Новорочны Пожелания
Солнце померкло, за ліс заходит,
Новый рок крадком до нас подходит.
Як солнце ясне рано настане,
Нового гостя с нами застане.
Старенький рочок уж не поверне,
Ани ся лицом ку нам не зверне.
Бо тот молодый Шестдесят Другий
Світом оберне, як моцарь тугий.
Он нам покаже чудесны штукы,
Скоро нас займе во свои рукы.
Якым же будеш, ты рочку, милый?
Будеш к нам теплый, ци будеш зимный?
Люде, як люде — бідны отрокы,
Наперед хтят знати так, як пророкы.
На око тя важат, и тя міряют,
Но якым будеш, того не знают.
Много звіщают за тя знатокы,
Но коли ты минеш — отворят роты.
Бо то и в прошлом, уж были такы,
Но все пошили с себе дураков.
Єдны слухали, што рішил Конгресс,
Же ты принесеш науку, прогресс!
Иншы ходили аж на Волл-стриту,
Складали цифры на проспериту.
Третьи ся гребли в книгах Мессии,
Же світ погрузиш до депресии.
Читали звізды с горы до споду,
Што ты приведеш голод, незгоду.
Тоты ся скрыли у темны норы,
С боязни, што на них звалятся горы.
Што уж не вірят, ани Богови,
Што світ ся втопит в морю и крови.
Планета поросне, як бы грибами,
Чорными, атомными бомбами.
И иншы страхы, такы надуты,
Што ни не знати — где ся укрыти.
А слабы духом в роспач падают,
Часто на себе смерть накладают.
Бо ты знаш добрі — вікы змінены.
Атомы, ньютроны в технику включены.
Уж найтемнійшым то стало ясне,
Оружие с того ест дуже страшне.
Не мож дітині ся с тым бавити,
Житья планеты може згубити.
А и шаленых варуй от того,
Бо людству шкоды наробят много.
Мы до ничего тя не примусиме,
Але в надіи о єдно тя просиме:
Будь роком богатым, будь роком мирным,
Люде тя назвут добрым и вірным.
Як долго пожиют — вспомнут тя, дружочок:
Не был то добрый, як Шесдесят Другий Рочок!

[BACK]