О богатстві люде найбольше говорят. Говорят о богатстві люде бідны, говорят о нем и богаты. Лем не єднано они вшиткы богатство собі выображают, В ріжных умах слово “богатство” выходит в ріжных формах. Сут річы, котры для єдной особы не представляют собом жадной ціны, для другых, то являтся найбольшым богатством на світі, без котрого им здаєся просто не можна жити. Так для єдных богатством являтся золото, дорогоцінны камені и металы, для другых печатаны грошы, для третьих дорогоцінны уборы, домы, земля и другы материяльны добра. Для другой категории людей представлятся инакше. Они уважают, што найбольшым богатством єст добре здоровля, фамилия, приятели, учены або талантливы діти и т. д. Ище иншых тішит, коли видят на світі прогресс, мир и любов меже людьми. Но уж каждый, кто має не єдно, але вшиткы тоты богатства, єст счастливый. Такий человік николи не проклинат и не жалує, же родился на світ.

ЛЕМКОВИНА: Здравничны заведения в Крыници.

Так, як всі люде на світі нарічут про брак єдного або другого с тых богатств, так само нарічут и нашы лемкы. Найчастійше они нарікали, што не мают землі, або не мают єй дост. Тоты, што мали землю, нарікали, што она камениста, неплодородна, пісна и так дальше, а потом нарікали и на цілый свой край. Нераз проклинали го. Они нарікали на нього покля не пішли во світ и не увиділи чужых народов землю. Хоц тота чужа земля была ліпша, то вода в ней не была добра, то воздух не тот, то брак дерева, а даже за тым каменном, котрый здавался непотребным, отчулся брак и потреба. Так уж ту понятие богатства перемінилося. С того видно, што в єдных обставинах то, што было богатством, в другых обставинах оно утратило тото значение. Так можна перемішувати и поровнувати всі другы богатства зо собом.

ЛЕМКОВИНА: Здравничны заведения в Рыманові.

Найліпше то стало ясным нашым лемкам, коли они утратили свой родный край в Карпатах. Теперь они познали, што их отцовский край с превічными лісами, пасвисками и чистыми, а в многых выпадках минеральными водами богатший от многых другых названых “богатым” крайов. Біда была лем в том, што той земли не было надост, што в совершенстві отсутствовала индустрия, што порядок социальный был несправедливый. Инакше Лемковина, то не лем красивый своєродный край, он красивый и богатый край.

Што он богатый, то о том можут быти свідками тоты красивы здравницы на территории Лемковины, котрых виды для приміра ту поміщаме. И зас біда лем в том, што за давных социальных систем лемкы до них не мали доступу. Нима корыстали чужы люде, котры мали грошы. Предвічны лісы, богаты пашом поляны, щипаный камень, то богатство краю, за што треба платити великы суммы, то дальшы богатства, лем же они были силом забраны народу. Так што наш край не бідный, он богатый, но мы тогды аж йому ціну нашли, коли зме го стратили.

ЛЕМКОВИНА: Здравиичны заведения в Ивоничу.

И под видом другых свойств наш край богатый. Тым другым богатством єст сам народ, його характер, способность, його талант.

Лем минувшого року отбылося пару выставок в Польші, котры открыли ціну народн. творчества, того всіми забытого народа, його великых талантов, уміния, способностей розума и рук. То єст другого рода богатства, котрого не мают и не всі знают му ціну. Из лемковского народа были и ище днеска выводятся замічательны талантом люде, люде всеціло отдаючися труду, творению культуры и тым самым творению любви, уважения и мира меже народами. Так и своим народом лемковский край не бідный, он богатый и тото богатство дає ручательство предвіщающе, што такий народ не згыне. Он може находитися в недостатках, он може чути на собі пригнетение, но то не значит, што он погибне.

ЛЕМКОВИНА: Здравничны заведения в Вапенном.

На иншом місци сего календаря дописователь из Львова пише о знаменательном, што значит высокоцінном, характері лемков из Тылича, переселенных в Совітский Союз и выражат своє переконание, што Тылич прекрасный и богатый, но и його жители прекрасны и богаты своим характером. Знаючи наш народ, мы с моральным правом можеме заявити, што тот очерк относится не лем к тыличанам, он относится к цілому лемковскому народу, а то єст єдно с народных богатств котрому трудно опреділити высоту ціны.

Вапенне, повіт Горлиці на Лемковині: Курортны Лазинкы.

Лемковский народ в тисках чужоземной неволі за вікы проявил велику силу енергии и створил богату культуру. Можна собі лем представити на сколько тот народ мог бы проявити, причинитися богатством свойой культуры, котра таится в нем, єсли бы он был свободным розвиватися, будоватися и творити.

Не можна не быти гордым на тот народ, не можна не цінити го. И мы ціниме не лем його край, але и його душевны способности, яко єдно из великых богатств світа.