О Нашом Лемко-Парку

29-го и 30-го октября с. р., то єст місяц перед самым выходом нашого календаря из печати в Лемко-Парку, той нашой народной здравницы на Американской земли отбылося друге с ряду рочне собрание його членов шергольдеров. На том собранию было избране нове правление Парка. Нове правление Лемко-Парка ріжнится дуже от всіх його попередных правлений тым, што до него вошло больше число молодых в Америкі рожденых, выхованых и вышколуваных лемков. Они приняли добровольно и с охотом уряды в полном сознанию того, што будут його вести на принципах американского бизнеса, но в духу и традициях своих отцов и матерей. На их лицях было видно не лем гордость за Лемко-Парк яко финансовый маєток, але и за його имя, и за всьо, што тото имя собом представят.

Штобы такой на місци доказати, нове правление Лемко-Парка на 1961 рок было выбрано в таком составі:


Стефан Гамерский, Предс.
Даниил Гумецкий, Містопредс.
К. Баров-Гузлей, Фин. Секр.
Петро Филяк, Кассир
Павел Воргач, Рек. Секр.
Иван Бенда, мол., Петро Цідило, Николай Гавриляк и Иван Адамяк — директоры.
Андрей Грабский, Стефан Геренчак и Стефан Милян, контролеры.

Так шесть из девяти урядников и директоров и єден из трьох контролеров, то молоды американці лемковского роду.

Коли у нас ище ани бесід о Лемко-Парку не было, то нашы люде старалися єдным. Они все повторяли: Дали зме нашым дітьом науку, выховали зме их при церквах, лишаме им и маєткы, але не лишаме им ниякого народного маєтку, нашы діти о нас гнет забудут. С тых застараных бесід пришло до того, што прогрессивнійшы люде, люде выхованы организациом Лемко-Союза и газетом “Карп. Русь” поддали идею покупкы такой фармы, на котру за близко 20 роков мы ани грошей не мали. Но коли идея о покупкі свойой народной здравниці, як єй в початках называли фармом, дозріла, то у нашого народа нашлося тилько моральной силы, што Парк остал купленый. Разом с том моральном силом нашлися и финансы. Не нашлися они отразу и не нашлися всі, але нашлося на столько, што найперше было чым дати задаток, а так до єдного рока и добру часть моргичу покрыти.


Kamjanka
Лемко-Парк: Дом “Камянка”

С початку, а и потом, коли уж Лемко-Парк был в нашых руках, находилися такы люде меже нами, што все недовіряли собі: ци тым Парком заинтересуєся наша молодежь, но и таку зневіру роспускали помеже другых, то шептом, то наголос, а были и такы, што голосно кричали и присылали дописи до редакции газеты “К. Руси”.

Так тото друге собрание шергольдеров в Лемко-Парку уж доказало, як тоты люде неправильно оціняли свою молодежь и с недовірием смотріли на ню. А тым, котры мали все віру в свои діти, их желания и надія начали перемінятися в правду на их очах, за их часов, и то дуже близкых часов.

Но о том, ци ліпше молодежь в комитеті буде сгаджатися и кооперовати, ци мудрійше и больше економично поведе діла Парку, ци даст больше удовольствие свому народу и поднесе престижь Парка меже чужыми на ліпшу высоту, мы мусиме подождати тот перший рок и попризератися на их господарку и руководство. Мы, як попередно, мали на них надію, так и теперь єй маме, што наша молодежь нашы надіи не заведе.

Як стоиме с Лемко-Парком в теперішный час финансово?

В нашом Календарю с минувшого року о том самом часі мы писали, што на Лемко-Парку остаєся 92 тысячы моргичу, то єст долгу до сплачения. На призывы в газеті “Карпатска Русь” нашы люде, котры в тот час порозуміли велике значение такой институции для нашого народа поспішили с закупком шеров и закупили их на таку сумму, што всего долга на Парку в теперішный час остало 37 тысяч и 500 долляров. Приходы Парка не покрыли росходы в тот перший рок, так, як Парк потребувал поправок, удосконалений и пристосования го до нашых народных выгод.

Был то для нас больше рок бизнесового курса и наукы, як самого бизнесу. В том року молодежь, нашы діти были допущены до роботы в Парку, где они познакомлялися со всім тым, чого Парк буде вымагати в будучности. Тут они мали можность провести много дискуссий и бесід, якы трудности и якы корысти стоят в будучности той народной институции. Часть из той молодежы вошла теперь в управление Парком, так што для них Парк не єст ани чужым, ани дачым новым и незнаным.

Єсли возмеме под увагу, што с 1959 року на 1960 рок нам удалося собрати с выплатити 54 тысячы и 500 долляров моргичу, то быти може, што нашым молодым заступникам удастся выплатити до рока тых оставшыхся 37.500 долларов долгу, и сплатити моргич.

