Затих Народный Поет
Ivan Rusenko, Иван Ю. Русенко
ИВАН Ю. РУСЕНКО

Минувшого 1960 року дня 10 января затих навікы передовый поет, майстер лемковского слова, талантливый рисовщик и народный будитель — Иван Юриевич Русенко.

Великий наш поет Иван Ю. Русенко. помер на переселению в Совітском Союзі, Тернопольской области, Чортковского района в селі Королівка на 70 року свого многотворного житья, до послідньой минуты живо интересующий судьбом и свободом свого народа, организациом Лемко-Союза, газетом “Карпатска Русь” и Календарями Л. С., в котрых он принимал участь своими бесмертными поезиями и рисунками. Безжалостна смерть выпровадила його с меже нас и оставила не лем його родину, но весь наш народ сиротами.

Иван Ю. Русенко принадлежит к числу тых талантливых учеников Русской Бурсы в Новом Санчі, котры послі гимназии не могли продолжати свого образования, и не могли розвити своих природных дарований, талантов, бо у його родичей не было средств на то, штобы послати сына в высше учебке заведение. В гимназии И. Ю. Русенко был єдным из лучшых учеников и “матуру” сдал с добрым успіхом. Но послі того он был примушеный прервати науку и приняти службу сельского учителя, штобы заробити на хліб насущный.

И. Ю. Русенко родился в 1890 року в селі Красна, Кроснянского повіта, на Лемковщині, в родині бідного сельского заробника, у котрого не было ни куска свойой земли. Коли родиче И. Ю. Русенка хотіли поставити собі хату в селі, то мусіли купити найперше кавалок поля у єдного из місцевых господарей. Отец и мати робили у священника, а потом во дворі пана-поміщика, и так зарабляли на житья.

Меже всіми учениками новосандецкой Русской Бурсы И. Русенко выділялся своим рисовальным талантом. Нигде до ниякой школы рисования он не ходил, но як нарисовал на папері ци дакотрого из бурсаков, ци профессора гимназии, то выходили, як живы. Притом И. Русенко уміл схватити на папер характеристичны черты каждой особы, а головно єй уємны, слабы стороны в физичном сложении и в характері: так он выділялся особенно, як каррикатурист. Не лем в Русской Бурсі, но и в цілой новосандецкой гимназии каждый знал И. Русенка, як талантливого рисовальщика. А то выходило у него легко, без всякой натугы. Пару штрихов олувком — и уж правдива картина. То доставляло И. Русенку не лем славу, но и ріжны неприятности. Нарисує И. Русенко профессора гимназии, то профессор выйде конечно в смішном, каррикатурном виді, и уж неприятности.

В 1912 року И. Русенко окончил гимназию и сдал матуру, а в слідуючом року был покликаный на воєнну службу в австрийской армии и посланый до Сараєва, в Боснии. Там застала його Перва Світова война. И. Русенко пошол на фронт в рангі “фенриха” (прапорщика). Был на сербском, а потом на итальянском фронті. Офицером он был слабым, бо войсковой службы не пильновал, но войну пережил, и вернулся домів, где уж была польска держава.

Послі войны И. Русенко, не маючи средств для поступления в университет, должен был глядати даякого занятия. Получил службу, як сельский учитель. Польскы школьны власти не дали його за учителя на русске село, лем послали в польске село Лютча, Кроснянского повіта, где он пробыл с 1924 до 1945 року. Там и оженился. В 1946 року он переселился с женом и дітьми до Совітского Союза, на Западну Украину, где получил сейчас занятие учителя в єдном селі Тернопольской области.

День перед свойом смертьом он получил наш Календарь Лемко-Союза на 1960 рок, и дуже жалувал, што там не было його рисунков “Стародавны Лемковскы Типы”. Они не были поміщены, бо кус запізно до редакции пришли. Они поміщаются аж днеска в статьи Михаила Павляк. Майже всі они новы, рисуваны в 1959 р., так як на них подписано. И хоц он не видит, як они вышли в Календарю, но зато його народ видит их вспоминат його имя добрым словом и буде на вікы, бо написаного и нарисуваного, ани волами не выореш, ани сокиром не вырублеш.

Помимо того, што в Совітском Союзі он жил тихо и скромно, што здавалося, же никто за него не зна, сила його таланта чувствувалася кругом, и його похороны замінилися в величавй злет народа из близкых и далекых околиц. Яко учителю, вышли отдати честь учители місцевой школы с классами уставлеными в долгы ряды с цвітами и вінками.

Учителькы несли віко домовины, укрыте цвітами, а учители домовину с тілом И. Ю. Руссенка. Похоронный Марш супровождала школьна оркестра. С глубокым смутком жена Мария, сын Борис и дочка Надежда супровождали свого любимого мужа и отца на місце вічного мира. Засмутилася разом с ним лемковска земля, котру он так жаждно любил и оспівувал єй в своих вершах. Заплакал за ним весь лемковский народ вокруг земной кули, узнавшы о його кончині. Он не лем плакал, он николи його не забуде и його творы буде передавати на вікы будущым поколіниям.

Собрание всіх трудов И. Ю. Русенка буде не лем найславнійшым памятником поету, но и воспламенением народного духа, котрый на його трудах загорится до борьбы за право и свободу многострадального лемковского народа.

RusenkoEnd

[BACK]