Народны Приповідкы (записаны в Лаборской долині на Пряшевщині)— Андрей Куско

Але, але май розум, Михале!

Або грай, або грошы отдай.

Або дай, або выдру.

Ани на сто конях не здогониш.

Баба из воза, а возові лекше.

Боскы очы видят нас в день и в ночы.

Была біда и за нашого діда.

Баба чорта переведе.

Без Бога ани до порога.

Близша мі сорочка, як гуня.

Брат собі рад, сестра собі несла.

Біда тому дворови, што розказує корова волови.

Богатому в горци накыпит, а худобному выкыпит.

Баранови рогы не заваджают.

Быстрый, як оловяный птах.

Блазны и діти звыкли правду говорити.

Бьют того, кто не дозерат свого.

Борона быча, а школа хлопчиска страшит.

Богачови и когут ся несе, а худобному и курка не хоче.

Болит горло співати задармо.

Вино и палюнка зошаляу человіка, але пиючи воду, буде при розумі.

Воду вари, вода буде.

Волиш не дати, мал бы-с выгваряти.

Ворона вороні очы не выколе.

Высокы порогы на нашы ногы.

Вола імают за рогы, а человіка за слова.

Веилке дерево поволи росне.

Всяды добре, где нас ніт.

Волк до ліса позерат.

Великий до неба, а дурный, як треба.

Вечер укаже, який был день.

Голова лысіє, а розум дуріє.

Голодному хліб на думі.

Горнец горцови доганят, а оба чорны.

Гада в пазухі годує.

Голоден, як млинарска курка.

Ганьбится, як тота кобыла, што санкы зверне.

Голого легко голити.

Голый и святый біды не боится.

Говорит, як млин напорожньо.

Горнец, чым накыпит, тым го чути.

Гірко заробиш, солодко зъіш.

Добрый сусід, найблизша родина.

Добра жена вінец, а зла конец.

Добрі и на горбі, коли дашто єст у торбі.

Добра капуста, коли от солонины не пуста.

До ничого не треба ани соли.

Добрі ся пестити, коли ся може змістити.

Де такий богач, жебы ке хотіл веце, як мат.

Де дадут — бери, де бьют — утікай.

Де дві газдыні — там хижа не метена.

Де мож разом на двох конях сідити?

Дурню дзвонят на вечерню.

Єден плаче, другий скаче.

Єдиначок — “шибенячок”.

Єще ся тот не вродил, жебы всім выгодил.

Єдно: зелене жати, и нич не мати.

Єдна ластівка не робит ярь.

Єще дашто, еще мало, а чей бы ся неуновало.

Жичай, добрый обычай, як вертати, треба ся гнівати.

Живый живе думат.

Жаливо пече, а огень палит.

Жена бита добра, а грошы числены.

Жиє, як у Бога за дверми.

Жити надійся, а умерати готовся.

Жийме по братскы, а рахуймеся по жидовскы.

Затял сокыру до грубого дерева.

Заліз до густого голузя.

За грошы купиш вшитко, лем маму ніт.

Злодій краде, што попаде.

Зівкатся му, як псу на паздірю.

Злый пінязь не загине.

За молодым жити весело, за старым затишно.

Золотом швайком и муры пробьеш.

И сліпой курці трафится зерно найти.

И муха не без бріха.

Иглов кашы не наішся.

Из-за крячка добре стріляти.

Из ручкы до ручкы, не буде мерзячкы.

Из рукы, ударило му до головы.

Кажда лишка свой хвост хвалит.

Коваль клепле, покы желізо тепле.

Каждому не вір, бо тя урве, як звір.

Коли придет меже вороны, то крякай, як и они.

Кого укусит гад, того и глисты ся боят.

Каждому дню прийде вечер.

Кому Бог, тому и всі святы.

Коня куют, жаба ногу підставлят.

Кум не кум, але с черешні долов.

Когут смілый на свойом смітю.

Лінь гірша от хвороты.

Лінивый два разы ходит.

Ліпший днесь воробель, як завтра ворона.

Ласкаве теля дві коровы выссе.

Любятся, як пес с котом.

Лінивый все має свято.

Многы фиглі Бог карат навікы.

Мудрым никто не вродился, але научился.

Мати єдном руком бье, а другом гласкат.

Молодый може, старый мусит умерти.

Мудрым легко наказувати.

Мур не пробьеш пальцом.

Не вшитко злото, што ся блищит.

Не шкребайся, кедь тя не свербит.

Не пхайся на перед, но и на заді не оставай.

Не тыкай носа, де тя не просят.

Не повідай “гоп”, покы не перескочиш.

На злодію шапка горит.

Не стало му хліба, мусіл колачы істи.

Не рушай лайно, не буде смердіти.

Не такий он глупый, як скупый.

Не глядай там, где-с не положил.

Обіцянка Ганка, шаленому радость.

Оголили го и без бритвы.

От згнитого ябка и здраве зогниє.

Обутого видно, а босого слідно.

От смерти ніт зілья в керти.

Очы бы іли, рот уж не хоче.

Правда очы коле.

Прийде на пса мороз.

Пропал, як камінь у воді.

Пішол, як рак по дріжджы.

Пес бреше, а вітер несе.

Пуст пса під стіл, вылізе и на стіл.

Решетом воды не начерпаш.

Рука руку мьіє, жебы обі были білы.

Розумітся, як вовк на звіздах.

Рыба глядат, где глубше, а чоловік, где ліпше.

Сытый голодному не вірит.

Свекра из пекла.

Сирота, а має пыск, як ворота.

Старость не радость — молодость — не вічность.

Стеклый пес и на газду ся мече.

Скривился, як середа на пятницю.

Смерть не выберат, старых и молодых заберат.

Спокойного волка и телята лижут.

Тримай язык за зубами.

Тиха вода берегы ламе.

Треба, жебы ліва давала, а права о том не знала.

Тіснота, велика псота.

Такий страх, як из мышачой діры.

Так тихо будь, як вош під рубцьом.

У скупого все по обіді.

У страха великы очы.

У фашенгы каждый фонтляк думат, же ся оженит.

Уж бы час до розума придти.

Хижа не церковь, люде не ангелы.

Хочеш, не хочеш, умерти мусиш.

Хоц посивію, як овця, не піду за вдовця.

Хоц не буде што істи, лем жебы было с кым сісти.

Кто чести не має другым не може дати.

Кто хоче дашто мати, мусит пізно лігати, скоро вставати.

Хвост голові хоче росказувати.

Кто пізно приходит, сам собі шкодит.

Кто ся топит, то соломкы ся вхопит.

Ходит, як дурный с дверями.

Цыган бы не дал єдно літо за сто зим.

Циркоче, як поток.

Цундравый, як бы з неба упал.

Циганы угля не продавают.

Человік гордіє, як ся му добрі діє.

Чеснок, цибуля, підскоч, Микуло.

Чистота, сама перша цнота.

Чорт чортом буде.

Чуже видит под лісом, своє не видит под носом.

Чого ніт, того не треба.

Чудуєся, як теля на новы двері.

Што глядала, то достала.

Што на сердци, то и на языці.

Што з воза упало, то пропало.

Шаленому ніт ся што чудувати.

Што не красно, то и не практично.

Шкода, же-с мудрый, а піше ходиш.

Як собі постелиш, так ся и выспиш.

Який помагай Бог, такий здоров будь.

Який такий, лем бы был, лем бы хліба роздобыл.


Записал: Андрей Куско.



[BACK]