Михаил С. Донский

Карпаты населяют гуцулы в околици Чорной Горы с центром Коломыя, бойкы между Ломницом и Саном с центром Турка и лемкы по обоим сторонам Бескидов меже ріками Саном и Попрадом с центром Горлицы.

Название лемков пошло от частицы “лем”, што означат: только, лиш. Лемкы — то потомкы славянорусского племени білохорватов. Всіх их по обоим сторонам Карпат 500.000 человік, а их нарічие содержит в собі много древне-русскых архаизмов: што, быти, днесь, брада, гварити, а также немало в нем польско-словацкой приміси.

Национально-историчне название у лемков: русин. Свою отчизну они называют Русью, котра была составном частью Червенскых городов, затым она входила в состав Галицко-русского княжества аж до 1340 года, то єсть, до захвата його польскым корольом Казимиром ІІІ. Под властью польскых королей Лемковска Русь находилася до 1772 года, до розділа Польшы.

В продолжении того времени она кріпко держалася свойой народности, віры, нравов и обычайов.

С 1772 по 1918 годы Лемковска Русь находилася в составі Австро-Венгерской монархии. Тот период неволі знаменувал собом ряд крутых мір німецкой и мадьярской администрации против єй населения. Особенно много оно вытерпіло во время Первой Світовой войны 1914 до 1918 годов. Тилько за єдно русске имя австрийскы палачы вішали, стріляли и всю, поголовно интеллигенцию и сознательне селянство, подвергли жестокым переслідованиям, вывозячи так мужчин, як и женщин в концлягери, из котрых Талергоф был самым безпощадным.

Послі розвала Австрии, Лемковщина очутилася в преділах панской Польшы. В продолжению 20-ти літ 1919-1939, русины-лемкы отбудовували свои войном розрушены села и господарства, возобновляли культурно-просвітительны огнища: приюты для селянскых дітей, народны читальни Общества им. Михаила Качковского, кооперативны лавкы и любительны драматичны кружкы, наводили связь со своими земляками, переселившымися ради заробков за океан в Америку, массово покидали унию и успішно справлялися с агентами чужых империализмов.

Жертвы карпаторусского народа на Лемковщині, особенно старшого поколіния были огромны. Австрийскы чиновникы именовали лемков руссофилами и агентами Москвы за их ориентацию на великий русский народ. Всі же концлягери в Терезині и Талергофі не в силах были убити их стремление к национальной свободі. Не удалося його задавити и шляхецкой Польші, востановшившой своє господство над Лемковщином послі падения Австрии.

С побідом октябрьской революции в России яркым пламенем загорілося национально-освободительне движение в Карпатах. Лемковщина поднялася на борьбу против гнета аристократии поміщиков, капиталистов. Прежде всего организовалася робоча и крестьянска молодежь.

Владимир Поруцидло, командир партизанского отряда в районі Крыниці.

Русины-лемкы: Григорий Водзик, Федор Мальцев, Пантелеймон Бескидняк, Петро Тимик из Мысцовы, Иван Серняк, Федор Серняк, Павел Швед, Василий Оленич, из Перегримкы, Стефан Пийко из Клопотницы, братья Донскы, из Воли Цеклинской, Єва Драль из Терстяной, Макух Стефан из Кросна, Ромцьо Иван, из Устья Русского, Юрковский Павел, из Сквиртного, Поруцидло Владимир, из Крыницы, Китик Лукаш, из Брезовы и другы, совмістно с организаторами польской молодежы, товаришами Войцехом и Станиславом Косибами, Павлом Карпом, Станиславом Шуреком, Кулей Францишком из Гарклевой и другыми товаришами проводили воспитательну роботу в селах Подкарпатья, знакомили население о жизни трудящыхся в Совітском Союзі, роспространяли робочу литературу.

Многы представители лемковской прогрессивной интеллигенции тоже стали активными пропагандистами идей Великой Октябрьской революции среди населения Лемковщины. Послі запрещения Пилсудскым Коммунистичной Партии Польшы, русины-лемкы и полякы ушли в подполье, откуда старалися внідряти идею социализма в гущі населения.

Многы из них, як Григорий Водзик, Єва Драль и другы были нісколько раз арестованы за антифашистску діятельность.

Так было на Лемковщині до падения панской Польшы.

В 1939 году гитлеровскы полчища, кромі России, захватили всі славянскы земли. Судьбу Чехословакии и Польшы розділила и Карпатска Русь. Разом с Польшом под сапогом тевтонского сатрапа нашлася и Лемковщина. На ню тучом нагрянули гестаповцы и их прислужникы — украинскы буржуазны националисты, біжавшы из Совітской Украины перед гнівом власного украинского народа. Послідны получили от німцов задачу организовати на всей Лемковщині У. Д. К. называны “Украинскы Допомоговы Комитеты” во главі с “мужьями довірия”, т. є. агентами гестапо, и украинску “січову” полицию.

Партизанка Єва Драль, из села Терстяной, 85-літна старушка, проживат теперь коло Тернополя в Совітском Союзі.

