Село Поворозник — Антоний Драбяк

Село Поворозник лежит в повіті Новый Санч, на Лемковині и роскинуте оно на якых пять километров в долині помеже верхами на шляху меже місточком Мушинком и селом Крыницьом и дальшым Тыличом. Через село протікат річка Мушинка, яка бере свой початок из лісов с. Мушинкы за Тыличом.

В 1910-1911 роках была проведена через Поворозник желізница на оттинку Мушина-Крыниця. Перед ІІ Світовом войном деси в року 1935-1936 капитально отремонтувано повітову дорогу, што веде через село из Мушинкы до курорту Крыниці и дале через Гуту до Нового Санча. Заасфальтувано єй на цілом просторі 11 км., таке отдаление из Мушины стации до Крыниці-Здрою.

До войны 1939 р. отновлено также дорогу, яка сполучат Поворозник с Тыличом. Тота послідня, як мні росказували, знаходится теперь в дуже кепском стані, бо змязжили єй подводы и машины, якы тут іздят с деревом и иншыми материалами.

Перед войном 1939 р. была переведена в Поворознику комасация грунтов, длятого теперь богато змінена конфигурация полей и в гдеякой мірі также и сама розбудова села. Такы принайменьше были проєкты относно розбудовы в часі проводжения комасации. Далекы за селом лукы и пасовиска прилучено до державных земель и лісов. В наслідстві комасации значно зменьшилася территория села Поворозника. Околиця Поворозника безперечно дуже красива во вшиткых керунках. Особливо дуже красива партия шляху от горішнього Поворозника до Тылича. Дорога веде закрутами попод Війкову, попри річку Мушинку серед масивных шпільковых лісов. Так гарным краєвидом може полюбоватися всякий пішеход-вандровник, ци звычайна поворозницка жінка. Я тамтади ходил час до часу и было мі весело на душі.


Povoroznik
Старинна церковь в Поворознику, повіт Новый Санч на Лемковині.

Многы американскы лемкы из повіту Новый Санч напевно знают тоту дорогу и думаю, што признают мі правильность и мойого ентузиястичного снагаду.

Прекрасна також природа при граници Поворозник-Мушина. Ту знаходится жерело минеральной воды так зв. щавы, яка має всі прикметы крыницкой щавы. В бок под гору провадит польова дорога до громадского сіла Гайниці, и дальше на горскы лукы, где давнійше Поворозничане около ев. Петра соберали сіно-кустрицю. Там при дубнянской граници серед дикых лісов видно высоке Зимне, найбольше взнесение на польовом терені с. Поворозника. Зо Зимного добре видно высоку Крыницку Яворину и майже вшиткы верхы на Карпатскых Бескидах по Новый Санч и Грибов. При доброй погоді увидиш оттале далекы сніжны Татры.

Поворозннцкы люде были добры, што приходилося мі чути и теперь в УССР. Характером и звычаями они найбольше зближенні до Крыничанов. Натоміст люде зо сусідного села Дубне, а почасти и Війковы богато ріжнятся от Поворозничанов, ци то характером, ци в ношеню одежы, а подекады и в бесіді.

Поворозник, то дуже старе лемковске село. Оно невелике, але дост довге. До войны 1939 року Поворозник мал около 230 нумеров и понад єден тысяч мешканців. В селі была школа с двома учителями, читальня им. Мих. Качковского, сельска крамниця в читальняным домі, Пожарна дружика типу польской охотничой стражы, дві мельниці, столярня братов Финков, два жидівскы склепы, но и знана в околици корчма родины Шрайберов. На ріках в сторону Війковы знаходился дужий тартак Дересєвича. Поляков жило в селі 4 родины. На камінцях коло річкы Мушинкы побудувалися цыгане. На ярі было чути, што они клепали желізо в своих хатинах. Літом працували потрохи на дорогах, товкли каміня. Позатым они грали на вшиткых весілях и забавах сельской молодежы. Особливо был знаный, яко добрый музыкант, цыган Сидор, што добрал собі ліпшых скрипачів и удалого басисту. Його нераз запрошували грати крыничане и тыличане. Загалом поворозничане занималися рольництвом. Денекотры, што мали коні, зарабляли сезоново на вожению піску до Крыниці и в лісі при вожению кльоцов. Гдеякы рубали безпощадно смеречкы и продавали их на белькы Гершку Шрайберу або Гохгаузерам. Старый Миллер перенесся ище до Первой Світовой войны до Крыниці. В Поворознику за мойой памяти довшы рокы учительствовал Алексий Милянич, родом зо Щавника. Я был його учеником. Он долго тоже секратарил в громаді и был для людей добрым дорадником в ріжных судовых справах, ци сельскых спорах. Милянич умер нагло на дорогі под час ізды ровером гдеси скоро по переселению поворозничагнов. Не жиє уж и його жінка, бывша учителька в селі Поворознику. Війтували в селі, што памятам, Колєйко, солтыс Ваньо Крыницкий, Петро Тыліщак, церкбвник Ваньо Щавинский, Владимир Карляк и остатньо Антоний Крыницкий.

