Театральны Кружкы И Хоры

Кто знає историю нашой народной организации Лемко-Союза, тот знає и то, яку велику роль одограли в єй культурном житью нашы театральны кружкы и хоры. Та не лем же культурно они розвивали нашу организацию, але и давали моральну потугу и финансову поддержку. Благодаря тым кружкам и хорам, котры на наше счастье появилися в самых зародках Лемко-Союза, он позыскал собі широку извістность и стал направду представителем культурного житья среди нашой емиграции. Где лем была даяка хоц бы лем мала группа старшых, ци молодшых емигрантов, где лем появился отділ Лемко-Союза, а уж при нім або хор, або театральный кружок. Так было во всіх штатах, где лем жиют нашы люде, так было и в Канаді, где лем организовалася даяка группа нашых емигрантов.


Passiac
Молодша группа лемковскых танцоров в Пассайку, Н. Дж.

От ліва на право, з горы стоят: Илько Шуфлят, Єва Шуфлят, Стефан Дупляк, Ненци Гойдич, Иван Кузмич, Мария Брунда, Петро Гойдич, Мария Дупляк, Николай Гойдич. (Тоты особы брали участие в представлению “Дві сестры” на сцені, под дирекциом Николая Гойдич) Танцорска группа (на переді) под дирекцийом Стефана Милян и Анны Артимик. Акордионист Иван Артимик. От ліва на право: Анна Артимик, Ирина Кузмич, Мишел Волчко, Мария Димонд, Сузи Югас, Мария Порада, Сандра Теліщак, Павлина Сахович, Кети Кость, Кети Теліщак, Стефан Милян и Иван Артимик. На присядкы с долы: Росел Сахович, Михаил Брунда, Брус. Малисевич, Дени Теліщак и Сашаі Козик.

Представление и концерт отбылися 31 января 1960 року в Пассайку, Н. Дж., містным драматичным кружком и танцорском группом при отділах Лемко-Союза.


Кто подорожувал по Америкі и Канаді в тоты часы, то всюди мог придти на даяке предприятие, котре мало коли отбывалося лем при самой музыкі, а все было сполучене с концертом, то с представлением. Цілы десяткы такых кружков и хоров оставили по собі славне и николи незабыте имя.


Loshniv
Лемковский хор в Лошневі, Тернопольской области в Совітском Союзі.

Мы были счастливы и с тым, што меже нашом так старшом, як и молодшом емиграциом нашлися с талантом люде, котры написали нам цілый ряд представлений из народного житья и на родном, зрозумілом каждому из нас языку. До такых представлений не лем же акторы радо брали ролі и добре их исполняли, але и тоты представления оставляли на каждом зрітелю очаровательне впечатліние. Нераз такы представления и народны співы побуждали присутных до співу, до плачу, до патриотизма. Духом тых представлений кріпнула наша организация Лемко-Союз. Кто был на даяком лемковском предприятию, тот и был задоволеный.


Nikifor
Веселый розговор членов Ансамбля с артистом Никифором Дровняком.

Тоты, котры працуют при устройстві такых предприятий, знают с практикы, што даже найбольшы и найлучше организованы кружкы и хоры на долго удержати не можна, бо через рок, два, три заходят зміны до реорганизации. Не всяди удалося реорганизовати такы кружкы, где они даколи были и славно розвивалися. Но барже всяды так было, што послі роспаду єдного хора або кружка через пару літ организовалися новы кружкы и хоры. То относится до барже каждой нашой колонии на территории Соєдиненных Штатов и Канады.

Приятным являтся тот факт, што ище теперь, по тридцети роках существования нашой организации все час до часу повстане до житья нова группа театральна, хоральна, ци танцорска. И под теперішню хвилю у нас, хоц рідше, але находятся такы культурны кружкы и то не так планно организованы. Поміщены меже тыми рядками фотографии доказуют правду о том, што пишеся.

Для нас ище больше радостнійшом явилася тота правда, што и теперь, послі страшно розрушительной войны, нашы лемкы там на родных своих селах в Карпатах берутся до культурной роботы, начинают организоватися в хоры и кружкы.


PaulStefan
Лемковский Ансамбль Співу и Танцу с Білянкы.
Руководитель Павел Стефановский.


На Лемковщині початок такому кружку и хору дал молодый интеллигент из села Білянкы в Горлицком повіті, Павел Стефановский. Он организувал Ансамбль Лемковского Співу и Танцу, с котрым выступал по лемковскых селах, по містах в Крыници и Горлицях, передавал из Жешова народну пісню по радио. Они начали свои выступления в пожичаных костюмах. Коли о том довідалися нашы люде в Америкі, то начали присылати жертву на покупку новых стройов. За короткий час было собрано близко 350 долляров на тоту ціль, котры были высланы до краю и выужиты на то, на што были призначены. Тут видиме фотографию того самого хора, што и минувшого рока в Календарю Л. С. Но минувшого рока они были одіты в пожичаный крой, а сего року уж убраны во свой власный крой.


PaulNikifor
Павел Стефановский встрічатся с артистом Никифором Дровняком.

За приміром Білянкы пішло село Бортне, котре дало тоже ряд представлений в свойом и в другых селах. Жалуєме, што фотографии из того кружка нам не удалося получити. За ними пішла Высова. И они организовали невеликий, бо их дуже теперь в Высові неє, але свой кружок, котрый тоже дає представления.

Тоты кружкы найчастійше пользуются театральныма штуками, изданными нашом организациом Лемко-Союз в Америкі. Мы ище идеме дальше в том напрямі, бо минувшого року наша редакция издала три новы штукы, штобы хоц в малой мірі забеспечити нашы кружкы в потребный им материал. Кромі тых кружков на Лемковщині, существуют и ведут свою роботу лемковскы кружкы на выселению в Западной Польші.


Wysowa
Театральный кружок из Высовы.

И переселение нашого народа до Совітского Союза не было занедбане. Минувшого 1960 року мы довідалися о знаменито организованом хорі из лемковскых переселенцов в Лошневі, Тернопольской области. До того хора належит и лемковске дівча, депутатка Верховного Совіта. Як видно из поміщеной тут фотографии, хор замічательно организованый. Он не лем убраный в чисту лемковску народну ношу, но и знаменито пописуєся співом в своих выступлениях и в соревнованию с другыми хорами в окрестности.

Успіх выступлений нашых кружков, хоров и танцорскых групп, то ище єден доказ культурного богатства унаслідженого нашым народом по своих предках.




[BACK]