Знаючи о том, што на Лемковщині суть сильны симпатии к русскому народу и Совітскому Союзу, украинскы комитеты приступили к переписи єй населения, лучше сказати, к составлению чорных списков тых лемков, котры называли себе русскыми. Но не смотря на застрашения и всевозможны приманкы в виді деревяной обуви, брюквенного мармолада и гнилой селедкы для тых, котры назвут себе под час перепискы украинцами, националистична пропаганда украинцов на Лемковщині не мала успіха, и затія с переписью потерпіла полный провал. Абсолютне большинство лемков кріпко стояло при свойом национальном имени и без страху отмічало свою национальность русской.

Григорий Водзик, из села Мшаной, организатор партизанского движения на Лемковщині.

Кстати, о горячых симпатиях лемков к русскому народу и Совітскому Союзу свідчит тот факт, што уже в 1940 року началося на Лемковщині сильне движение за переселение лемков в Совітский Союз, куда в самом ділі многы из малоземельных селян переселилися добровольно.

(Самым горячым пропагандистом емиграции лемков в Совітский Союз был инжинер Сергей Дуркот, автор брошюры “Лемковщина Сибир”, Львов 1934 год). Разом с женом и двоима дітьми он был звірски убитый в лісу коло Потылича, Рава-Русского района, украинскыми фашистами в 1944 году).

Под час Великой Отечественной войны лемковскы общественны организации в Соєдиненных Штатах Америкы и в Канаді организовали широку кампанию за укріпление дружбы между американскым и совітскым народами, при чом трудящыся лемкы вносили охотно свои трудовы ощадности в фонд помощи Совітской армии, выражаючи тым свою солидарность с народами, борющымися с фашизмом. Кромі того, многы лемкы сражалися в рядах американской армии против гитлеровской Германии и империалистичной Японии.

Иван Донский, II командир Подкарпатского отряда партизанов.

Лемковском общественном организациом в Америкі Лемко-Союзом было собрано и выслано: больше 100 тысяч долларов, на 160 тысяч долларов одежы, за 36 тысяч долларов оборудование для госпиталя им. Боткина в Москві, 5 тысяч пар ботинок для Совітскых партизан, на молоко, на лікарства и много тысяч на другы ціли.

Убідившися в том, што на Лемковщині не удастся создати фашистский плацдарм для борьбы против Совітского Союза, украинскы националисты и шовинисты начали подготовку к массовым репресиям против лемков. Когда же в 1941 року фашистска Германия напала на Совітский Союз, то тото ище в большой мірі розвязало рукы украинскых националистов. Вся их свора бішено набросилася на т. наз. “москвофилов”, и поганом славом на всю Лемковщину прогреміли имена лютійшых врагов и предателей украинского народа: Звирика, школьного инспектора в Яслі и переводчика в канцелярии крейсгаутмана, Петрука, адвоката в Жмигороді и информатора німецкой комендатуры, Батюка, школьного инспектора в Высові и агента гестапо, Петрушко, коменданта украинской полиции в Устью Русском, Русинко, коменданта той же полиции в Ропиці Русской, Бойко, замістителя ландкомисара в городі Горлицы, братьев Ивана и Владимира Лещинскых (Владимир помощник ландкомиссара в Горлицах, Иван власник магазина), дальше Жемелко, власник магазина в Горлицах и агент гестапо, Гамула Михаил, учитель в Перегримкі, Ничка, адвокат в Кросні, униятский священник Шалаш в селі Мысцові и агент гестапо, котрый на свойой совісти має около 30 тысяч человік жертв, и многых другых палачов родного народа, котрых и не можна перечислити.

Стефан Донский, другий брат Михаила, член ППР.

Агенты гестапо из украинскых комитетов, як гончы псы, выловлювали т. н. “москвофилов” — так 24 июня 1941 года, т. є. три дни послі нападения фашистской Германии на Совітский Союз, пошли на Лемковщині массовы арешты среди интеллигенции и селян. В тюрьму были кинены всі православны священникы, учители, общественны діятели русскых убіждений, среди них Николай и Павел Юрковскы из Сквиртного, Собин П. из Бортного, Русинко Н. из Смерековца, семья Байков из Зендрановы, Колдра из Святковы, Сайферт из Баницы, Гайда П. из Мысцовы, Русиняк из Липной, Соболевска из Новицы, Федорко, директор школы, из Смерековца, др. Орест и Александр Гнатышакы, (были вывезены в Освенцим и замучены на смерть), и сотни другых сознательных граждан. Лемковску молодежь массовыми группами стали вывозити в Германию на каторжны роботы. Так як пропаганда украинскых комитетов и украинской полиции не мала в лемковскых селах ни найменьшого успіха, несмотрячи на то, што як німецкы фашисты, так и украинскы буржуазны националисты звертали особливе внимание на территорию Лемковщины, росположену на стыкі трьох славянских держав, — Польшы, Чехословакии и Совітского Союза, — а также учитываючи ище тото обстоятельство, што основна часть той территории состоит из горных массивов, покрытых лісами, и обладає найбольше благоприятными природными условиями для организации партизанского движения. Весьма характерным и достойным внимания являєся тот факт, што позиции украинского национализма в Америкі, где проживают сотни тысяч емигрантов из Галиции оказуются найбольше слабыми среди лемков, исповідающых культурне єдинство со всім русскым народом. Всьо тото разом взяте бісило украинскых националистов, стоящых на услугах Гитлера. Украинска полиция проявляла особливе усердие во гляданию коммунистов, изпользуючи архивы польской полиции, ставши достоянием гестапо и фашистской администрации. Комендатурі украинской полиции в Крампной удалося напасти на слід неустрашимого организатора лемковского подполя, Григория Водзика, пользовавшогося кличком “Высциг”. Водзик был арештованый украинском полициом из Крампной, но потом по дорогі из полицейскых застінок он біжал. Находячися на нелегальном положению, он стал налажувати связь с уцілившыми от арештов коммунистами. Была создана коммунистами поляками и лемками подпольна антифашистска организация “Подкарпатскых Патриотов”. Тота организация поставила собі за ціль объєдиняти всі антифашистскы елементы и подготовляти их для дальшой борьбы с оккупантами.

