Село Команьча

Найбольше пестрым народным лемковскым стройом для туристов в днешні часы славится село Комакьча, Сяноцкого повіта.

Коли туристы, идучы в Карпаты на літны вакации, ходят по улицах Сянока и довідуются о найкрасшых місцевостях и колориті на селах Лемковщины, то им найперше радят отвидіти Команьчу, село котре по неизвістной причині не было выселене и где заховался старый обычай в обыході, народной бесіді и ноші, хоц село постулат технично вперед.

Большинство села, то лемкы газдове, бо в 1947 року лем мала часть селян была переселена на Заход, а их місце заполнили полякы осадникы. Где было пусто, там властителі повернулися.

По причині пустоты сусідных сел лемкы села Команьчы створили так бы повісти свой особистый стиль в своих звычаях, ноші и знарядах, якыми они послугуются. Дакотры из такых знарядов были переданы до Лемковского Музею в Сяноку. Мают особливу архитектуру тоже, што до будовы своих домов.

Село Команьча має мальовничий крайовид. Село розбудоване попрі круту річку Ославу. Ріжными кольорами розмалюваны домикы, котры на тлі темно лісистых гор, пестрят, як великодны писанкы. Недивно, што в селі Команьчі все полно туристов, от котрых газдам приходит добрый доход.

Село Команьча ище не ціле нове. С помеже старых деревяных, соломом або гонтами критых хиж, вызерают вперед новы мурованы домы, покрыты черепицом. Місцями с поза дерев або горкы стырчат білы криквы недоконченой ище новой хижы або стодолы.

В селі єст Земледільский Союз. Машинами ділится ціле село. На полях в роботі видно больше старшых, бо молодежь иде в высшы школы або праює в поблизкой копальни нафты.

В неділю на улицях Команьчы правдивы праздникы. Жены и хлопи позвыходят на дорогу в стародавной лемковской ноші. Друшлякы и гуні мужчин переплітаются с красивыми горсетами, ріжно вышитыми блюзками, кабатами и запасками женщин. По обіді хлопці и дівчата сходятся до світлиці побесідувати, поспівати и потанцувати.

Культурный кружок в Команьчі, котрого предсідательом єст И. Ильків веде серед молодых и старшых культурну роботу. Кружок має свой хор, оркестру и танцорску группу. Успіх той роботы был бы больший, но инструктор Павел Стефановский не в силі часто приізжати с Білянкы, а на місци покля што бракує доброго постоянного руководителя культурном роботом.




[BACK]