Памятам, што до войны заходил даколи знаный на цілой Лемковщині, умо-упослідженый Амроз и брал в громаді отбиткы печаток, што было його навыком. Такых печаток Амроз мал велику массу из найрозмаітшых сел, як тоже печаткы гдеякых польскых громад, а навет и полицейскых постерунков. Зошит-книжку с печатками носил всегда зо собом под пахом, а в другой рукі — в часі походу — тримал кастур-киянку, яком часто потрясувал.

Характерным для Амроза было ище и то, што часто на просьбу говорил своє казаня, яке звычайно кончил словами: “Люде покайтеся, прийде страшный суд, ангели будут трубити, а люде зо страху будут ... трястися.

Єдкого разу Амроз мал таке казаня прилюдно на стации колейовой в Новом Санчі. Амроз мал загинути єдной лютой зимы до ІІ Світовой войны в часі дорогы из села Баниці до Мохначкы. Видно, забракло му сил бродити по снігу и замерз, бідака, отпочиваючи под смереками.

Парохом с. Поворозник был до 1922 р. свящ. Владимир Козловский. Он працувал духовником в селі понад 25 роков и был дуже любленый в народі.

Позднійше были коротко парохами о. Коцюмака, перед ним якийси час доізжл из Війковы о. Фенич, потому в 1925 р. прибыл до Поворозника дуже ретельный, перемышльский каноник о. Иван Савчик, який нагло помер в лютом 1927 р. Дальше штоси понад 17 роков был парохом о. Павел Вах. Он был остатным греко-католицкым парохом в селі Поворознику. О. Вах разом с другыми поворозничанами выіхал в осени 1947 р. в УССР. Ту працувал на парохии в селах коло м. Долина, Станиславской области. Помер нагло в дорогі до Станислава в м. Долині, где його там похоронено при большом здвигу народа и в присутности вшиткых долинскых лемков.

В давшых часах село Поворозник подлягало Краковскому Епископству. Право заложити Поворозник надал краковский епископ Ф. Падневский Назареви Воркачови “excruda radice”, т. є. по вырубаню лісов над потоком Мушинком меже місточком Мушином, а шкляном гутом Мушинского Замку. Солтыс Воркач дійсно оселил в Поворознику 20 кметов. По назвах ріль, якы утрималися до остатных часов, можеме уточнити назвиска першых поворозницкых Кметов. Тоты назвы такы: Панькова, Волошинова, Иваничівска, Гомбарівска, Заявкова, Щербова, Сусідкова, Донатарска, Бартошівска, Галиківска, Семкова, Шелапова, Назарівска, Ванцьова, Добошівска, Паралівска, Скорупова, Златкова, Филянова и Геричова. Родины о назвисках: Волошин, Щерба, Сусідко, Парыляк, Бартош и Галик проживали в Поворознику до остатных часов. Єдак з роду Галиків, а то Ваньо Галик, сын Михаила, робітник-пенсионер жиє дальше на свойом обійстью в с. Поворознику.

Село почало швидко розвиватися. В вересни 1606 р. была уж закончена деревяна церковь. Она стоит доныні. В Поворознику знаходилася шжляна гута. Грамотом из 20 березня 1613 р. дозволил епископ Тылицкий Иванови Стефкови отступити даякы грунты и шкляну гуту Стефанови Крыницкому и його потомкам. Ст. Крыницкий достал ище право збудувати собі для власной потребы млин из єдным каменьом. Крыницкий мал достачрити Мушинскому Замкови 1000 шыб, але як видно из актов 1627 р., гута шкла не вырабляла из-за недостатку ліса. Назвом “Гута” ище теперь зовут частину села в напрямі Крыниці за желізным мостом.