Тимофей (Цап) Донский,

В февралю місяцу 1942 року сорганизовалася Польска Робоча Партия, то была партия организована польскыми коммунистами. Организаторами Подкарпатскых Патриотов были первыми членами и организаторами Польской Партии Робочых на Подкарпатью, як: Григорий Водзик, братья Донскы, Стефан Пийко, Иван Серняк, Федор Серняк, Василий Оленич, Павел Швед, Тимик, Бескидняк, Явиляк, Мальцев и другы товаришы.

Партийны комитеты и бойовы коммунистичны пятеркы Г. Л. немедленно были организованы в селах Подкарпатья, а именно: в Перегримкі, Клопотниці, Волі Цеклинской, Мысцові, Устью Русском, Розділю, Брезовой, Мацині Великой, Ганчові, Сквиртном, Бортном, Солотвинах, Ліщинах, Баниці, а также в городах: Горлицах, Яслі, Жмигороді, Крыници, Кросні и Санокі. Польскыми коммунистами были организованы на польскых селах, як в Гарклевой, Вуйтовой, Особниці, Крыгі, и другых селах и городах Подкарпатья. Коммунисты и прогрессивне население всьой Польшы стало организовати борьбу с оккупантом. Первыми и самоотверженными в той борьбі были, конечно, коммунисты.

Лемковскы комитеты вошли в состав Подкарпатского округа № І, секретарем котрого был избраный Стефан Пийко из Клопотницы, а начальником штаба округа Григорий Водзик из Мшаной родом, а послідне время проживавшого в селі Мысцові. В марті місяці 1942 г. состоялося в городі Горлицах совіщание партийного актива Подкарпатского округа № І, на котром присутствували партийны руководители Краковского округа, а также члены Центрального Комитета Польской Робочой Партии в лиці Владыслава Гомулкы по кличкі “Веслав”, Людвинской Ядвигы, “Густава” и другы.

На совіщании было принято рішение приступити к активным дійствиям против фашистскых оккупантов. С той цілью на Лемковщині была создана бойова группа из 12 человік под руководством Гр. Водзика. Тота группа состояла исключительно из місцевых жителей — лемков и поляков, котры были уже по разным причинам на нелегальном положении, а заданием єй было:

1. Добывати оружие и с оружием проходити в ночы лемковскы села, выловлювати фашистов и их слугов, вести освідомительну пропаганду о неминуємой гибели гитлеризма и фашизма на славянскых землях.

2. Наводити справкы о тых, котры сознательно и несознательно содійствовали фашистам, предупреждати их о отвітственности перед партизанами.

3. На місті уничтожати агентов гестапо, нищити телефонны проводы и всяку связь агентов со штабами оккупантов, конфисковати и уничтожати документы сельскых управ на поставку продуктов для гитлеровской армии.

4. Ламати всі приспособления для переробкы сельскых продуктов: винокуренны заводы, маслобойны, уничтожати запасы хлібов, картофеля и прочых съістных продуктов, необходимых для снабжения армии захватчиков.

5. Отнимати пишущы машинкы, шапирографы для розмножения листовок, радиоприйомникы и телеграфну аппаратуру.

По результатам той внушительной роботы гитлеровцы почувствовали, што они находятся на враждебной землі. Они перестали быти увіренными в свойом свободном передвижении с міста на місто. В любе время дня или ночы, стали понимати, што, кромі их господства, существує в Карпатах якаси то невидима сила, котра внезапно и неизвістно откуда и когда може нанести им смертельный удар.

Особенно тота подпольна робота убийственно дійствувала на умы найомников гестапо, на предателей славянскых интересов, на украинскых рабов фашизма. Они пряталися в затише, уже не так активно бралися за свою погану роботу, не так горячо увлекалися фашистскыми порядками.

Слідує отмітити, што акция лемковскых партизанов против оккупантов была сопряжена с большыми трудностями, так як у них не хватало оружия и бойовых припасов. В большинстві случайов бойцы пользовалися австрийскыми и польскыми винтовками старого образца, но несмотря на то, они ділали всьо, што было в их силах. Итак 1-го мая 1942 г. не только крышы сел Подкарпатья, но и домы городов Ясла, Горлиц и Крыницы были украшены красными флагами, а стіны были заклиєны совітскыми лозунгами.

Дмитро Фундалевич, организатор вывіскы плакатов с призывом до борьбы с фашистами в Яслі 1942 р., теперь жиє в Бориславі.

