Петро и Марта Гурей
Peter, Martha Hurey
Петро и Марта Гурей.

День 22 апріля 1961 года останеся в нашой памяти до конца нащой жизни. В тот день мы отпраздновали наш 50-рочный юбилей нашого супружеского житья.

День юбилея был планованый на 24 фебруара 1961 года, так як наше весіля совершилося 24 фебруара 1911 года. На отложение нашого юбилея зашли дві перешкоди, перва перешкода была сурова зима и велики сніги, друга перешкода была, же на 19 фебруара уже начался Великодный пост, так про тоты дві перешкоды наш 50-рочный юбилей был отложеный на 22 апріля 1961 года.

22 апріля 1961 года, о 9:30 рано началися сходити нашы діти. Найперше наш середушный сын Николай, котрый служит в американской армии уж 15 літ, прилетіл на аероплані из Гайделбург в Германии, друга наша донька Теодора с єй мужом Семом Гарднер из Мангаттан Бич, Калифорнии, и другы 2 сынове Михаил и Лукач, котры жиют разом с нами. Потому началася сходити наша родина, як 5 дівок мойой жены сестры Аквилины Габор, дівкы с мужами, Фенна Милян, мойой жены стрыєчна сестра из Мунгалл, Па., также и моя сестраниця Катерина Пастерик с єй сыном и с єй братом Антонием Кнапик, наша кума Юлия Павлик, разом 6 людей, всіх из Донора, Па.

Потом начали приходити нашы добры приятели из Ембридж, Па., приіхал наш староста Петро Павляк с його любимом женом Євом, наш сердечный друг Иван Руссинко, Шершені обоє, Симеон Бетлей, Єва Матаник также и моя стара газдыня Олена Трухан и богато другых гостей. Всі они вошли в церковь, где о. Ващак отслужил Службу Божу за здоровье юбилянтов.

Послі литургии всі спустилися на долину церковной галі на малу перекуску, о 1:45 по обіді до галі входит наш дорогий друг и редактор газеты “Карпатской Руси” Николай Цисляк из Нью Йорку и наш дорогий кум из Филадельфии, Па., всім извістный Даниил Гумецкий, што нам исправило велику радость. Мы не маме тых слов, штобы зложити им нашу благодарность за их труд и так далеку дорогу для участия на нашом юбилею. Боже заплат всім Вам разом!

Ту приводиме допись, яку написал о нас Даниил Гумецкий от 19 мая 1961 р. ч. 20 нашой газеты.


—————o—————

Филадельфия, Па.

В субботу 22-го апріля я в товаристві редактора газеты “Карпатской Руси” Николая Цисляка, мали нагоду быти в Питтсбургу на 50-літнЬом юбилею Петра и Марты Гурей, а так, як Петро Гурей єст дуже популярный в околици Питтсбурга по його діятельности в Лемко-Союзі и другых организациях, так и их юбилей отбылся величаво, бо на том юбилею присутствовало около 100 людей.

Н. Цисляк и я прибыли зме до галі около 2-ой годины пополудни и застали большу церковну галю уж переполненом людьми.

Староста Петро Павляк оголосил, же на горі в церкви начинатся молебень и всі присутны гості должны присутствовати на том молебни. Молебень отправил місцевый молодый священник о. Ващак, при участи місцевого псаломщика, Афаназия Лезянов и Петра Павляка из Ембридж, Па.

Сейчас послі молебня на долині в церковной галі началося угощение. Столы прекрасно накрыты и украшены цвітами, як на яком великом банкеті.

Сам юбилякт Петро Гурей привитал гостей и представил Петра Павляка, яко старосту. Петро Павляк перебрал місце старосты, подякувал всім присутным, як родині Гурейов, так всім гостям за их присутствие и оголосил, же на том торжестві єст много присутных, котры не розуміют нашого лемковского языка. Так попросил мене, жебы я на английском языку привитал их и подякувал за их присутствие.

