Памятникы Вічной Славы
Monument
Модель памятника Лемковскым партизанам, героям и жертвам борьбы с німецкым оккупантом в Устью Русском.

Отколи люде начали творити культуру, они начали ставити памятники, то в честь своих любимых предков, то в честь своих добродіятелей, славных, смільшых геройов, котрых примір або діятельность причинялися для добра другых. Ставили собі памятникы або гробницы князі, королі и богаты люде.

Из такых стародавных памятников учены ище днеска выдобывают историю житья тых давных часов, котра инакше не стала бы нам знана, бо инде нигде не была записана.

PeregrimMon
Талергофский Памятник в селі Перегримка, пов. Ясло на Лемковині

У нас на Лемковині о такых народных памятниках никто не старался. Но коли по выселению нашого народа минуло 15 роков, то найвірнійшыми памятниками о житью нашого народа там свідчат опустошены церкви. В дакотрых церквах сохранилися даякы стары книгы або записи о бывшых жителях того села, а як такых неє, то там дагде на дошкі або срубі вырубана даяка дата або слово, с котрого учены исслідователи истории можут получити даякы відомости о давной старині той місцевости. А як и того неє, то уж сама архитектура будовы такого памятника церкви говорит дуже о стані высокости культуры жителей данного села, о його истории. Опустошены церкви по Лемковщині осталися єдиными признаками, по котрых єдносельчане познают своє село.

В нашом лемковоком народі на протягу його житья в Карпатах тоже были свои герои, свои смільчакы, свои, учены, котрых належалося почтити память, но они то по єдной, то по другой причині остали забыты, єдиным памятником по такых нашых народных героях остался живый язык, но с часом и он забыл передати всю правду и перенести историю в далекы поколіния. Но але за нашой памяти мы мали дві войны и в обох войнах мы мали не єдного, а цілы тысячы передовых людей, котры отдали своє житья лем зато, што ставили не своє власне, а свого народа добро и честь на перше місце.

В часі Першой Світовой войны высше, як два тысячы лемков погибло в німецком концентрацийком таборі в Австрии в Талергофі, а десяткы тысяч были биты и переслідованы за свой народ.

В Другой Світовой войні от той самой німецкой походной на русскы земли и свободу потворы пали новы десяткы тысяч жертв в ріжных таборах смерти, по тюрьмах и на фронті. Вшиткы другы народы поставляли своим героям памятникы, лем мы своих ище не ушанували, не отдали им заслужену честь.

Church
Православный храм-памятник в Межилаборцах, построєный послі II Світовой войны в память и честь совітскых воинов, павшых за освобождение Карпат.

Лем рідкы єдиницы из тых геройов, котрым удалося,спасти житья с неволі остали живыми, и уж недолго будут свідками тых страшных издівательств над нашым народом, то настал час увічнити их память достойным их чести памятником.

Коли покуплено Лемко-Парк, то разом с тым возникла мысель построєния памятника Талергофцям. Там так много місця и идеальных горбков и долинок для такого памятника. Штабы не оставити тоту идею на словах, при Лемко-Союзі организовался сбор фонда. Коло 1 тысяч долларов пришло из двох Дней Талергофа, отправленых в Лемко-Парку и выше 700 долл. пришло жертвами через редакцию газеты “Карпатска Русь”. Той суммы уж бы выстарчило на простый памятник, но расходится о то, штобы побудувати такий памятник, при котром, або под котрым находило бы ся пару комнат для архива и музея нашой истории от найдавнійшых часов до днес. На такий памятник не лем бы посмотріли, але всі нашли бы в нем живу, бесідующу писмом и експонатами историю и полне значение того памятника. А на такий памятник нам треба подняти ище больший фонд и то возме нам пару роков. Но дожументы и експонаты уж повольно собераются.

Подобный памятник героям-жертвам Друой Світовой войны нащы молоды лемкы в краю выплановали и добилися права побудовати в Устью Русском на Лемковині. Они уж мают модель памятника готовый и наміряют открыти го в половині літа сего року, но открытие буде залежати, ци у них будут фонды на покрытие коштов будовы. Часть соберут они там в краю меже собом, но часть слідовало бы собрати и нам ту в Америкі и дати помочь, штобы достойно почтити тых, кто жертвувал своє житья, штобы спасти народ и забеспечити му хліб, свободу и счастье.

Памятникы нашым героям в Америкі и на Леміковині останут свідками геройскых подвигов нашого народа, в котрых будущы нашы поколіния будут находити примір и воодушевление на путях свого житья и борьбы за существование.


[BACK]