В апрілю місяци 1943 г. была розроблена больша операция по освобождению 2.000 совітскых воєнно-плінных офицеров и солдатов, находившыхся в “лагері смерти” около города Рыманова. В слідствие того, што в лагері провокаторски дійствовал агент гестапо в маскі совітского воєнноплінного, будтобы майора Красной армии, план освобождения плінных и вывод их в Карпаты не осуществился. Майор-провокатор вошол в довірие плінных, с котрыми разом связался с коммунистами-лемками сусідных сел Терстяной и Кролика Русского, котрым выявил желание біжати из лягра. Коммунист Андрей Ярецкий из Кролика Русского и другы товаришы помогли біжати майору с нісколькыми плінными из лягера, передаваючи им ножницы для проволоки и предоставляючи им убіжище.

Подлый провокатор нісколько місяцов скрывался в селі Кролик Русский, только, когда уже должна была осуществитися операция по освобождению совітскых воєнноплінных из лагеря, открыл свою маску. В слідствии чого пало жертвом много партизан, и жителей села Кролик, активно помагавшых партизанам и воєнноплінным, очутилися в гестаповскых лапах, в застінках украинской полиции.

Самом тяжком стратом партизан была гибель Григория Водзика, командира Подкарпатского Округа № 1. Послі неудачной операции он был застигнутый в началі мая місяца 1943 г. в лісу в селі Перегримка и убитый разом со своим помочником Андрейом Ярецкым.

В их лиці, особенно в лиці Гр. Водзика, Лемковщина стратила способных организаторов подполья и доблестных бойцов-партизан.

Командиром штаба Подкарпатского округа № 1. партийна организация назначила мойого родного брата Ивана Донского.

Вскорі, однако, пришлося йому оставити тот пост и выіхати с тых районов. По поручению парторганизации, довелося мні заняти його місце в самых безотрадных условиях партизанского освободительного движения на Лемковщині. Прежде все нужно было росширити организацию партийных тройок и бойовых пятерок, установити больше близкий контакт с польскым партизанскым отрядом, командиром котрого был тов. Войцех Косиба.

Штобы не допустити того, фашисты пробували посіяти вражду меже русинами-лемками и поляками. И тут знова украинскы националисты оказали німцам немалу услугу, знаючи язык обоих народов и занимаючи руководящы посты в німецкой администрации краю. В ход ними были пущены всевозможны способы интриг, грошы и другы приманкы. Благодаря провокаторскым проискам украинской полиции и гестапо, были арестованы видны организаторы Польской Робочой Партии Краковского округа. Все же связь Подкарпатского округа с Центральным Комитетом не была утрачена. Центральный Комитет, передаючи Подкарпатскому округу больше значение, оказувал йому всяческе содійствие, давал инструкции и призывал к тісному сотрудництву польского населения с русскым населением.

В особенности необходимо подчеркнути в том общом ділі цінны заслугы нынішнього первого секретаря Польской Объєдиненной Робочой Партии Владислава Гомулкы. Он неоднократно приізжал в Горлицы в місті с другыми товаришами для того, штобы ознакомити нашу организацию с положением діл на фронтах и указати пути к наміченной ціли, в борьбі с оккупантом и построєнии счастливой жизни в нашой страні, в построєннии социализма. Такым образом, помощь Центрального Комитета Польской Робочой Партии, оказанна Подкарпатскому округу, была весьма желательном и плодотворном в сотрудництві между братными народами на протяжении всей Отечественной войны. Не можу не упомянути тут польскых подпольщиков — коммунистов, як: Косиба Войцеха и Станислава, Карпа Павла, Людвинску Ядв., Густава, Куля Францишка, Глендовского и другых товаришей, котры жертвенно боролися за свободу народа. Наровні с ними нельзя не упомянути тых земляков-лемков, котры уже в 1940 г. переселилися в Совітский Союз и котры, очутившыся в тисках німецкого фашизма, так или иначе включилися в борьбу против оккупантов. Во Львові во время німецкой оккупации подпольну роботу проводили братья Юлиян и Василий Дзямбы из Бортного, Панчак — члены Сель-Роба т. є. Коммунистичной организации селян и робочых. Они всяческы оказували содійствие партизанскому отряду, стоящому под командованием героя Совітского Союза Д. Н. Медведева.

В Тернопольской области группа лемков-переселенцев организовала подпольный комитет, котрым руководил тов. Ткаченко, исполнявший при Совітской власти обязанности предсідателя Микулинского райсполкома. В состав той группы входили лемкы: Иван Ромцьо, лісный инжинер, Владимир Ткач, студент, Семан Пейко, молодый предсідатель колгоспу, Максим Карпяк, и другы переселенцы. В часі облавы в селі Конопковкі коммунист Ткаченко был убитый фашистами, а його помощникы Иван Ромцьо, Владимир Ткач и Семан Пейко спаслися бігством в родну Лемковщину. Они благополучно пробралися в город Горлицы, где продолжали борьбу с лютыми оккупантами.

