark
АМЕРИКАНСКИЙ ЛЕМКО-ПАРК: — Дом “Зозулька”.

Наша карпаторусска здравница Лемко-Парк покупдена отдільными участниками нашого роду за 180 тысячов долл. Половина долгу, котра осталася на маєтку при покупкі за два першы рокы обнизилася до 30 тысяч. Треба замітити, што до украшения и обогачения Парку за тот час было больше додано, як 20 тысяч долларов, и тот додаток поднюс вартость нашой здравницы до 200 тысяч долларов.

Кромі финансовой вартости с рока на рок Лемко-Парк подносит свою моральну потугу. Наш народ с близкых и далекых околиц усвоюєся до Парку, яко свойой родинной ватры, до свого дому.


Pavilion
АМЕРИКАНСКИЙ ЛЕМКО-ПАРК: — Бывший стодольный павильон-колесница, перебудованый на модерну світлицу, котру молодежь назвала гальом Д-ра С. Пыжа. (Фото взяте послі поновлення світлицы с надвору и в середині).

Ту начинают осідатися на постояние житья нашы пионеры-пенсионеры, замешкуют на постоянно фамилии, иншы приходят ту на свои місячны або и цілолітны вакации. А тысячны массы народа можна там встрітити на народных торжествах, як Русаля, Талергофский День, День Молодежы и другы. На такий праздник, як Русаля прибыло 14 автобусов полных народом, меже котрыми были аж с такых далекых місцевостей, як Ватербери, Конн., Ватервлит, Н. Й., Филадельфия и Питтсбург, Карнеги, Ембридж, Па., Кливланд, Акрон и Лорейн, в далеком штаті Огайо, а кромі того народ на близко тысячі своих автомобильов.

Управа Парком тоже улучшаєся с рока на рок. До сего часу наш народ не мал и ани не сміл думати о такой институции и не мал практикы руководити ньом. Он учится аж теперь руководити такым маєтком и в том напрямі робит очевидный успіх.

Минувшого року управление Парка находилося в руках молодых лемков-американцов, котры николи в краю не были. Они, хоц тоже лем училися штукі управления того рода маєтком, потрафили поставити добрый примір діятельности.


АМЕРИКАНСКИЙ ЛЕМКО-ПАРК. — Покровители Лемко-Парка Андрей и Розалия Баняс, при новом тракторі-косилкі. котру они закупили в виді жертвы для Лемко-Парку. Прекрасна сценария за ними, то наш буйный Лемко-Парк.

На 1962 рок управление Парка было немного змінено, близко по половині старшы и молодшы. Тоты из молодых, котры остали поза уряд добровольно, будут як бы резервном силом на выпадок потребы, таком практичном силом, якой попередны правления Парка ище не могли мати.


Kitchen
АМЕРИКАНСКИЙ ЛЕМКО-ПАРК. — Чиф кухни Лемко-Парк реставранта — Юрко Кардашинец, готовый обслужити каждого гостя пахучо заправлеными ідлами, штука чого ест його практика и приватна тайна. Юрко Кардашинец каш краян с Подкрпатской Руси, был шефом при армии в часі I Світовой войны, потом от 1941 до 1951 року был шефом кухни на американском кораблю на курсі Соединенны Штаты — Япония — Корея, послі шефом кухни Лидор Кресс Калледжу в Аллентавн, Па., а на остатку пришол за шефа кухни свойой карпаторусской здравницы Лемко-Парку.

Лемко-Парк ставит лем першы крокы, но перед ним велика и важна задача. По мірі його роста економичной силы буде розвиватися тут рародно-культурне и общественне житья. Там должна повстати літном пором школа русского письма лемковской бесіды, так для старшых, як и молодшых, котры його не знают. Тут должен буде повстати народный музей и архив документов истории карпаторусского народа в Карпатах и емиграции в Соєдиненых Штатах и Канаді, а тоже достойный свого величия Талергофский Памятник в честь и вічну память нашых отцов геройов-мучников за свою народности и віру. Тут должен повстати спортовный центр для нашой молодежы, штобы она тут сходилася из всіх сторон світа. Успішне розвитие Парка до значной міры затримує боязнь за його судьбу. За його судьбу не треба боятися, так долго, як долго меже нами находятся такы жертвенны люде, як Марта Бернат из Вестфильд, Н. Дж., котра в 1960 року подарувала до Парку новый човен, або Андрей и Розалия Банясы из Флориды, котры в 1961 року пожертвовали косильный трактор. А на выпадок, коли бы Парку грозил упадок, то як не тысячи, то соткы передовых патриотов встанут и защитят свой Парк, котрый уж теперь стал их улюбленным місцом, такым близкым, як их власный дом.




[BACK]