Епископ Шинковский дал привиллейом из 11 липня 1627 р. Сулковску поляну для солтыства. Остатный солтыс, війт с. Поворозника Антоний Крыницкий єст нащадком колишнього поворозницкого солтыса Стефана Крыницкого из ХѴІІ столітия. Антон Крыницкий проживає тераз в Долині, Станиславской области.

Поворозник мал дуже рухливых першых священников. По актах Мушинского Замку епископ Ян Задзік привилейом из 13 січня 1637 р. дозволил Томі Добошови продати єден лан поля парохови Андрейови Мєйскому. Лан сей — 100 моргів — коштувал 250 кол. злотых. От того часу тота Добошівска рілля належит до приходства. Свящ. Андрей Мєйский достал дозвол от того самого еп. Я. Задзіка, открыти в 1638 р. в Поворознику школу, в якой училися діти солтысов и кметив. Мєйский был тогды парохом Поворозника, Ястрябика и Війковы. Судовы акты згадуют, што сын свящ. А. Мєйского, о. Михаил Мєйский был “намістник мушинский, спишский и навойовский, поворозницкий, войковский и ястрябский плебан”.

Село Поворозник было до 1813 р. цілком инакше забудуване, як теперь и поток Мушинка плыл не тым руслом, кед теперь. Он плыл попод берег, на яком стоит церковь. Церковь тогды стояла на самом березі річкы. Много поворозницкых хат было розкинутых там, где теперь плыве Мушинка. Велика повінь в 1813 р. знищила тогды значну часть села и подмыла церковь, што стояла над самым берегом рікы. Из того часу Мушинка змінила своє русло. Она перекинула його трохи подальше на захід под протилеглый берег. Церковь перенесено в наступном року 1814 на теперішнє місце. Того же року прибудувано до ней невеличку дзвіницю, звану в народі. “фіртком”. 1925 р. розобрано ту стару дзвіницю, а построєно нову из дерева, где заразом поміщено два дзвоны. Перед тым дзвоны знаходилися в головной церковной вежі. Было их три, як всюды по лемковскых церквах.

Як видиме, церковь в Поворознику, то єдна из найстаршых деревяных церквей на Лемковщині. Она може стояти ище дальшы столітия, як бы єй старанно и капитально отремонтувати, бо дерево в середині здорове.

Давно, ище за часов Австрии, поворозіничане старалися выбудувати нову мурувану церковь. Навезли уж деякых материалов, як каміня, пісок и вапно; были у них готовы будовельны планы, але скоро выбухла Перва Світова война и церковь уж не побудували.

В Поворозницкой церкви переховувалися до послідных часов стары образы из ХѴІІ ст., а саме: образ Страшного Суду, мальованый на дошках 1605 р. и образ Богоматері из 1645 р. Тоты цінности передано народовому музею в Новом Санчі. Прекрасный иконостас мальованый пізнійше в 1922 року отновил його проф. С. Литваненко. В церкви захрестии были до войны 1914 р., вітражи в оловяных рамках, але невідома рука знищила их в часі войны. Вітражи заступило звычацне шкло в деревяных рамках. В парохияльной библиотекі переховувалися в урывках метриальны книгы из ХѴІІ столітия, писаны церковно-славянскым письмом.

3 осени 1945 р. живут в Поворознику полякы, гуралі из околиц Закопаного. Мают свого ксьондза, який заразом администрує с. Ястрябик и Війкову. Поворозницку церковь зовут теперь косцьолом св. Якуба.


—————o—————

Свою коротку допись за село Поворозник я написал на подставі власных спостережений. При том частично, єсли ходит о розвиток Поворозника в ХѴІІ столітию, корыстувался статійком украинского подорожника Я. Крыницкого, який свого часу бывал в Поворознику и пізнійше написал о ньом в газетах.


Антоний Драбяк.

м. Борислав — УССР
ул. Дрогобыцка 2 і 6.



[BACK]