Будучи преданным ділу Коммунистичной Партии и способным организатором подполья, Владимир Ткач был избраный секретарем Подкарпатского округа. В началі июня 1943 г. состоялся в конспиративной квартилі (Донского М.) города Горлицы съізд представителей партийной организации Подкарпатского округа, на котром подробно обсуждалося создавшеся за послідне время положение на Лемковщині. Вслідствие поражений на восточном фронті німцы и украинска полиция приходили в бішенство и неистово бушували по селам. Чувствуючи свою гибель, они всю свою яру злость изливали лютійшыми пытками на пойманных партизанах и біжавшых из “лагерей смерти” совітскых воєнноплінных. Особенно свиріпствовала украинска полиция в Устью Русском, Ропиці Русской, росстрілювала плінных и партизан. Лемковска молодежь, не желаючи идти в німецку каторгу, уходила в горы, в дремучий лемковский ліс. Заставы украинской полиции ловили уходившых при помочы ріжных провокаторов и доносчиков на честных людей. В сіти украинской полиции в Устью Русском, где управлял Петрушко, попали братья Носаль из Крыницы. По звірскы избиты, поламавши им рукы и ногы, палачи бросили их в подвал с водом, находившийся под хижом хозяина Савчака, вірного слугы полиции, котрый робил у них извощиком, іздил с ними на облавы за партизанами и пользовался награбленным добром и одежом по убитых партизанах. Цілы добы в воді по коліна просиділи несчастны жертвы и, наконец, были росстріляны. То єсть только єден из многых приміров украинского националистичного мракобісия.

Мария Фундалевич, жена Дмитра Фундалевич, активна свому мужу в поддержкі партизанов и в борьбі против оккупанта. Обоє с мужом походят из Воли Цеклинской на Лемковщині.

Выслугуючы німцам, предатели из ОУН грабили население и отнимали у него не только съістны припасы, но дорогу церковну утварь, прежде всього мідны звоны. Украинскы т. н. “допомоговы комитеты” собрали из всей Лемковщины мідны звоны и золоты монстрации из церквей и всьо то в сопровождению униатскых священников, а также украинской полиции и діятелей из У.Д.К. торжественно вручили крейсгаутману в гор. Яслі. На украшенных подводах с звонами были вывішены лозунгы на помощь гитлеровской армии, против большевиков (а на самом ділі против русского и украинского народов, т. є. своих братьев). Тото всьо добро торжественно вручил крейсгаутману адвокат из Кросна Ничка. Он конечно, благодарил за подарок лемковского пота и крови, а його річь переводил на украинский язык палач Звирик, школьный инспектор в Яслі, явный агент гестапо, котрый має десяткы лемковскых жертв на свойой совісти.

Злодіяниям гестапо и “украинской” полиции не было конца. В конці июня місяца 1943 г. выступила на бой с оккупантами группа организованна Подкарпатскым округом, в рядах которой лемкы Явиляк, Шкимба, Мальцев, Лабик Дмитрий, совітскы воєнноплінны, біжавшы из лягерей смерти находившыхся на Чехословакии и другы. Помню храброго Василия Василиевича Назаренко, из поселка Михайловка Сталинградской области, Ивана Тетенова и Сергея из Сибири. Около гор. Дембица был розбитый отряд партизанский Г. Л., командиром котрого был “Стах”. Стаха и сім партизанов было прислано руководством краковского округа в Горлицкий район в Карпаты. Тоты дві группы партизан было объєдинено в єден партизанский отряд, котрый рахувал 25 человік, а командиром його был назначеный “Стах”. Отділ розвернул свои дійствия в Горлицком и Ясельском районах. Тот отділ провел нісколько бойовых операций. В лісу на горі Магура, около села Гладышова, Горлицкого района, он розбил німецкий транспорт, захватил больше количество винтовок и боєприпасов.

Німцы старалися ликвидовати отряд “Стаха”, но сами боялися итти в ліс. Потому высылали туда провокаторов под разными видами. Єден из них діятель украинского допомогового комитета, солтыс села Свиржова Русска, зашол в ліс с корзином, будьто зберати грибы. Выслідил місце, где был росположеный отряд “Стаха” и дал знак слідовавшым за ним німцам, тоты стали кидати гранаты в партизанский табор. Отряд “Стаха” был окруженый со всіх сторон. В тяжкой борьбі с німцами, отряд был вынужденый отступити, оставляючи на полю боя двох партизан убитыми: Шкимба и Ваньо Тетенов.

Село Воля Цеклинска, на Лемковщині, хижа Донскых в 1942 року.

