Наша Ганчова

Минувшой осени, точно сказати 4 сентября 1960 року, нашы краяне приходящы або походящы из села Ганчовы, Горлицкого повіта на Лемковині устроили величественный ганчовянский праздник — Кермеш. Кермеш, який звычайно отбывался в Ганчові на Покровы Пресв. Богородицы, отбылся в Карпатрусском Американском Центрі, знаном, яко Лемко-Галя, дашто вчаснійше от оригинально празднованого кермеша в родном селі. Но наша Америка єст нова отчизна, то треба было пристосоватися до новых условий и выбрати выгоднійший для всіх день, коли бы могло, як найбольше число ганчовянов приняти участие в том торжестві. Был то уж не перший, а третий такий кермеш ганчовянов тут на емиграции. Замічательно то, што разом с емигрантами взяли численне участие и молодежь, діти, внукы и правнукы ганчовянов с близкых и с подальшых місцевостей Соєдиненных Штатов. А то уж доказує о том, што ганчовяне выховали в добром патриотичном духу своих дітей и велике большинство задержали молоде поколінне при собі.


Wedding
Лемковске весіля в Ганчові послі повороту из насильного выселения.

Лем добре, высоко морально и патриотично выхованы люде успівают тоту трудну для каждой народности задачу выполнити.

На кермеш, котрый был широко розголошеный в газеті “Карпатска Русь” и на всі званы ганчовянам розосланы тикеты, зышлися не лем свои єдносельчане, але и краяне с другых сел Лемковины, но особливо с найблизшых Ріпок, Высовы, Блихнаркы, Устья Русского, Квятони, Сквіртного, Климковкы, Лосі, Изб, Ставищы, Снітниці, Чарной, Смерековця, Кунковы, Ждыні и др.

Maidens
Ганчовскы невісты. Такыми и подобными фотографиями оздоблена книжечка “Село Ганчова”.

Были відомости, што на кермеш до Америкы рыхтувался приіхати ганчовский шолтыс Дідик и ище ктоси другий. Ганчовяне не жалували бы оплатити подорожь свому краяну с поза океану, але тоты трудны емиграцийны ограничения не єдну радост убьют на смерть. Так никто из краю не успіл явитися на том славном єдносельчанском торжестві. А была бы то велика радость. На кермеш напевно зышла бы ся така масса народа, што наша народна будова не помістила бы всіх.

Меже присутными было много передовых и широкоизвістных из народной роботы ганчовянов. А тоже был присутный Головный Предсідатель Лемко-Союза Иван Адамяк из Бруклина, Предсідатель Лемко-Релифа Петро Гардый из Бриджпорт, редактор газеты “Карпатской Руси” Николай Цисляк, настоятель патриаршого собора в Нью Йорку о. Петро Крохта и много другых. Всі они выголосили отповідны такому торжеству бесіды в часі богатого обіда, але ище перед самым обідом была знята обща фотография всіх кермешников, котру тут видите. Признательность за так устроєный и уміло проведенный кермеш слідує отдати членам Ганчовского Комитета, но на самом першом місци Тимкови Фецица, котрый не забыл о ничом, штобы торжество вышло с задоволением для всіх. Ганчовяне должны кромі подякы йому высоко гордитися, што мают меже собом такого способного управителя народными ділами.


Kermesh
ІІІ Ганчовский Кермеш, устроєный дня 4-го сентября 1960 року, в Карпаторус. Ам. Центрі в Юнкерс Н. Й. Участникы кермеша, сняты перед самом гостином. Ганчовяне к тому кермешу завершили важну задачу — они издали книжечком историю “Село Ганчова”.

Но не о самом кермеші мы хотіли писати, бо славны кермешы устроюют и другы краяне. Мы хотіли, бо необходимо о том вспомнути, написати о важном историчном ділі, котре ганчовяне и особливо Ганчовский Комитет завершили в связи с тым кермешом. Комитет Ганчовский постарался ко дню кермеша издати памятну книжку о Ганчові, як она и коли повстала, кто были єй першы закладатели, котры и в яком периоді являлися руководителями той громады, бо треба знати, што то тоты историчны подіи, тоты давны руководителі Ганчовы сут причином того, што ганчовяне тримаются солидно.

