Село Варадка (оповідания) — Федор Риндик
(СЕЛО ВАРАДКА, ОКРУГ БАРДИЙОВ, НА ПРЯШЕВЩИНІ)

Мая 3, 1959 года в Варадкі, як был обход на Великдень коло церкви, то далися одобрати, штобы помістити до Календаря Лемко Союза, абы виділа ціла Америка и Канада и оставила собі на памятку.

Великдень был холодный, небо похмарене с полночы потігал зимный вітер. Паробкы и воякы, што пришло их десятох домів на свята, посходилися коло церкви, где молодый священник Илья Кокош, што лем два рокы, як пришол с Пряшева, надівал уж на себе білы кошули под верхны різы и готовился святити пасхы. Позносили Варадчане свои паскы коло церкви, но Варадскы цигане стали перше и поставили свои паскы на самом переді, и гордо смотріли, чыи паскы богатшы — их, ци газдівскы.

В процессии коло церкви с великым достоинством крачали вокруг священника учитель Петро Дзямба, Федор Варна, учителька Федорочко и церковный уряд — Михал Корба и Михал Галецкий, Юрко Дзямба, Ваньо Бурий. Кресты и хоругви несли передовы паробкы: Михал Гузий, Василь Коцур, Ваньо Федорочко, Михал Ковяр, Михал Корба, Илья Коцбун. Дівчата убраны на біло несли образ Пресвятой Богородицы. Чисто и торжественно убраны видно было старшы бабы, хлопи и молоды газдове.

Свідками того Великодного торжества были высокы памятники на цминтарю, што єст коло церкви, а то тоты на могилах Марии Риндик, Осифа Гузий, о. Емилиана Капишовского, Марии Корба, Тимка Федорочка и другы.

Я мимоволі вспомнул собі 1915 рок, коли мадьяре спалили цердовь во Варадкі, як их гнал из востока рус. Зо злости они спалили стару церковь, што стояла там 405 роков, но дерево у ней было черстве, як сталь. В 1923 варадчане поставили нову церковь. Грошей было дост на муровану церковь, бо их американскы варадчане прислали, а то была красна сумма 250 тысяч корун. Церковь не стояла ани єндого цента газдов во Варадкі. За каждого таляра тогды платили по сто корун, но пару жен запротестували против мурованой церкви, же они не хотят достати ревматизм. А теперь мы варадчане из Америкы послали зме им 438 долларов на новый иконостас в церкви, а єден образ принесли цигане с Прагы, як ся вертали до Варадкы по войні.


VarChurch
Сельска церковь св. Покровы в селі Варадка, на Маковици, Пряшевщина.

Як уж бесіда за циганов, то раз женился циган Ваньо. Брал богату циганку с Бардейова. Зашли обоє на фару давати на оповіди. Священник Капишовский жартобливый, а с циганами бесідувал по циганскы.

— Добре, — гварит священник, — я ти дам шлюб, Ваню, в каплиці, и на тоту оказию запросил попов з родинами с цілой Маковиці, абы мали дост сміху с циганского весіля. А цигане тыж запросили вшиткы циганскы родины из цілой околиці. Ище перед шлюбом працували и на цілый кильометер от каплиці заровнали ямы на дорозі каміньом. Пастухы тыж хотіли видіти циганске весіля и позаганяли худобу вчаснійше домів. Так што на весіля зышла ся така страшна гурма народа до Варадкы, як на нияку другу оказию. Цілы процессии циганов идут с музыком ку каплици, где буде шлюб. Циганам кровь с ног лієся, бо покалічили собі по остром каміню, але они на то нич не звертают увагы, лем машеруют и по дорозі танцуют. По шлюбі цигане на свадьбу до циганскых буд, но як довідалися, же на фарі повно попов и попадь, то ище параднійшу процессию устроили поперед фару. Поділилися на дивизии Бардийовский округ, Свидницкий, и т. д., а на фарарском подворци потом остали, попилися и танцували цілу ночь до рана. Мали на што призератися попы, попаді, а и ціле село, ліпшого видовиска им не треба было.

Но тоты самы цигане потом показали и так велику любовь до свого села Варадкы, а было то так:

Коли в 1939 року Гитлер пришол до Чехословакии и до Варадкы, коли уж ишол брати Польшу, то варадскы цигане настрашилися до того розміру, што счезли гдеси, як дым. Не было их в Варадкі за полных 18 роков, но два рокы тому в Прагі они дозналися, што в Варадкі дают робити новый иконостас в церкви, то цигане собралися, зложили грошы и купили образ Пр. Богородицы Марии, забрали зо собом три козы и с процессном привандрували на піше с Прагы до Варадкы 68 циганов, абы подарувати образ до иконостаса и остатися в Варадкі.

Як ишли с процессном с Прагы до Варадкы, співали пісни и циганскы співанкы, абы им было лекше машерувати. В тых співанках робили собі збыткы над злом памятью Гитлера, выдризнялися йому и страшныма словами проклинали го. Тоты співанкы и проклоны зложили сами, як знали. Процессия тревала пару тыждней, бо с Прагы до Варадкы далека дорога.

Як уж пришли на гору от Ялинок, где даколи была капличка св. Николая и увиділи Варадку, вшиткы попадали на коліна и цілували землю. Варадчане, як увиділи гурму народа машеруючого на село, барз пострашилися, што мадьяре, напевно подняли революцию и машеруют из Будапешту.

Но цигане, як дощли до села с образом и трьома козами, на колінах обышли три разы церковь, співали, плакали такыми голосами, што аж за сердце стискало. Але як дошли потом, где были циганскы буды, то посідали на ватриско, бо вшиткы буды были розбурены.

Было дост трудности с циганами и для варадчанов и для рыхтаря села Ваня Федорочко, бо треба было их якоси притулити и помочы отбудуватися. Но але и село повеселіло, бо як цигане наілися и напили, то зачали грати. Грали, співали, танцували и наплакалися кілько лем могли. В Прагі им было добрі, бо там сут фабрикы, но нигде они так счастливо не чуются, як в родной Варадкі, на Пряшевщині, бо як то гварят, же где ся птах вылягне, там го все тягне, Теперь не лем село Варадка, але ціла Маковица зас має найліпшу музыку назад, бо они и до войны были найліпшыма музыкантами на околицю. Правда, же до войны их было в Варадкі лем пять фамилий, а теперь их вернуло аж 68 особ. Но што зробите, як то уж саме сватство, швагерство и родина.

Варадский хотар дост великий, граничит с 8 селами: с Радоцином, Ожинном и Грабом по польской стороні и с Нижньом Полянком, Никльовом, Ядлинком, Бехеровом и Вышньом Полянком по Чехословацкой стороні границі. Варадска парафия складатся из трьох сел Выжньой и Нижнньой Полянок. До Бардейова из Варадкы дві милі и дві милі до Свидникох, або як их называют Русском Маковицом. Варадка принадлежит к Бардийовскому округу, а тече през ню ріка Ондава. Русского народа в Варадкі 302 душы и 68 циганов.

Привіт всім.


Федор Риндик.



[BACK]