Убідившися в том, што группа “Стаха” слабо вооружена, німцы принялися сильно єй преслідовати. По той причині Стах перекочувал с уцілившыми партизанами в район города Дембицы. Для связи с Подкарпатскым округом он выслал своих двух партизан, котры оказалися провокаторами, будучи связистами, были хорошо ознакомлены с участком от Дембицы аж до Горлиц. Пользуючися их доносами и указаниями, в єден день, 28-го июля 1943 г. німцы произвели аресты по всей Лемковщині и Подкарпатии от Дембицы, Санока, Кросна, Ясла, Горлиц и Крыницы. Под ключом оказалися лучшы сыны Лемковщины: Владимир Ткач, Иван Ткач, Ромцьо Иван и Михаил из Устья Русского, Юрий Рогоц, из Лося, Стефан Пийко, из Клопотницы, Ярослав и Александра Вислоцкы, Даниил Поруцідло, Василий Поливка, братья Иван и Тимофей Донскы, Федор Серняк и десяткы другых лемков и поляков, имена котрых ныні и трудно перечислити. Среди арестованными довелося очутитися и мні, переносити и видіти в тюрьмі гор. Ясло их неописанны страдания и мукы, пыткы и издівательства: палачи натравлювали на людей собак, били куда попало, желізными прутьями, выбивали зубы, проспинали рукы, в раны сыпали соль, загоняли в воду с кипучей горячостью, заставляли вытерати со стін свою кровь, тяжко избитых, умлівавшых поливали холодном водом и отжившых знова подвергали избиениц до утраты сознания и памяти, и кажду ночь вывозили на грузовиках по 10-15 человік за город в ліс и там их росстрілювали. Чекаш, бывало, в рядах в отчаянии, штобы скоро кончилися дьявольскы мучения. По всей Лемковщині плач и горькы рыдания, плакал тогды цілый наш лемковский край не было селения без жертв фашистского террора. Проходили дни и ночы, а чорна туча дикого произвола не проходила. Протяжным, сдавленным стоном стонала тюрьма в Яслі. День 8-го августа 1943 г. считам самым счастливым днем в мойой жизни. Была тиха, тепла ночь. Отразу слышыме мы, обреченны гибели, необычайне движение в тюрьмі, начальником котрой был украинский фашист из Стрыйского района, села Сыневодск Нижни. К сожалінию, я забыл фамилию того свиріпового палача. Што же таке случилося за стінами тюрьмы? То налетом польскы партизаны перерізали телефонны проводы, обезоружили охрану, ворвалися в тюрьму, роздали арестантам оружие, выпустили их на свободу — всіх 120 человік. И с ними я тоже обріл свободу.

Тот смілый налет партизанов на тюрьму ище в большой мірі взбісил чинов гестапо и украинской полиции. Послідовали аресты родителей освобожденных арестантов. Среди них в концлягері в Шебнях коло Ясла оказалися и мои 70-літны родичы. Заключенны подвергалися страшным издівательствам. Садистом самым беспощадным был их фольксдойчер Джазга, предатель поляк. Из тюрьмы в Яслі вышло нас всего четырі лемкы на свободу. Всі другы в тот час были на гестапо и в послідствии были росстріляны, в том числі Ромцьо Иван и Михаил, Ткач Владимир, Ткач Иван, Рогоц Юрий, Серняк Федор, Андрейчин Стефан, Вислоцкий Ярослав и Александра, Поруцидло Даниил, Мацієвский, Поливка Василь, Донский Иван и Тимофей, Клянцко и десяткы другых. Стефан Пийко, Семан Василец и я ушли в глубокий ліс коло села Гута Перегримска, район Ясло. Мы вырыли землянку и жили в ней цілу зиму, стараючися залічити свои раны. У мене прогнило тіло до костей и отпадало кусками. Все же молодость взяла верх, и я выздоровил.

Необходимо было начинати діло знова, налажувати страченну связь с оставшыми товаришами, набирати новы силы, организовати молодежь, скрывающуся в лісах, не желающу поступити в украинску СС-дивизию, вербовка в котру сопровождалася неслыханным террором.

С том цілью были напечатаны и розброшенны листовкы с обращением к лемковской молодежи.

Розгром німцев у Сталинграда вселил нову надежду в сердца миллионов людей, томившыхся в фашистской неволі. Подпольна борьба против озвірившого фашизма розверталася все ширше и успішнійше по всьой территории, занятой німцами. Авангардна роль в той борьбі принадлежала, конечно, коммунистам. Сильне партизанске движение на Украині и Білоруссии оказало громадне вліяние на розширение подпольной борьбы в сусідных районах, к в частности, на территории Польшы и Чехословакии. Борьба против общого врага объєдиняла людей разных национальностей и политичных убіждений. Тота борьба партизан связувала значительны силы гитлеровской армии. Германский фашизм ділал всьо возможне, штобы помішати объєдинению славянскых народов; немало усилий прилагал к тому, штобы роспалити национальну вражду меже украинцами и поляками, русскыми и украинцами, чехами и словаками, используючи для своих цілей найбольше реакцийны елементы из поміщичой, клерикальной и буржуазно-националистичной среды.

Город Горлицы, Лемковина. Пекарня М. Донского. Тут в 1943 отбывалися встрічы и нарады лемковскых подпольников с товаришом Владиславом Гомулка.