Меже нима жадны здрадникы, жадна туловина, жадны зайды ворожы их истории, традиции и обычаям не мают місця. В книжкі пояснено, кто были из Ганчовы першы пионеры в Америку, котры из них причинилися так до дальшой солидарности меже єдносельчанами, як и до розвития загально народных лемковскых культурных осередков организации парафий, школ клубов, обществ, Карпаторусского Центра и самого Лемко-Союза. Нам даже трудно бы было нараховати много другых такых єдносельчанскых групп, штобы так громадно и так вірно и сміло стояли в обороні прав свого народа.

Издати таку книжечку не каждый може, хоц бы мал и грошы на покрытие коштов издательства. Издание той книжечкы было можливе не лем по причині, што ганчовяне не пожалували гроша на ню, но она так много вмістила в собі моральной силы, што єй за жадны грошы купити не можна. Тоту книжку не написала єдиниця, не даякий єден человік, “што знає писати”, єй написали многы люде и тым она представлят собом велику силу народной енергии, стремлений и желаний их сильной волі.


Prewar
Передвоенны Ганчовяне на поминках на цминтарю в неділю.

Мы віриме, што днеска многы ганчовяне, або и другы краяне, ище не знают ціны, што ганчовяне выполнили издательством той книжечкы. Мы віриме, што даже тоты передовы люде, котры рішали и выдали тоту книжечку не всі и не в полной мірі розуміют значение того, што они сами выполнили. Тото аж осудит будучность. Чым дальше будеме отдалятися в историю, тым ліпше будеме видіти ціну того, што ганчовяне выполнили в 1960 року.

Недармо на кермеші в часі торжественного обіда редактор газеты “Карпатска Русь” и близкий сусід ганчовянов, заявил так:

“Днеска вы окончили 432-рочницу основания села Ганчовы. Вы собрали тоту четырестолітню историю и запечатлили єй на вікы в памятной книжечкі, котру сте издали к днешньому торжеству. Тоту историю, ци она добра, весела, ци смутна Вы днеска окончили, а начинате писати нову историю Ганчовы. Пиште же єй так, штобы в ней было больше світлых и славных сторонок. А писати историю будете своими ділами, свойом организованностьом, своим єдинством духа, вашом любовью меже собом.


Peelers
Ганчовскы дівчата в Совітском Союзі коло Тернополя, скрепчут компері и співают стародавны лемковскы співанкы.

“Ваша Ганчова была тяжко ранена и выкинена из свого дому. Она лежала пусто и мертво за цілих десят літ. Но вашы братья пионеры неустрашилися ниякых преград, ниякых страхов трудной будучности, повернули и оживили несчастну жертву. Поможте им, навязуйте наново порваны ниткы єдинства и пиште историю так, штобы не бракло ани єдного вашого имена покрытого добрыми ділами, в той новой вашой истории, на котру не будете ждати четыриста роков, а котру будете видіти ище за нашых дней житья!”

Треба признати, што ганчовяне минувшого 1960 року выполнили большу роботу от всіх другых єдносельчанскых комитетов в Америкі и Канаді. Ганчовянов с издательством свойой истории трудно буде доровнати єдносельчанам, котрого набудь другого лемковского села, бо як в початку повіджено, издание такой книжкы, яку выдали ганчовяне, то не легка задача. А кто не вірит, то най попробує, єсли завершит роботу, то буде слідуючий к ганчовянам.

С изданием памятной книжки с историом свого села ганчовяне сут першы, но надіємеся, што не будут остатны. Може и другы єдносельчанскы комитеты наберут в собі силы и постараются оставити вічну памятку своим поколіниям, так тым в Америкі, як и в родном краю, ци на выселениях живущым.

То прекрасне и похвальне діло!




[BACK]