Тото острооке дівча Сандра Ди, котрого фотографию повысше видите, то дітина лемковского роду. Минувшого року єй имя заблестіло в Голливуді, як свіжа вечерня звізда. Єй дідо Аким Банько, родом из села Избы, Грибовского повіта, на Лемковині, то читатель нашой газеты “Карпатска Русь”, от єй початков. В місті Байонн, Н. Дж., где он жиє, и где родилася Сандра, он єст передовым общественным пионером, закладательом запомоговых братств, клубов и русскых парафий. Друга єй баба и дідо, то Александер Цимбаляк. Сандра начала свою карьеру ище на 12 року житья. Єй взяли за модель. На 16 року она уж начала выступати в фильмах, на 18 року она уже была признана и принята в созвіздие Голливудскых акторов. Сандра Ди обычайно приходила из Голливуд до Байонн каждого року на русскы Великодны Свята до свого любимого діда Акима Ванько, котрого она барз любит и шанує. Но сего року коли она вернула, то весь город Байонн уж витал єй не лем, як “дівча зо сусідства”, а яко Голливудску звідку. Витал єй майор, учители школ и весь народ. Для всіх того дня было велике торжество. Кромі участи в фильмах Сандра Ди выступала и по телевизии, но ціле літо минувшого року она пробыла в Римі, беручи участие с такыми извістными акторами, як Рок Годсон, Джина Лоллобригида и Бобти Дарин в новом фильмі “Приходь, сентябрь”. В тот сам час, в Нью Йорку начал показуватися фильм с єй участием под назвом “Романоф и Жулиет”. В молодом віку, в яком єст Сандра, она уже заслужена для Голливуда, за ньом уж єст высше 10 ріжных фильмов, в котрых она брала участь. Популярность Сандры Ди єст так велика, што минувшого літа на окладках десяти американскых журналов были уміщены єй фотографии в кольорах с историями єй житья в середині. Недавно лем американска пресса подала новость, што “Универсально-международна красотка Сандра Ди перед своим поворотом в Рим подписала новый сімрочный контракт с компанийом продукции фильмов. Она припоминат, што то єст доказ, што думают о ней в Голливуд, бо такых контрактов Голливуд днеска трудно подписує с акторами. За участь в фильмі Ю-1 она получила 150 тысяч долларов, но новый контракт гарантує єй подвойну сумму, котра каждого року буде подниматися выше. Молодому лемковскому дівчатю красоткі не мушено желати успіхов, она их уж має.
|