В окрестности села Мысцовы позоставшымися коммунистами был организованый отряд партизан из лемков и совітскых воєнно-плінных солдатов и офицеров под названием “Борцы за Совіты”. К отряду примкнули плінны солдаты и офицеры, як Борис Дранишников, Иван Михеєв, Иван Сильченко, Александр Бурдов и другы, ушедшы из “лягерей смерти”. Партийный комитет села Мысцовы возглавляли Иван Доктор, Иван Тимик, Юрий Мальцев, Дмитрий Лабик, Явиляк и другы. Командиром отряда “Борцы за Совіты” был назначеный лейтенант Борис Дранишников. Отряд провел ряд бойовых операций. Осенью 1943 року отряд вступил в бой с німецком и украинском полицийом на горі Дзюрдзю, между Тылявом и Терстяном, где было много фашистов убитых и захвачено оружие и патроны. В отомсту за тото поражение німцы вывезли из тюрьмы гор. Ясла на гору 20 коммунистов и всіх росстріляли. Меже убитыми были лемкы Иван и Тимофей Донскы и Василий Поливка из Воли Цеклинской. В Крыницкой тюрьмі был росстріляный Мацеєвский. В страшных мучениях там скончался Даниил Поруцидло, який роспорол собі живот и подрізал собі горло, штобы не выдати своих товарищей. Його брату Владимиру Поруцидло удалося біжати в ліс и бесстрашно мстити гибель брата. Разом с Антоном Крилем и другыми товаришами организовал партизанский отряд, котрый где только мог, то росправлялся с фашистами и их слугами. Йому удалося освободити 26 совітскых воєнноплінных из завода в Новом Санчі.

Село Воля Цеклинска на Лемковині. В том домі поміщался подпольный комитет, где встрічалися лемковскы партизаны.

Весном 1944 року состоялся в лісу между селом Перегримком и Фолюшом партизанский съізд Подкарпатского округа, в котром приняли участие делегаты польскых партизанов из Краковского округа “Томек”, “Казек” и “Ясек”. Съізд избрал секретарем Петра Павляка из Перегримкы, а мене командиром Подкарпатского округа. Такым образом я должен был возглавляти организованный мном отряд и всі партизанскы отряды на Лемковщині. Знова закипіла робота. Нашы связисты приводили в ліс все новых воєнноплінных, біжавшых из лягров. В виду брожения в словацкой армии, наш отряд установил связь с бойцами-словаками, сознавшыми свою ошибку. Обмануты своими руководителями, они пошли разом с німцами, но розочаровалися жестоко. Через нашого партизана Дмитрия Лабика и Чулика Василия нам удалося снискати на свою сторону словацкых солдатов и офицеров, Яна Дубкало, Яна Дуриша и другых. На нашу сторону перешол пулиметчик Путерка со своим пулиметом. Путерка привел скоро 15 вооруженных словаков, а в селі Зиндрановой словацкий офицер привел к нам 20 солдатов и 4 пулиметчикы с пулиметами. Партизанский отряд Поруцидла связался с словацкими партизанами, организатором котрых был тов. Демко из Бардийова послі освобождения, котрый робил секретаром райкома Коммунистичной Партии в Бардийові.

Город Крыниця на Лемковині. В той здравничной виллі отбывалися встрічы лемковскых подпольников в 1943 року.

Партизанске движение на Лемковщині росло с каждым днем. Весном 1944 року в лісах Лемковщины боролися с оружием в руках уже сотни людей. Участилися случаи розгрома полицейскых участков, возглавляємых предателями ОУН. Партизаны нападали на німецкы транспорты с оружием и продовольствием. На шоссе Горлицы-Ропица Русская была розбита легкова автомашина с тремя штабными офицерами, котры были на місци убиты, машина же уничтожена. Захватили нісколько важных документов и карту.

На дорогі Горлицы—Жмигород был задержаный мотоциклет с його водителем, водитель уведеный в ліс, а мотоциклет уничтоженый. Около села Боднарка днем произошол кровавый бой: много пало гитлеровцев в том сражению, благодаря хорошой ориентировкі партизан в данной місцевости со стороны партизан потери не было. Пока надъіхали німецкы панцерны автомашины, партизаны ушли уж в глубокий ліс. Німцы подпалювали хаты, в Клопотниці росстрілили жену партизана Степана Оленича, подпалювали дворы, многых арестовали.

Наконец пришол нетерпеливо ожидаємый день спасения. В Карпаты продвинулся совітский партизанский отряд и занял село Мысцову. Отряд носил имя Готвальда, ставшого потом президентом Чехословацкой республики.

Командувал тым отрядом капитан Квитинский, бойовый офицер в полном значении того слова. С большом радостью встрітили його жители Мысцовы и другых лемковскых сел, в котрых он побывал. За тот час он пополнил свой отряд за счет лемковскых партизанов, сділал необходиму розвідку, штобы продвинутися из Лемковщины в Чехословакию. Його отряду оказали большу услугу и помощь лемковскы партизаны: Мальцев, Явиляк, Доктир Иван и Стефан, Лабик Дмитрий, Чулик Василий, Котырга Михаил и другы. Двоє из них — Явиляк и Мальцев уже на Лемковщину не вернулися, они погибли в бою геройски под Моравском Остравом за освобождение братского чехословацкого народа.

Капитан Квитинский оказался прекрасным организатором партизанского движения. Його отряд им. Готвальда скоро возрос до бригады, так як к нему присоєдинилися цілы роты и батальоны словацкой армии в полном вооружении.

Усилия німцев розоружити словацку армию не удалися, потому што в тот час прибыли совітскы партизанскы отряды. За успішны операции и бойовы дійствия капитан Квитинский был произведеный в майоры, а совітске правительство присвоило йому имя героя Совітского Союза.

