Велика Жертва
Alexander Golovach
Пок. Александр Головач

Пассайкско-Клифтонска газета “Ди Геральд Ныш” от дня 29-го февраля объявила интересну новину, котра удивила нашу там карпаторусску колонию, а головно членов Лемко-Союза и читателей “Карпатской Руси”. Того дня містный адвокат объявил завіщание пок. Александра Головача, в котром, меже иншым, он оставил єден тысяч доллраов на пресс-фонд Лемко-Союза.

Александер Головач родился в 1888 року в селі Андреєвка, повіт Новый Санч, на Лемковині. До Америкы пріхал молодым хлопцом, тут вступил добровольно в американску армию и в часі І Світовой войны был на фронті во Франции. Повернувши в Америку, весь час працувал в шолковни в Патерсон, Н. Дж. Он не женился, но родный край любил и выізжал до него на два заводы в 1934 и 1939 роках. Подчас другой поіздкы на Лемковину он оженился с єдносельчанком Стефаниом, тоже из роду Головач. Он повернул в Америку с планом забрати молоду супругу ку собі, но тым часом Гитлер роспутал войну и розбил всяку можность выіхати Стефании в Америку. Окончилася война и знов переселение в Советский Союз, откуда Александру послі многых усилий не удалося яко жену забрати в Америку.

Коли Александр вышол на пенсию, то выіхал до Миами Бич в теплой Флориді, где послі короткого пребывания постигла го несподівано смерть дня 9 сентября, 1960 року. Тіло його было привезено до Пассайку, где он остал похороненый.

Никто не знал о том, што Александер Головач оставил в свойом завіщанию таку богату и щедру жертву на культурне діло свого народа, аж коли согласно закону його завіщание открыл адвокат и объявил його в місцевой газеті. Так тот тихий, честный и культурный человік, котрый не глядал похвал за житья, прославил своє имя послі смерти и каждый читатель нашой народной газеты “Карпатска Русь” вспомнул добрым, сердечным словом имя Александра Головача.




[BACK]