Наше Село Климковка — Иван Гальчак

Село Климковка, повіт Горлицы отдалене 1В км. от Горлиц. В Горлицях єст староство, суд и станция колєйова. Почта была в Ропі, 6 км. от Климковкы.

Як документы показуют, то парафию в Климковкі заложила громада “писаным актом” з дня 20. ІІІ. 1726 року. Тот акт “Грамота” была переховувана в Прокуратории скарбу во Львові. На єй подставі того частного священникови о. Андрейови Вислоцкому наділено чверть рилі по назві “Галативка” с тым, же всякы податковы належности для уряду и дідичов мала оплачувати громада.

Перед Другом Світовом войном парафия была под патронатом дідичкы Марии Сталинской. Перед Першом войном долголітным парохом был о. Юстин Константинович, який помер около 1913 року. Ище перед Першом Світовом войном была в Климковкі читальня им. Михаила Качковского и Народна Школа. Я начал ходити в школу за учителя Вандзеловича. Был то человік добрый, русскых убіждений, но слабого здоровья. Школьны власти замінили його Ольгом Ступницком. Церковь, яку видно на фотографии побудувано в 1914 року, а отновлено в 1934 р.


KlimChurch
Лемковска церковь в селі Климковка, повіт Горлиці, побудована в 1914 року.

Плебания была не замешкана, а парох мешкал на приходстві в Лосі. Громада мала свои поля и лісы откуплены от дідича Геца.


—————o—————

Я родился 6-го августа 1892 року, в Бруклині, Н. Й. и дволітным хлопчиком мати принесла мене до села Климковкы. Там я пережил найсчастливійшы молоды рокы. Хоц нероскошне то было житья, але радостне и счастливе. От дітинства любил єм и горнулся до наукы, до книжкы, хотіл познавати світ, идти дальше за село и уж подростком я нанялся за слугу до Акима Дудры в Лосі, котрый вюл гандель в Российскых губернях. Коли климковский дьяк Иван Хованский зорганизовал “Вертеп”, я грал головну ролю Ирода, а ролю жида грал Онуфрий Дубинский, який зберал офіры. Зобраны грошы мы отдавали на Русску Бурсу в Горлицях. Не памятам докладні, в котром то року мы с “Вертепом” зачали коляду на велию в нашом селі Климковкі, а на Рождество Христово выбралися до сусідного села Лосье. Парох о. Константинович в церкви благословил, же будеме по обох селах ходити по коляді на помощь Русской Бурсі в Горлицях. В Лосі зачали мы колядувати з кінця села, званого “Телехівка” и дошли зме до приходского дома, так называли “Шлябант”. Ту перед нами показалися три люде: лосянский війт и два радны. Війт Петро Карель загородил нам дорогу. Ани крока дальше, вертайте назад до Климковкы, а мы сами собереме грошы и пошлеме на Бурсу...


KlimSchool
Лемковска народна школа в селі Климковка, повіт Горлицы.

Ци соберали грошы сами, то я того не знам, але мы на другий рок зробили то саме: обышли зме своє село и давай до Лосі, бо лосяне были богаты и сыпали самы коруны. Теперь мы договорилися робити иначе, а то добрати к нам ище єдного жида из Лосі, а тым жидом был Махаил Гыжа, сын Ивана Гыжы, лосянского гминного писаря. Думали зме, же як увидят, же жид из Лосі, то нас не выженут и пустилися колядувати по цілой Пелехівці. О. Константинович принял нас сердечно и гостил. Выходиме на Шлябант, а тот сам війт и радны дают росказ идти до дому. Великий жаль огорнул всіх, а найбольше жида Михаила Гыжу, бо он любил, як лосяне сыпали му кораны до бляшанкы. Я и жид стали зме на цисарской дорогі, коло Шлябанту и нарічеме на війта, же така неправда настала на світі. Мы, реку, хочеме робити Боже діло, а он выганят нас из села. Не знам, як долго мы простояли на Шлябанті, и смотриме, а ту ся змеркло, не виднося нич, а вся дружина оставила нас. Але видиме світло в єдной хижі. Я иду наперед и жид за мном, отворил єм двері, а ту полна хижа людей, лежит умерта женщина. Отец нашого жида Иван Гыжа, Иван Спульчик, лосянский дьяк и Иван Хованский, климковский дьяк, читают псалтырь. Я прикляк на обі коліна, перекрестился и молюся, як звычайно при умершом. Жид робит то саме. А ту сміх зо всіх сторон, же жид ся крестит и молится. Послі молитвы я присіл коло нашых дьяков и співали зме Псалтырь на четыри голосы. Жид не співал, бо не мал голосу лем позерал на мене и гладил свою жолту бороду. Позднійше выяснилося, же умерша была мати Вандровника, а бідный Михаил зостал покараный от свого няня, лем зато, же звюл людей на сміх.

Иван Ф. Гальчак.



[BACK]