Послі ухода отряда им. Готвальда из Лемковщины, пришол сюда отряд Леонова. Он также остановился в селі Мысцові, к жителям Мысцовы он обратился приблизительно с такыми словами: “Прошол я Украину и Польшу, но нигде я не чувствовал себе так спокойно и увіренно, як чувствую себе на Лемковщині, где каждый человік стараєся помочи совітскому брату всім, чым лем може, и разом переживат с ним горе и радость. Тут лем роскрыватся вполні русска душа, истрадавша в чужой неволі, и только ныні она восторженно встрічає своих освободителей.”

Отряд Леонова перекрочил словацку границу и боролся с фашистами аж до освобождения Чехословакии.

В Карпаты клином через Тыляву около Дукли пробился гвардейский полк ген. Баранова, котрый спішил на помощь восставшей словацкой армии.

Произошла радостна встріча лемковскых партизанов с бойцами и офицерами полка ген. Баранова. На Дуклянском перевалі німцы были сильно окопаны, и войскам ген. Баранова было трудно пробитися через перевал. Німцы сознавали, што то буде больша поддержка словацкой армии и старалися всякыми силами не допустити до воссоєдинения войск ген. Баранова с словацком армиом. Несмотря на всі тоты трудности, войска ген. Баранова пробилися на сторону Чехословакии, поносячи при том большы страты. Часть солдат и офицеров остала одорвана и не смогла пробратися на Чехословакию.

Михаил С. Донский, по выході с тюрьмы подчас лічения в лісі.

Тота часть, однако, не сдалася німцам, а воссоєдинилася с лемковскыми партизанами и боролася в тылах фронта аж до освобождения Польшы и Чехословакии. В районі Крыницы появился совітский партизанский отряд Григория Гладилина. С ним соєдинился отряд Владимира Поруцидло. Примірно через місяц часу прибыл на Лемковщину отряд подполковника Золотаря, котрый возглавлял всі партизанскы части в Польші. Начальником його штаба был подполковник Перминов. Отряд Золотаря проводил розвідкы и бойовы операции в районі Нового Санча и Крыницы. Цінны услугы в городі Крыниці оказал партизанам Петро Русиняк, котрый жил в дачі “Байко”, находившойся в сусідстві гестапо.

Рискуючи жизнью, он смотріл систематично за дійствиями німецкых войск и потом доносил о том туда, где слідовало. Осенью 1944 года отряд Золотаря перешол словацку границу. Разом с ним ушол отряд Владимира Поруцидло, котрый, знаючи містность и словацкий и русский язык, давал цінны информации по розвідкі совітскым партизанам.

В районі Горлиц дійствовал партизанский отряд, состоявший с лемков и совітскых воєнноплінных солдатов и офицеров, руководимый Юрковскым Павлом С. Неоціниму помощь дали, в районі Кросно в подпольной роботі, в борьбі с оккупантом товаришы — Когутов Петро Михайлович, Когутов Лена, и Левицкий Гавриил.

Новый 1945 год ознаменовался для Лемковщины не бывалым событием: 15-го января в 9 часов рано загремили славны катюшы и артиллерия славной Красной Армии. Над німецкыми укріплениями повисла туча чорного дыма, из котрой высувалися огненны языкы. Земля горіла сплошным пламенем. Оглушительны громы сливалися в протяжный, непрерывный гул, потрясающий воздух и горы. Здавалося, што горы полетят в пропасть. И тот ураганный гул продолжался дві годины, потом всьо втихло, но втихло лем на миг. Моцне, бойове “ура” совітскых бойцов понеслося по Бескидам, с вершин котрых мы наблюдали тото зрілище и от радости даже слез не утирали. Каждый из нас сознавал, што война окончилася на нашой землі.

Теперь свободными гражданами мы можеме вернутися в родны села к своим родителям, женам и дітям послі долгых изнурительных тревог, лишений и мучений.

В заключение всего вышезложенного, я должен сказати, што то лем частинка моих воспоминаний, сохранившыхся в мойой памяти. Сознаюся чистосердечно, што я в короткой статьі не в силах был передати словами ужаснійшы переживания и горе мойого народа в Карпатах, а также страдания и подвигы лемковскых партизанов. Потому желательно, штобы оставшися в живых свідкы той великой трагедии пополнили мои окрухы своими воспоминаниями, замічаниями, фотокарточками погибшых, раненых и вообще принимающых участие в партизанскых боях на Лемковщині.

Прошло 41 год с тых пор, як начал свою жизнь Совітский Союз, созданный на основі теории єдинства робочых и селян — строит свою счастливу жизнь, социализм. Всі же усилия його врагов розрушити єдинство и сплоченность його народов, потерпіли крах, ибо совітске государство из всіх испытаний всегда выходило ище больше могучым.

Прошло 15 літ с тых пор, як Польша, а тым самым и Лемковщина начала строити социалистичный строй в Польской Народной Республикі.

Русске население Лемковщины дало неоспориме доказательство пламенной любви к свободі. Послідна борьба за ню была самом тяжком, тым больше, што к пролитию крови приложили рукы родны братья, отуманенны чадом фашизма и национализма.

Напрасно теперь стараются выбілити украинскых шовинистов и наймитов гитлеризма, проводячи широку кампанию против т. наз. “Москвофильства” разны “письмакы” в роді буржуазных националистов, и другы подобны им. Скорше або позднійше ложь буде обнаружена, и подвигы лемковскых партизанов по заслугам будут оцінены будучым поколінием.