Може статися и так, што они успіют выплатити лем половину того долгу або добре солидну часть долгу, то и то уж буде радостным для нас початком, бо они кромі того напевно не затримают Парк в теперішньом стані, а ище ліпше поправят го, додадут до нього вартости, поправят велике озеро, переформуют пару будов для женатых стариков, поправят дорогу, приведут до ужитку Стодольный Павильон и другы потребы. Коли лем половина с тых наміченых робот буде выполнена, то и тогды нам не треба нервоватися, єсли долг не буде до чиста ище выплаченый о рок часу, хоц о выплату Парку нам всім треба ище больше подбати, закупити больше шеров, абы улекшити роботу и тяжкы старункы нашых молодых.

Лемко-Парк уж в том першом року оставил по собі сліды в нашу лемковску народну историю и дал початок культурного наслідства нашым поколіниям. Помимо того, што в Карпаторусском Американском Центрі в Юнкерс, Н. Й., отбылися як звычайно предприятия Лемко-Союза, як праздник окончения Пресс-Кампании “К. Руси”, предприятие I Округа Л. С., Ганчовский Кермеш без всякой ущербы, то в Лемко-Парку тоже перед Великодньом была устроєна перша выставка писанок и другых ручных робот, в котром приняли участь 11 талантливых нашых людей. В Лемко-Парку минувшого року отбылися першы Лемковскы Русаля, котры вышли величественно, бо тысячы народа зышлося на 14 специальных автобусах из ріжных місцевостей и около 700 автомобильов, котрыма приіхали цілы родины и группы краянов. Но што найважнійше, то то, што в першу неділю августа отбылся ту перший на американской земли Талергофский День, на котром был даный початок сбора фондов на Талергофский Памятник, котрый в будучности, єсли буде достаточный фонд через 5 або 10 літ, буде можна поставити в Лемко-Парку або при Карпаторусском Центрі в Юнкерс, Н. Й. В Лемко-Парку уж отбылся и юбилейный XX съізд Лемко-Союза, засідания Лемко-Релиф Комитета и много другых конференций народного характера. Єсли в той традиции будут вестися діла Парку надальше, то в ньом укріпится и наш народный дух.


Lakeside
Лемко-Парк: Входный Павильон от стороны озера.

Слідуючым міроприятием в Лемко-Парку буде созване собрание дня 18 декабря 1959 р. для основания подвалин под музей “Лемковщина”, где бы были собраны документы и историчны памяткы с прошлых віков житья нашого народа в Карпатах, а и тут из житья нашой емиграции и єй поколіния. Єсли такий музей буде створеный, то вокруг него объєдинятся всі культурнійшы силы, всі образуваны и талантливы люде с нашого народа, а то буде наше народне ядро.

Головна ціль связи Лемко-Парку с нашым народом, то буде його кооперация с Лемко-Союзом. Тоту сторону діла обеспечило ІІ-ге рочне собрание шергольдеров Лемко-Парку тым, што до информацийной связи меже Парком и отділами Л. С. вмісто бывшого Дорадчого Комитета был избраный новый комитет в тот способ, што до него должны входити по єдном представителю с каждого отділа Лемко-Союза с окружной околицы и так, на 1961 рок для такой информацийной связи, што робится або плануєся робити в Лемко-Парку, были избраны представители из такых місцевостей:

За Пассайк, Н. Дж., Клифтон, Гарфильд и околицу — Григорий Кузмич; за Линден, Н. Дж. — Михаил Легоцкий; за Елизабет, Н. Дж. — Анна Челак; за Юнкерс, Н. Й. — Петро Корба; за Нью Йорк, Н. Й. — Юрий Млинарь; за Стамфорд, Конн. — Владимир Гнатович; за Джерзи Сити, Н. Дж. — Михаил Варянка.

Тоты представители будут позываны на засідания Правления Лемко-Парка с дорадчым голосом и будут докладати в своих отділах о ділах Лемко-Парка.


Resturant
Лемко-Парк: Реставрант.

1960 рок не дал прихода в виді грошевом, но Парк поднюсся на вартости тым, што были проведены роботы поправкы купального озера, поставлена площадь с вішалками для дітей, докуплены два човны, купленый трактор, косилка, трок (тягарове авто), и др.

В новом року 1961 и при новом правлению в Лемко-Парку надіємеся поправы и уліпшения цілой господаркы. Но сам уряд и правление всього зробити не можут, они потребуют помочи и кооперации от всього нашого народа. Они будут працувати для добра и престижа Лемко-Парка, то и народ должен помочи им и финансами и частым посіщением Парка так, абы он направду стал ядром и осередком нашой емиграции, нашым лемковскым селом на Американской Земли.




[BACK]