До слова были прикликанні старостом Павляком Николай Цисляк, редактор “К. Р.”, Даниил Гумецкий, о. Ващак, Изидор Осадчук, и Иван Руссинко. Всі бесідникы выражали юбилянтам Гуреям признательство за их роботу на нашой лемковской ниві и желали им долголітие.

На жаль мы мусіли оставити так веселу забаву и то як раз в тот час, коли забава началася нашыми лемковскыми милозвучными співанками под проводом Петра Павляка, по той причині, же мы мали быти в Кливланді на собранию кливландского отділа Л. С. на слідуючий день. И даже, коли мы іздили босом по дорозі до Кливланду, то в моих ухах звучали тоты красны лемковскы стародавны співанкы, котры співали на гали на том торжестві.

Тут от себе и мого подруга Н. Цисляка хочу поблагодарити насамперед нашых юбиляятов Гуренов за так красне гостеприимство, Петру Павляку и другым, котры так старанно нас обходили и их щирым гостеприимством причинили для нас, хоц короткий, але дуже веселый и приятный час.

Як звычай на такых забавах собераются жертврі на пресс-фонд газеты “Карпатской Руси”, то и на том торжестві гості зложили на тоту ціль 44 доллары.


Даниил Гумецкий.



Также належится подяка и нашому першому зятьови Василию Козуп, из Кортланд, Огайо, котрый не мог быти на нашом юбилею в субботу, то приіхал в неділю с його другом женам и ище поприходили и другы и так ся забавили до поздной ночы.

Также хочеме зложити нашу подяку тым, котры не могли быти на нашом юбилею по домашных причинах, а надослали сови поздравлельны и доброжелательны письма, также и свои жертвы, а именно уйко Ваньо Мучка из Терривилл, Конн., уйко Николай Цимбала из Еллвуд Сити, Па., Иван и Мария Швагла из Гери, Инд., Антонина Гапонюк из Лорейн, Огайо, Михаил и Дороти Гурей из Гари, Инд., Дороти Гурич, и Катерина Головач из Донора, Па.

Складаме нашу подяку нашым кухаркам, котры так тяжко ся наробляли цілый день в кухни, а именно Катерина Куликович, Френца Бартуисс и Избала Ричард, также и Вам “Боже заплат”.

Где кто хоче узнати мою историю, так я в короткости опишу. Я єст уроженец села Милик, пов. Новый Санч, на Лемковкні, сын Михаила и Марии Гурей, уроженый 12 июля 1887, приіхал в Америку в 1906 году в город Байонн, Н. Дж. Моя жена походит из села Квятони, пов. Горлиці, дочка Лукача и Евросии Медвідь. До Америкы приіхала в р. 1905. Женили мы ся в городі Питтсбург, Па., 24 фебруара 1911 года. Выховали мы красну Фамелию 3 сынов и 3 дочкы. Перша дочка Мария померла 1942 года на 29 року свойой жизни. Остал по ней хлопец, котрому было 4 місяыы, як матер померла. Друга дочка Мелания померла в 1955 г. на 33 року свойой жизни.

Ту ище хочу спомнути за несчастный выпадок, який встрітил мою жену в 1959 року. Ишла моя жена до міста по домашным потребам и гдешто накупила. Коли вертала до дому, то несподівано ударил єй автобус 23 октября 1959 и єй смертельно побил. Поламало єй ліве коліно, поздерало скору с ногы, на голові діры — 16 штыхов, покалічило лице розбитыми окулярами и так она пролежала в госпиталю 6 місяцов.

Никто из тых, кто єй посіщал в шпыталю, николи бы не сказал, што она поверне до стану здоровля, в яком она теперь єст, а ани только же ище будеме праздновати тот 50-літный юбилей супружества. И тым, што мы так много перенесли трудностей в нашом житью юбилей был зато счастливший и радостнійший.


Петро М. Гурей,
Питтсбург, Па.



[BACK]