Моя Отчызна — Иван Русенко
(Остатный верш Ивана Русенка)

Моя отчизна — Лемковщина:
Зараз за Саном, як за плотом,
За десят годин іду треном”,
А лем годину самольотом.

Моя отчизна, родне село —
То Коростенка под Кычером;
Не барз далеко — може буде
Да-с осем годин авто-каром.

Отчызна моя в Подкарпатью,
Где місто Кросно, область Ряшов
Єст там халупа, сад и поле,
Лем в чужых руках, уж не наше.

Отчизна моя така близка,
За тыждень часу зайду піше,
Лем мя не пустят без пашпорту,
Бо ник мі вызов не напише.

Не мам до кого ся звернути,
Хоц там зостало люди дуже,
Не мам там сестры ани брата,
Лем вшиткы люде для мя чужы.

Кедь бы я мал, люде добры,
Шапку-невидимку,
Поіхал бым- зараз до хиж,
Хоц лем на хвилинку.

Посмотрити на халупу,
На тот берег, на ту воду,
На то село, где-м ся родил
И где-м играл замолоду.

Посмотрил бы-м на Кычеру,
На Порубы, на Чешлины,
Сердце бы ся радувало,
На вид родной Лемковщины.

Мила отчизна — не далеко.
Зараз за Саном, як за плотом,
Лем мя не пустят без пашпорту,
Загородили, браму дротом.

Загородили вшиткы стежкы,
Колючым густым дротом,
А на проходах всюди стоят
Пограничникы с кулемьотом.


Лемко Переселенец.

Cottage



[BACK]