Жарты — Гр. Хомик

ДОРАДЛИВЫЙ СПРОСАТАРЬ

Было раз весіля в нашом селі на вышньом конци. Родиче молодят послали по селі спросатаря Назарима, абы попросил людей на весіля.

Пришол просатарь на нижный конец села на шолтыство до свата Воргача. Привитал родину и гварит:

— Просили Вас пан молодый и пані молода и старый сват, жебы сте были ласкавы придти на весіля!

Гнатиха гварит:

— Та треба бы підти, кедь просят, но але, як там идти, як там така плюта на дворі?

— Правду мате, — похопил спросатар Назарим, там така псота, што страх боский, шкода вам с хижы выходити.


ЦЫГАНСКИЙ ПОХОРОН

Был у нас похорон, ховали цыганку Ганку. Насходилося дуже цыганов с другых сел, бо наш цыган Ваньо мал велику фамилию, и ище больше знакомых приятелей.

Коли уж спущали трумну до гробу, діти, цыганята начали верещати “Мама кара! Мама кара!” А розжаленый тым цыган Ваньо закричал: “Не воліли мене перше дьябли взяти, як ей!” Што я теперь буду с тыма черваками робити?

Виділ священник тоту роспач Ваня и рішил го потішити.

— Цыт, Ваню, цыт, и тебе возмут, як приде на то час!


ТРАМБУЛЯНКА

Танцувала баба с Грицком,
Выбила му зубы цицком.
Грицьо плаче ляментує,
Баба гулят, подскакує.

Я ти казал Грицю, Грицю,
Не бер ты ся до вдовиці,
Бо вдовиця тебе здрадит,
Ани доктор не порадит.

Нема зубів, бідный Грицьо,
Мусит істи кыселицю,
Кыселицю и с грибами,
И не фйглюй си с бабами.


Гр. Хомяк,
Атлас, Па.


[BACK]